Регион
Две години ја принудувале 14-годишната ќерка да краде и да проси, со тие пари купиле куќа: драма во Загреб

Мајката на 14-годишно девојче е уапсена поради сомнение дека заедно со сопругот, очувот на детето, со години ја тепала ќерка си и ја терала да проси или да краде.
Се започнало кога девојчето имало 12 години. Нејзините родители наместо да се грижат за неа, ја искористувале на најгруб можен начин. И двајцата сега се под истрага за сомневање за трговија со луѓе, пренесуваат медиумите во регионот.
Ја терале да проси и да краде во многу земји, како Шпанија, Италија, Франција. Девојчето за тоа време не одело на училиште, немало здравствено осигурување, а морало да се грижи за своите помали браќа и сестри.
Ужасот траел две години се додека девојчето не успеало да побегне од куќата во близина на Загреб каде родителите ја криеле заедно со другите деца. Станува збор за, како што неофицијално пренесуваат тамошните медиуми, вила во околината на Загреб која осомничената двојка не ја стекнала легално.
По пријавувањето на случајот, полицијата упаднала во куќата во која била пронајдена мајката на девојчето. Бидејќи била бремена, на полицијата и рекла дека е болна и дека се плаши од спонтан абортус. Таа е пренесена во болница каде е задржана на лекување. Штом и дозволи здравствената состојба, по барање на обвинителството ќе биде префрлена во истражен затвор што го одреди Жупанискиот суд во Загреб.
Притвор му е одреден и на нејзиниот сопруг, кој успеал да побегне пред полицијата да упадне во куќата. Бидејќи има државјанство на БиХ и Србија. По него наскоро треба да биде распишана потерница.
Девојчето во сведочењето изјавило дека мајка и еднаш и ја скратила косата и и ги избричила веѓите. После тоа и рекла да оди во полиција и да пријави дека некој ја нападнал. Таа не го направила тоа. Кажала дека нејзините родители ги користеле парите што ги добила од просење во недвижнини низ Хрватска и Босна и Херцеговина. Кога одбила да проси или да краде, мајка и и очувот ја тепале со кабли и појаси.
Откако се дозна за овој страшен случај, детето било одземено од семејството и ставено во безбедна куќа. Исклучени се и другите деца од семејството, кои најверојатно ќе бидат сместени во дом за запуштени деца.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Македонија ѝ понуди помош на Бугарија по катастрофалните поплави

Македонија е подготвена да обезбеди поддршка за справување со последиците од поплавите, објави претседателот на Бугарија, Румен Радев, на „Икс“, по телефонскиот разговор со македонската претседателка Гордана Сиљановска Давкова.
„Благодарност до претседателката Гордан Сиљановска Давкова за конструктивниот телефонски разговор и изразеното сочувство за жртвите од поплавите во Бугарија, како и за декларираната подготвеност на РСМ да обезбеди поддршка за справување со последиците од невремето“, напиша Радев.
Благодаря на президента Гордана Силяновска @gogamkd за конструктивния телефонен разговор и изразените съболезнования за жертвите при наводненията в България, както и за заявената готовност РСМ да окаже подкрепа за справяне с последиците от бедствието.
— President.bg (@PresidentOfBg) October 4, 2025
Бугарија се соочува со апокалиптични поплави. Снимките покажуваат како автомобилите се однесени од порои, а полицијата и жандармеријата се распоредени во критичните области.
Четвртата жртва од поплавите во реонот на туристичкото одморалиште Елените во Бугарија е откриена синоќа, изјави директорот на Регионалната дирекција на Министерството за внатрешни работи во Бургас, виш комесар Владимир Маринов.
БТА објави дека ситуацијата во одморалиштето Елените и поширокото подрачје на Бургас, во југоисточна Бугарија, полека се враќа во нормала.
Massive flooding due to heavy rainfall in Elenite, Burgas Province, Bulgaria 🇧🇬 pic.twitter.com/1w2cKP2lgA
— Disaster News (@Top_Disaster) October 3, 2025
Во невремето животот го загубија двајца спасувачи и еден граѓанин, кој во моментот на пристигнувањето на првиот голем бран се наоѓал во соба на приземјето од својата куќа.
Регион
Трагедија во Хрватска: маж почина од убоди на стршлени додека сечел дрва за огрев

Додека сечел дрва во шума, 54-годишен маж бил нападнат од стршлени. И покрај брзата лекарска интервенција, починал на самото место.
Во Хрватска, во шумско подрачје близу Крижевци, 54-годишен маж бил смртно нападнат од стршлени, соопшти полицијата од Копривничко-крижевечката жупанија.
Вчера, додека сечел дрва за огрев, мажот бил нападнат од стршлени, по што му се слошило, јавува Хина.
И покрај тоа што брзо му била укажана лекарска помош, мажот починал на самото место
Регион
Вучиќ: Ќе има војна

Српскиот претседател Александар Вучиќ предупреди за време на отворањето на новата брза железница што ги поврзува Белград и Суботица дека целиот свет се подготвува за војна.
„Ќе биде сè потешко во светот. Ќе биде тешко и тука, од едноставна причина што луѓето мора да знаат дека сите се подготвуваат за војна. А кога се подготвуваат за војна, тоа значи дека ќе има. И ви велам, ќе има“, рече српскиот претседател, пренесува Телеграф.
„Тие не се заинтересирани за разговори и преговори. Тие копаат ровови и чекаат почеток, а знаат дека војната дефинитивно доаѓа. Тие чекаат и се подготвуваат“, додаде тој.
„Мораме да подготвиме некои работи што не сме ги подготвиле“
Тој нагласи дека светот се движи кон војна и дека малкумина можат да ја спречат.
„Би платил сè на светот ако тоа не се случеше. За жал, се плашам дека сум во право. Ќе мора да подготвиме некои работи што не сме ги подготвиле. Нашата армија е подготвена да го одврати секој непријател, но ќе мора да подготвиме и некои други работи“, изјави тој.
„Двапати ги зголемив сите резерви на храна, и за армијата и преку нашите стокови резерви. Сега повторно ќе побарам зголемување“, објави тој.
Во врска со можните проблеми со снабдувањето со гориво поради санкциите на САД врз нафтената индустрија на Србија (НИС), Вучиќ рече дека сè ќе биде решено и дека нема да има купување гориво во кантички.
„Она што ни го оставија, денес се обидуваме да го решиме. Не сме ниту виновни ниту обврзани да се најдеме во проблем и ја плаќаме цената. Но, граѓаните не треба да се грижат. Ќе ги решиме проблемите и нема да има бензин во кантички, но нека знаат дека ако случајно имаме бензин во кантички, единствените што треба да се обвинат се тие“, заклучи тој.
Фото: принтскрин