Регион
Додик за пресудата за Станишиќ и Симатовиќ: Сила, ароганција и неправда

Дел од Бошњаците и српските политичари во БиХ во врска со пресудата против поранешните водачи на српската Служба за државна безбедност, Јовица Станишиќ и Франко Симатовиќ, го повикаа Белград да ја признае одговорноста за воените злосторства, а други тврдеа дека таа беше повеќе од неправедна.
Членот на Претседателството на Босна и Херцеговина, Денис Беќировиќ, во изјава за новинарите рече дека е јасно оти пресудата со која Станишиќ и Симатовиќ беа осудени по 15 години затвор е последната потврда дека Србија е вмешана во злосторствата извршени од разни српски сили во Босна и Херцеговина за време на војната од 1992 до 1995 година.
Тој најави дека ќе инсистира да се почитуваат пресудите на највисоките судови на ОН, со кои се потврдува геноцидот врз Бошњаците и да се почитува фактот што соседните земји се обиделе да ја поделат БиХ преку војна.
Меѓународната заедница и БиХ, како што рече, сега имаат обврска да побараат ревизија на учебниците по историја со цел во нив да се вградат пресудите на судовите на ОН, како и гонење на сите оние што ги величат воените злосторници и казнувањето на сите преостанати извршители на воени злосторства, кои сè уште не се кривично гонети.
„Сметаме дека и по изрекувањето на денешната пресуда, политичарите од соседните земји, како и некои од Босна и Херцеговина, мора да сфатат дека политиката на агресија и геноцид не се исплати“, рече Беќировиќ.
Претседателот на Република Српска, Милорад Додик, речиси во исто време очекувано се обиде да ја минимизира важноста на казната изречена против Станишиќ и Симатовиќ опишувајќи ја како само уште една во низата антисрпски пресуди.
„Сила, ароганција, неправда“, им рече Додик на новинарите во Бања Лука, каде што беше во друштво на рускиот амбасадор во Босна и Херцеговина, Игор Калабухова, тврдејќи дека МИКТ нема докази против Станишиќ и Симатовиќ.
Во средата жалбената комисија во Хаг им ги зголеми затворските казни на поранешните шефови на Службата за државна безбедност на Србија, Јовица Станишиќ и Френки Симатовиќ, од 12 на 15 години, за кривични дела извршени од српските сили на територијата на поранешна Југославија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Албанска министерка го разреши својот заменик поради непочитување на забраната за пушење

Министерката за внатрешни работи на Албанија, Албана Кочиу, го разреши својот заменик поради непочитување на забраната за пушење во ресторан во САД, објавува „Спутник“.
Таа потврди на социјалните мрежи дека го сторила тоа врз основа на пријавата на албански државјанин кој живее во Њујорк, каде што бил во посета нејзиниот заменик Анди Махила. Како што изјави, тој пушел цигара во ресторанот „што предизвикало немир кај присутните“.
Албана Кочиу е првата жена на чело на полицијата во историјата на Албанија, а во претходната влада беше министерка за здравство.
Фото: принтскрин
Регион
Улиците во Белград оштетени за време на воената парада

Јавното комунално претпријатие Белград (ЈКП) доби наредба денес да излезе на терен и да започне со поправка на патиштата оштетени за време на воената парада „Силата на единството“ во саботата во српскиот главен град.
Членови на кабинетот на српскиот министер за одбрана и Секторот за инфраструктура и стандардни услуги вчера ја посетија рутата на парадата со претставници на Град Белград, Јавното комунално претпријатие Путеви Београда и ЈКП Белград за да ја утврдат штетата предизвикана за време на подготовките и одржувањето на парадата.
На жителите на Белград претходно им беше ветено дека сè ќе биде вратено во првобитната состојба, објавува Нова.рс.
Во саботата во Белград се одржа воена парада насловена како „Силата на единството“, на која учествуваа околу 10.000 војници. На парадата присуствуваа претставници на српскиот државен врв, предводени од претседателот Александар Вучиќ.
фото: принтскрин
Регион
Милановиќ: Луѓето на водечките позиции, особено во Европа, работат многу лошо

„Времињата во кои живееме денес се депресивни и не се добри. Луѓето што се на лидерски позиции, особено во Европа, работат многу лошо и воопшто не се на ниво на задачата. Некои работи се нерешливи, а начинот на кој се решаваат води кон понатамошен антагонизам и евентуално војна“, рече хрватскиот претседател Зоран Милановиќ во неделата вечерта во Њујорк.
Споредувајќи го времето на Студената војна со денешната ситуација, Милановиќ потсети дека тогаш било исклучително тешко и дека се потребни голема концентрација за разни луѓе да седнат и да разговараат за важни прашања.
„Во последните дваесет години сè е нарушено, безбедносната архитектура на светот, особено на западниот свет и на северната хемисфера, повеќе не постои“, рече тој и додаде дека денес живееме во тешки времиња и затоа мора да се погледнеме себеси, нашата работа и нашите интереси и да видиме дека не се истакнуваме премногу во сојузите во кои сме – НАТО и Европската Унија“.
Зборувајќи за ситуацијата во ЕУ и улогата на Хрватска, Милановиќ нагласи: „За жал, работите не функционираат онака како што требаше. Не мислам на привремени и повремени пласмани на пари што доаѓаат во Хрватска за претежно непродуктивни проекти и работи што нема да ја направат Хрватска технолошка сила и нема да ја направат побогата земја. Но, подобро е да го имаме тоа бидејќи кога ќе престане, ќе имаме нови сериозни предизвици. Денес, Хрватска мора да биде лојална на сојузите во кои е членка и мора да ги почитува обврските што ги презела, но исто така никогаш не смееме да дозволиме да бидеме вовлечени во комбинации и авантури што не сме ги кроеле бидејќи тоа не е солидарност. Никој не може да го бара тоа од нас и нема да го добие, според мене“.
Осврнувајќи се на војната во Газа, Милановиќ изјави: „Можеме да се залагаме за признавање на Палестина. Велат дека нема многу да се промени. Па, нема, но некои работи треба да се решат за да се продолжи понатаму. Светот нема да биде подобар и поубав, секогаш ќе биде исполнет со кризи, дефекти и недостатоци и ние мора да се приспособиме на тоа“.
Фото: принтскрин