Република Северна Македонија е новото име на поранешната југословенска република, коe е договоренo од страна на премиерите Алексис Ципрас и Зоран Заев, пренесуваат грчките медиуми.

Според информациите, договорот ќе биде официјлизиран овој викенд, најверојатно, в сабота во Преспа.

„Договорот би можел да биде објавен денес“, изјавил неименуван претставник на грчката влада, објави „Ројтерс“. Ципрас и Заев вчера остварија телефонски разговор објавувајќи дека разговорот ќе го продолжат и денеска. По вториот разговор, веќе сè би требало да биде јасно.

Атинскиот весник „Ефимерида“ на својата веб-страница пишува дека по првиот вчерашен телефонски разговор меѓу Заев и Ципрас, за најновите детали за решавањето на деценискиот спор, двајцата премиери требало да ги потврдат денеска претпладне, но според најновите информации, тоа ќе го сторат попладне со цел претходно да го информираат специјалниот посредник на ОН, Метју Нимиц, кој се наоѓа во Њујорк.

Според информации од извори во владата на Грција, „Ефимерида“ пишува дека по разговорите со Нимиц и Заев, Ципрас ќе ги информира шефовите на политичките партии во земјата, а потоа во 19 часот ќе го информира и претседателот на Грција, Прокопис Павлопулос.

Веднаш потоа Ципрас ќе ја објави декларацијата за договорот, кој ќе биде потпишан со Заев на заедничката граница во Преспа. Ова место претходно беше избрано како симболично.

Грчките извори наведуваат дека во договорот пишува оти Македонија има јазик што на никаков начин не е поврзан со античкиот грчки, дека земјата нема аспирации кон никакво наследство и дека припаѓа на словенската група народи.

„Скопското прашање: еден чекор до договор“; „Денес се затвора прашањето во Скопје“, „Денес клучен телефонски разговор“; „Северна Македонија е името за кое се согласиле премиерите“, се само дел од насловите во грчките медиуми по вчерашниот разговор на Ципрас и Заев.

Ставот на македонската Влада е дека постигнувањето договор за надминување на спорот што трае повеќе од 25 години е од голема важност за двете земји, особено за нашата држава, која очекува да добие датум за отворање на разговорите за пристап во ЕУ и повик за пристапување во НАТО.