Регион
Дачиќ: Целта на Приштина е да го намали бројот на Срби на Косово

Министерот за внатрешни работи на Србија, Ивица Дачиќ, изјави дека целта на властите во Приштина е што е можно повеќе да се намали бројот на Србите на Косово, да се избрише нивната перспектива и да се создаде свест кај нив дека нема опстанок за нив.
Дачиќ во интервју за „Вечерње новости“ изјави дека тоа се долгорочните цели на косовскиот премиер Аљбин Курти, кој не обрнува внимание на постигнатите договори во процесот на дијалогот, пренесува „Косово онлајн“.
Дачиќ додаде дека меѓународната заедница првпат дошла до израз кога Курти морал да направи одредени отстапки и да ја укине забраната за српска стока и изјавил дека Курти тоа го направил само затоа што меѓународната заедница го уценувала со статус во некои регионални организации.
Тој посочи дека единствено прашање е дали меѓународната заедница сака да изврши влијание.
„Првпат сега се случи западните и источните земји, Европската Унија, САД, Германија, Русија и Кина да се согласат со предлозите што ги изнесе претседателот Александар Вучиќ“, рече Дачиќ.
Осврнувајќи се на изјавата на специјалниот пратеник на ЕУ за дијалог меѓу Белград и Приштина, Мирослав Лајчак, дека Србија го повлекла писмото во кое се оградила од спорните делови од Охридскиот договор, Дачиќ рекол дека за тоа слушнал од новинските записи и дека нема информации, но посочи дека Србија има јасна политика дека ќе ги спроведе оние делови од договорот со кои се согласила.
„Не се согласивме со деловите од договорот што се однесуваат на статусот на Косово, кои се однесуваат на де јуре и де факто признавање и членство во меѓународни организации. Нашата политика не се смени ни трошка сите овие години“, нагласи Дачиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Локални избори во Заечар и Косјериќ

Денеска во Заечар и Косјериќ се одржуваат редовни локални избори, на кои се избираат советници во општинските совети на овие две локални самоуправи. Гласачките места се отворија утрово во 7:00 часот, а се затворија во 20:00 часот.
Осум изборни листи учествуваат на изборите во Заечар и три во Косјериќ. Изборниот молк ќе трае до затворањето на гласачките места.
Министерот за внатрешни работи на Србија, Ивица Дачиќ, изјави дека нарушувањето на изборите е кривично дело и дека полицијата ќе реагира.
– Полицијата мора да си ја врши својата работа. Во кривичниот законик постои кривично дело попречување на избори. Доколку некој крши гласачки кутии или им попречува на луѓето да гласаат, тоа нема да биде дозволено – рече Дачиќ.
Општина Косјериќ има околу 10.000 жители, а право на глас имаат 8.897 гласачи.
Според податоците на Градската изборна комисија, вкупниот број на гласачи на територијата на Заечар е 47.357.
Прелиминарните резултати се очекуваат вечерва.
Регион
(Фото) Поскапо отколку на Ибица: лежалка на Јадранското море чини 1.300 евра на ден

Цените во хрватските туристички центри се зголемуваат од година во година, а се чини дека оваа сезона трката за профит започна порано од кога било. Од кафе кое чини пет евра, лежалки кои се изнајмуваат поскапо од ноќевање во соба, до порции риба кои достигнуваат цени како и во луксузните ресторани во европските метрополи – сето ова веќе ги загрижува и домашните и странските гости на Јадранското Море, пишува Блиц.
Едно е сигурно – сезоната сè уште не е ни започната, а за цените се зборува како да сме веќе во средината на август. Ова го потврдува и последната објава на Reddit, каде што еден корисник објави фотографија од ценовник од кафуле на плажа во Сплит.
„Можеби ценовникот е поставен на 100 метри од барот на плажата, но барот е во сенка (Жњан, Сплит)“, напиша тој во објавата со фотографијата и додаде: „Добредојдовте на Ибица“, алудирајќи на високите цени.
Цената за изнајмување лежалки се движи од 35 до 1.300 евра!
Možda je cjenik stavljen 100m dalje od beach bara, ali je bar u ladovini (Žnjan, Split)
byu/MantisTobogan_dr incroatia
Во коментарите, корисник ги спореди цените во популарно одморалиште во Шпанија, Ибица и Сплит. Според податоците од веб-страницата Numbeo, Сплит е поскап, барем кога станува збор за туристичките објекти. Авторот на објавата одговори на тоа:
„О, ужас! Сè уште му се потсмевам, а дури е поскап од Ибица“.
Многумина се прашуваат каков туристички бран нè очекува кога, веќе во предсезоната, цените на сместувањето, кафето или порциите лигњи достигнаа нивоа што до вчера беа резервирани за најскапите европски дестинации.
Регион
Силен земјотрес ја погоди Света Гора, почувствуван на Халкидики и во Солун

Земјотрес со магнитуда од 5,3 степени е регистриран попладнево во морската област на Света Гора.
Според Геодинамичкиот институт и Сеизмолошката станица на Универзитетот „Аристотел“ во Солун, епицентарот на потресот бил на 7 километри западно од Кареја, на длабочина од 12,5 километри.
Како што јавуваат грчките медиуми, силниот земјотрес го потресе целиот регион Халкидики, како и градот Солун. Бил почувствуван и на крајбрежните области на Кавала и Тасос.