Регион
Гинекологот осуден за силување отстранет од болницата во Осиек

Хрватскиот министер за здравство, Вили Берош, денеска, по седницата на владата, изјави дека гинекологот од Клиничката болница во Осиек, кој е осуден за силување пациентка, повеќе не работи во таа болница.
Гинекологот е отстранет од болницата откако во јавноста излезе информацијата дека неправосилно осудениот силувач сѐ уште работи во болницата, а во меѓувреме друга пациентка го обвини за злоупотреба.
Увид во болницата врши и Министерството за здравство.
„Министерството за здравство нагласува дека случајот со докторот гинеколог во КБЦ Осиек е неприфатлив примарно поради штетата на самата пациентка, а воедно ја доведува во прашање довербата во лекарската фела. Не сме задоволни од резултатите од досегашното постапување на КБЦ Осиек во конкретниот случај и итно ја испративме здравствената инспекција да изврши здравствен инспекциски надзор.
Воедно, ќе разгледаме зошто ХЛК, чија надлежност е можноста за одбивање дозвола за работа, не го сторила тоа, особено поради контекстот на тежината и сериозноста на делото за кое се товари споменатиот лекар.
Министерството за здравство целосно ја почитува независноста на правосудните органи, но за да се спречат вакви настани, Министерството за здравство почнува со измени на Законот за здравствената заштита, како што најави министерот за здравство, Берош“, се вели во дописот што Министерството неодамна го испрати до хрватските медиуми.
Медиумите потсетуваат дека гинекологот продолжи да работи во болницата иако беше осуден за силување пациентка во февруари годинава. Од дирекцијата на клиниката истакнале дека тој не може да биде санкциониран пред правосилноста на пресудата. Дополнително, ХЛК ја прекина дисциплинската постапка против лекарот до завршување на судската постапка, стои во написите.
Министерството ја испрати инспекцијата откако и друга пациентка за порталот „Новости“ изјавила дека гинекологот ја прегледал пред три дена на несоодветен начин и дека потоа се уверила дека не работи под надзор, како што дотогаш тврдеше раководството на болницата. КБЦ Осиек најави поведување дисциплинска постапка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Шеќеринска: НАТО нема да дозволи безбедносен вакуум во БиХ

Заменичката на генералниот секретар на НАТО, Радмила Шеќеринска, денес изјави дека алијансата нема да дозволи безбедносен вакуум во Босна и Херцеговина, откако српскиот лидер Милорад Додик објави дека ќе побара од Москва да ја прекине воената мисија ЕУФОР во таа земја.
Шеќеринска изјави дека НАТО е „трајно посветен на суверенитетот и територијалниот интегритет на Босна и Херцеговина“.
Таа додаде дека НАТО нема да дозволи дестабилизација во Босна и Херцеговина, соопшти канцеларијата на бошњачкиот член на колективното претседателство на Босна и Херцеговина, Денис Беќировиќ, кој се сретна со претставничката на НАТО.
„Без оглед на исходот од претстојната седница на Советот за безбедност на ООН, НАТО нема да дозволи безбедносен вакуум во Босна и Херцеговина“, рече Шеќеринска.
Регион
Албанска министерка го разреши својот заменик поради непочитување на забраната за пушење

Министерката за внатрешни работи на Албанија, Албана Кочиу, го разреши својот заменик поради непочитување на забраната за пушење во ресторан во САД, објавува „Спутник“.
Таа потврди на социјалните мрежи дека го сторила тоа врз основа на пријавата на албански државјанин кој живее во Њујорк, каде што бил во посета нејзиниот заменик Анди Махила. Како што изјави, тој пушел цигара во ресторанот „што предизвикало немир кај присутните“.
Албана Кочиу е првата жена на чело на полицијата во историјата на Албанија, а во претходната влада беше министерка за здравство.
Фото: принтскрин
Регион
Улиците во Белград оштетени за време на воената парада

Јавното комунално претпријатие Белград (ЈКП) доби наредба денес да излезе на терен и да започне со поправка на патиштата оштетени за време на воената парада „Силата на единството“ во саботата во српскиот главен град.
Членови на кабинетот на српскиот министер за одбрана и Секторот за инфраструктура и стандардни услуги вчера ја посетија рутата на парадата со претставници на Град Белград, Јавното комунално претпријатие Путеви Београда и ЈКП Белград за да ја утврдат штетата предизвикана за време на подготовките и одржувањето на парадата.
На жителите на Белград претходно им беше ветено дека сè ќе биде вратено во првобитната состојба, објавува Нова.рс.
Во саботата во Белград се одржа воена парада насловена како „Силата на единството“, на која учествуваа околу 10.000 војници. На парадата присуствуваа претставници на српскиот државен врв, предводени од претседателот Александар Вучиќ.
фото: принтскрин