Регион
Две жени најдени мртви во нивните домови: бројот на жртви од бурата „Даниел“ во Грција се искачи на шест лица
Две жени се пронајдени мртви во своите домови во областа Астрица во Кардица како последица на бурата Даниел во Грција.
Во различни куќи биле пронајдени две постари жени. Така бројот на жртвите поради лошото време се искачи на шест.
Според известувањето на „Скај“, роднина ги предупредил старите жени за невремето и ги советувал да си одат, но тие рекле не.
По некое време ги повикал спасувачите кои ги нашле мртви во куќите. Со чамец биле префрлени во амбулантно возило.
Претходно, еден постар маж беше пронајден мртов во областа на Тесалија, пренесува Катимерини. Тој 82-годишен маж е пронајден во онесвестена состојба под автомобил во областа Елинопиргос, откако по излегувањето од куќата го однел порој предизвикан од бурните дождови.
Претходно, противпожарните служби соопштија дека телото на постара жена е пронајдено во близина на крајбрежна локација на полуостровот Пелион, во близина на пристаништето Волос.
Првата жртва на невиденото невреме во Грција беше маж во Волос кој во вторникот беше погоден од ѕид.
Од понеделникот бурата Даниел предизвика лизгање на земјиштето, уништи мост, урна далноводи, а десетици автомобили беа однесени со порои, само неколку дена откако беше изгаснат големиот пожар во северна Грција.
Поплавени се и делови од Атина.
Четири лица се водат за исчезнати во централна Грција откако поројниот дожд поплави домови и деловни објекти. Властите трагаат по исчезнати лица, изјави во телевизиска изјава министерот за климатски кризи и цивилна заштита Василис Кикилијас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Невремето во Србија направи хаос: се излеа Дунав, ветерот корне дрвја
Реката Дунав денеска се излеа во Бачка Паланка, во природниот парк „Тиквара“, додека на северот од Србија е забележан значителен пад на температурата и се предвидува невреме пропратено со врнежи и грмежи.
Имено, како што може да се види на видеата на социјалните мрежи, водата достигна такво ниво што од водата штрчат само чадори и улични светилки.
Како што соопшти денеска Републичкиот хидрометеоролошки завод на Србија (РХМЗ), облачност со врнежи од дожд, пад на температурата и умерен и засилен северозападен ветер најпрвин ја зафати Бачка Паланка, но потоа ќе се прошири и во остатокот од Војводина.
Студениот бран преку северот на земјата пристигна во Србија, каде во некои градови температурата беше околу 15 степени.
На граѓаните им се препорачува да ги преземат сите мерки за заштита на имотот, но и себеси поради предвиденото невреме.
Значителна промена на времето утре ќе има и во Македонија, најави Управа за хидрометеоролошки работи (УХМР).
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Регион
Силен земјотрес во Грција
Земјотрес со јачина од 4,6 степени според Рихтеровата скала ја погоди јужна Грција, објави ЕМСЦ.
Земјотресот е регистриран на 44 километри од Пиргос, на длабочина од 20 километри.
Во близина е островот Закинтос.
Засега нема информации за повредени или материјална штета.
#Earthquake (#σεισμός) confirmed by seismic data.⚠Preliminary info: M4.6 || 41 km S of #Pýrgos (#Greece) || 3 min ago (local time 15:18:15). Follow the thread for the updates👇 pic.twitter.com/7n5aGlNhsu
— EMSC (@LastQuake) September 28, 2024
Регион
(Видео) Невреме во Словенија: по обилните дождови се излеа река, поплавени патишта, подруми и ниви
Реката Соча и нејзините притоки на запад од Словенија се излеаjа по обилните дождови во областа Бовец и поплавија патишта, подруми и ниви, јавија денеска словенечките медиуми.
Противпожарните служби евакуирале 30 лица откако одрон го блокирал патот во градот Лепена, јавува агенцијата СТА.
Едно лице е повредено при отстранување на паднато дрво во општина Толмин.
Дирекцијата за цивилна заштита и помош при катастрофи соопшти дека пожарникарите цела ноќ ја испумпувале водата од подрумите и ги отстранувале паднатите дрвја од коловозите.
Во западните делови на земјата врнежите се ослабени од четвртокот навечер, а невремето денеска го зафати и источниот дел на Словенија.
Најголемо количество врнежи се регистрирани во Бохињ и Посочје, објави порталот Метеоинфо.
Рекордни врнежи за Словенија се забележани во Вогел кај езерото Бохињ, при што за 24 часа наврнале 378 литри дожд на метар квадратен.