Регион
„Ги зедов децата и жената и побегнав“ – сосед на убиецот од Хрватска откри детали за нападот, вели заедно пораснале

Шеесетгодишен маж кој живее на улицата Чапрашка Пољане во Сисак синоќа околу 20 часот и 10 минути вооружен со огнено оружје дошол во куќите на своите соседи и отворил оган кон нив. Убил 45-годишна жена, ранил четири други лица, запалил две куќи и својата, а потоа избегал.
По неколкучасовно бегство бил уапсен и приведен во полиција каде ќе биде спроведена истрага. Плашејќи се дека ќе ги убие, луѓето се забарикадирале со мебел и бегал низ прозорците кога мажот ги почнал убиствата.
Соседите за „Јутарњи лист“ изјавиле дека напаѓачот имал психички проблеми, и ги обвинувал дека го отруле.
Живеел сам во трошна куќа, немал жена и деца, а мештаните тврдат дека не бил сиромав, туку „имал пари, оти продал малку земја“.
„Видов чад, оган, луѓето викаа: ‘Бегај, овој човек доаѓа со пушка и пука, ги пали куќите на луѓето’. Ги зедов децата, ја зедов сопругата и дојдов на безбедно место. Сега се вратив да видам што се случило. Ќе бидам мирен кога ќе биде уапсен. Работев со него цел живот, се познаваме и заедно пораснавме. Тој е многу постар од мене. Беше малку чуден, психички нестабилен, но не ми се верувало дека ќе направи вакво нешто. И мојот колега беше застрелан, не знам што се случи со него. Имаше поединечни истрели“ изјави Сеад, еден од соседите на напаѓачот за „Јутарњи лист“, додавајќи дека самиот не го видел напаѓачот.
Четириесет и петгодишна жена е убиена во пукање во ромската населба Чапрашке Пољане, а четири лица се ранети, соопшти полицијата во Сисак-Мославина утрово. Лекарска помош им е укажана во Општата болница Сисак, каде е констатирано дека се тешко повредени.
При интервенцијата на овој настан со полесни повреди се здобил пожарникар. Лекарска помош им била укажана на две лица, меѓу кои и едно дете, кои биле полесно повредени при бегството.
Во необичниот настан целосно изгореле две семејни куќи и еден автомобил, додека делумно изгореле една куќа и еден автомобил, соопшти полицијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Шеќеринска: НАТО нема да дозволи безбедносен вакуум во БиХ

Заменичката на генералниот секретар на НАТО, Радмила Шеќеринска, денес изјави дека алијансата нема да дозволи безбедносен вакуум во Босна и Херцеговина, откако српскиот лидер Милорад Додик објави дека ќе побара од Москва да ја прекине воената мисија ЕУФОР во таа земја.
Шеќеринска изјави дека НАТО е „трајно посветен на суверенитетот и територијалниот интегритет на Босна и Херцеговина“.
Таа додаде дека НАТО нема да дозволи дестабилизација во Босна и Херцеговина, соопшти канцеларијата на бошњачкиот член на колективното претседателство на Босна и Херцеговина, Денис Беќировиќ, кој се сретна со претставничката на НАТО.
„Без оглед на исходот од претстојната седница на Советот за безбедност на ООН, НАТО нема да дозволи безбедносен вакуум во Босна и Херцеговина“, рече Шеќеринска.
Регион
Албанска министерка го разреши својот заменик поради непочитување на забраната за пушење

Министерката за внатрешни работи на Албанија, Албана Кочиу, го разреши својот заменик поради непочитување на забраната за пушење во ресторан во САД, објавува „Спутник“.
Таа потврди на социјалните мрежи дека го сторила тоа врз основа на пријавата на албански државјанин кој живее во Њујорк, каде што бил во посета нејзиниот заменик Анди Махила. Како што изјави, тој пушел цигара во ресторанот „што предизвикало немир кај присутните“.
Албана Кочиу е првата жена на чело на полицијата во историјата на Албанија, а во претходната влада беше министерка за здравство.
Фото: принтскрин
Регион
Улиците во Белград оштетени за време на воената парада

Јавното комунално претпријатие Белград (ЈКП) доби наредба денес да излезе на терен и да започне со поправка на патиштата оштетени за време на воената парада „Силата на единството“ во саботата во српскиот главен град.
Членови на кабинетот на српскиот министер за одбрана и Секторот за инфраструктура и стандардни услуги вчера ја посетија рутата на парадата со претставници на Град Белград, Јавното комунално претпријатие Путеви Београда и ЈКП Белград за да ја утврдат штетата предизвикана за време на подготовките и одржувањето на парадата.
На жителите на Белград претходно им беше ветено дека сè ќе биде вратено во првобитната состојба, објавува Нова.рс.
Во саботата во Белград се одржа воена парада насловена како „Силата на единството“, на која учествуваа околу 10.000 војници. На парадата присуствуваа претставници на српскиот државен врв, предводени од претседателот Александар Вучиќ.
фото: принтскрин