Регион
Двегодишно дете од Грција се заглавило и задушило во фиока од кауч
Смртта на двегодишно дете од Грција кое се задушило во својот дом откако се вовлекло во фиока на каучот додека неговите родители спиеле била болна, покажала обдукција на телото на детето, а пренесе српски „Телеграф“.
Момчето се задушило во фиоката поради недостиг на воздух, а резултатите од обдукцијата покажале дека детето до последни сили силно се борело да излезе.
Пронајдено било со повреди на челото, што укажува дека детето повеќе пати со главата удирало во горниот дел од фиоката на каучот која го поклопила. За жал, тоа не можело самото да го крене каучот, а бидејќи никој не ги слушнал неговите удари, момчето веројатно се задушило по околу десет минути поминати во фиоката.
Ужасната несреќа се случила ноќта меѓу неделата и понеделникот во семеен дом во предградие на Атина. Детето го искористило моментот додека неговите родители цврсто спиеле, излегло од спалната соба и се приближило до каучот чија фиока била отворена. Инспекторите веруваат дека малиот сакал да си игра криенка, па влегло во фиоката. Притоа, случајно го повлекол јажето и горниот дел на фиоката паднал врз него, затворајќи го внатре во каучот.
„Детето постепено губело здив. Се гушело неколку минути, ако не и подолго. Повредите на главата укажуваат дека со сите сили се обидувало да се извлече“, изјавиле лекарите за локалните медиуми.
Безживотното тело на момчето го пронашла неговата мајка в зори.
„Во неделата од таа фиока вадевме зимска облека, а внатре ја враќавме летната. Додека јас и мојот сопруг работевме надвор, тој постојано играше одоколу и повеќепати влегуваше и излегуваше од фиоката за да се скрие од нас, тоа му беше интересно. Вечерта си легнавме рано, околу 19 часот бидејќи имаме и бебе, па бевме премногу уморни. Намерно го оставивме каучот подотворен, за фиоката да се проветри“, објаснила скршената мајка за грчките медиуми.
Таа додала дека со сопругот не забележале кога детето станало. Вели дека синот заспал во нејзината прегратка околу 19:30, a потоа и таа потонала во сон. Дека детето го нема сфатила дури во 5 часот наутро, кога станала да го нахрани бебето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Во Македонија почувствуван земјотрес, епицентарот е во Врање
Земјотрес со јачина од 4 степени според Рихтеровата скала утрово ја погоди јужна Србија, а истиот е почувствуван и во Македонија и во Бугарија.
Епицентарот на земјотресот бил на 12 километри североисточно од Врање, а потресот бил на длабочина од 14 километри и се почувствувал во 4 часот и 48 минути по локално време.
Регион
Пронајдено телото на уште една жртва од поплавите во БиХ, операцијата за извлекување е во тек
Уште една жртва од минатонеделните катастрофални поплави е пронајдена во областа Коњиќ, така што бројот на загинати само во Херцеговско-неретванскиот кантон се искачи на 21. Операцијата за спасување е во тек.
Покрај 21 загинат во оваа област, тројца загинаа во Фојница, така што во БИХ досега се евидентирани вкупно 24 жртви од поплавите, пренесува Н1.
Откако ќе заврши извлекувањето на телото, ќе следи идентификација, изјави за Н1 градоначалникот на Коњиќ, Осман Ќатиќ.
Се трага по телата на уште три исчезнати лица во Јабланица, а по едно во Коњиќ.
Регион
Протече изјавата дадена пред смртта на братот на осомничениот за убиството на Данка Илиќ
Далибор Драгијевиќ, брат на Дејан Драгијевиќ, еден од двајцата обвинети за убиството на двегодишната Данка Илиќ на 26 март во Бањско Поље, по апсењето дал изјава во Полициското одделение во Бор, но не бил сослушан од обвинителство затоа што починал додека бил во полициски притвор.
Во обвинението за убиството на Данка Илиќ, до кое дојде српски Телеграф, стои и изјавата на Далибор Драгијевиќ од полицијата во која тој го обвини својот брат дека го убил детето.
Тој на 6 април бил сослушан и рекол дека брат му Дејан Драгијевиќ на 26 март бил на работа во Водовод каде работел прва смена од 7 до 15 часот, а тој ден дошол дома во 15 часот и 30 минути.
„Забележав промени во неговото однесување, беше вознемирен. Не ми ја кажа причината за тоа, а подоцна слушнав на телевизија дека исчезнало дете во Бањско Поле. Дејан со своето пежо 3072 сина боја дојде дома, а потоа видов бела вреќа во багажникот на неговиот автомобил, Го прашав што има во неа, а тој ми рече дека има дете.
Не се чувствував добро, го прашав што прави, какво дете, а тој ми рече дека детето го прегазиле со автомобил и го земале. Тогаш тука беше и нашиот татко Радослав Драгијевиќ, ја виде и вреќата во багажникот“, изјави Драгијевиќ.
Како што е наведено во изјавата, тој го прашал својот брат Дејан што ќе прави, а потоа се договориле заедно да ја однесат вреќата со детето во напуштена куќа на новиот Злотски пат, што потоа заминале со автомобил и ја оставиле вреќата на приземјето од таа куќа, само ја спуштиле на подот, а потоа се вратиле дома.
„Не се сеќавам кој ден беше, но знам дека беше пред да го уапсат брат ми Дејан. Брат ми ми кажа дека вреќата со телото на детето ја зел од куќата каде што ја оставивме и со својот автомобил ја пренел и ја закопал некаде кај Брестовачкиот мост“, заклучил Драгијевиќ.
Инаку, обвинението кое беше покренато за убиството на Данка Илиќ се уште не е потврдено, а постои можност судот да го врати на дополнување.
Драгијевиќ и Јанковиќ, работници на комуналното претпријатие, беа уапсени на 4 април, а таткото и братот на Дејан, Радослав и Далибор Драгијевиќ, беа уапсени два дена подоцна бидејќи помогнале да се сокрие телото на девојчето.
Еден ден подоцна, на 7 април, Далибор Драгијевиќ почина во полициската станица во Бор.
Двајцата осомничени прво го признале убиството, а подоцна ги смениле исказите и рекле дека полицијата го изнудила признанието од нив.
Телото на Данка Илиќ до денес не е пронајдено.