Регион
Грците бараат уште десетина хулигани, пронајдени се два клучни доказа, пишуваат грчките медиуми

Грчката полиција сè уште се обидува да открие кој го уби 29-годишниот навивач на АЕК, Михалис Кацурис, за време на хулиганските немири во Атина пред повеќе од една недела. Грчките медиуми објавија нови информации за истрагата.
Во наредната недела, пишува „Прототема“, ќе бидат познати резултатите од ДНК-примероците собрани од 105 уапсени хулигани. Примероците собрани од уапсените ќе се споредат со оние пронајдени кај убиениот 29-годишник за да се утврди дали некој од нив е убиецот.
Според информациите од полицијата, пишуваат грчките медиуми, во наредната недела ќе бидат објавени податоци за 60-ина предмети, кои по нередите беа одземени и собрани околу стадионот на АЕК.
Властите ја фокусираа својата истрага на два ножа на преклопување, кои беа идентификувани и запленети и се сметаат за клучни докази во случајот, пишува „Прототема“. Едниот наводно е на уапсениот со албанско потекло, а другиот на 23-годишен Хрват. Полицијата се надева дека анализата на примероците од ДНК од ножевите ќе даде нови информации, кои ќе помогнат да се идентификува убиецот.
Полицијата смета дека сè уште не се уапсени сите хулигани што учествувале во нередите, а се трага по уште 10-12 лица, Хрвати и Грци. Грчките медиуми пишуваат дека полицијата верува оти овие хулигани се кријат во Грција и чекаат да се смири ситуацијата по што планираат да избегаат.
Полицијата утврдила и дека најмалку 5-6 хулигани, кои биле уапсени и снимени за време на нередите, учествувале и во инцидентите што се случија во ноември 2015 година во Атина на натпреварот од Лигата на шампионите. Грчката полиција тогаш идентификува 35 хрватски навивачи, кои учествуваа во нереди со српски навивачи. Тогаш беа уапсени неколку лица, од кои некои беа уапсени и во немирите минатата недела.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Загина српски воен падобранец

Припадник на 63-та падобранска бригада, виш водник прва класа Милан Станковиќ, почина вечерва во Воената болница во Ниш од повредите здобиени при скок со падобран на воениот аеродром „Михајло Петровиќ“ во Ниш, соопшти Министерството за одбрана на Србија.
Во соопштението се наведува дека по приземјувањето, Станковиќ бил итно реанимиран и пренесен во болница, каде што, и покрај брзата реакција и напорите на лекарите, им подлегнал на повредите околу 19 часот.
Надлежните органи пристигнаа на местото на настанот. Истрагата е во тек. Началникот на Генералштабот на српските вооружени сили нареди формирање комисија за утврдување на околностите на вонредниот настан.
Српски Телеграф пишува дека Станковиќ е роден на 25 декември 1983 година и дека е во српската армија од 2005 година. Зад себе остави сопруга и две деца. Министерот за одбрана Братислав Гашиќ и началникот на Генералштабот на српската армија, генерал Милан Мојсиловиќ, испратија телеграми со сочувство до семејството на починатиот Станковиќ.
Регион
Не успеа ниту новиот обид за избор на претседател на косовското собрание

Собранието на Косово и енеска не го избра Аљбуљен Хаџиу за претседател на собранието.
При гласањето Хаџиу доби поддршка од 54 пратеници, 44 беа против, а три лица беа воздржани.
За него гласаа пратениците на Самоопределување, како и пратениците на малцинските заедници, освен Адем Хоџа, кој гласаше против.
На седницата не учествуваше пратеничката Дуда Баље, која досега гласаше против.
Против гласаа членовите на Демократската партија на Косово, Демократскиот сојуз на Косово и Алијансата за иднината на Косово.
Претставниците на досегашната опозиција, по седницата, изјавија дека сè ова личи на театар и ја обвинија победничката партија дека намерно го спречува конституирањето на парламентот бидејќи нема гласови за формирање на новата влада на Косово.
Од друга страна, Самоопределување ги обвини пратениците на поранешната опозициска партија дека го блокираат нивниот предлог.
Продолжението на конститутивната седница на косовскиот парламент е закажано за 1 мај.
Регион
По две недели, студентите ја прекинуваат блокадата на РТС

Студентите во Белград вечерва објавија дека ја прекинуваат блокадата на зградата на Радио и телевизија на Србија, објави Б92.рс.
Тие на социјалните мрежи објавија дека ја прекинуваат блокадата што беше воведена од 14 април, откако Комисијата за култура и информации донесе одлука за откажување на стариот конкурс и распиша нов конкурс за избор на членови на Советот на Регулаторното тело за електронски медиуми (РЕМ).
Министерот за информации и телекомуникации, Борис Братина, синоќа изјави дека верува оти распишувањето на нов конкурс за избор на членови на советот на РЕМ, кој беше поставен како услов за прекин на блокадата на РТС, нема да ја заврши кризата околу јавниот сервис.
„Прво, оние што протестираат пред РТС всушност се на погрешна адреса. Бидејќи РЕМ се наоѓа на различна адреса од РТС, и тоа е она што всушност најмногу ги интересира, како и многу други. Генерално, тоа е еден вид борба за тој РЕМ, бидејќи највредните работи таму се всушност овие природни ресурси, со други зборови, фреквенциите што ги доделуваат“, истакна Братина.
Тој рече дека Владата добила писмо од директорот на РТС, во кое се наведува дека новинарите немаат услови да работат од дома, дека ситуацијата е тешка, дека програмата е доведена во прашање, но дека никаде не е наведено зошто.
Поради блокадата, РТС ја емитува својата програма според изменет распоред, а јавниот медиумски сервис објави дека вработените вложуваат големи напори за реализација и емитување на програмата, и покрај, како што велат, нелегалната блокада на зградата, студиото, емитувачката и другата опрема, како и прогонот на новинарите и снимателите на терен.