Регион
„Дојче веле“: Ципрас губи во спорот со Грчката православна црква

Грчката влада сака да се одвои од црквата и да отстрани 9.000 свештеници од платниот список, но прекинувањето на ваквите врски во најрелигиозната земја во Европа може скапо да го чини левичарскиот премиер Алексис Ципрас, пишува денеска „Дојче Веле“ (ДВ).
За време на тешката финансиска криза Ципрас го спречи влошувањето на односите со црквата, бидејќи милиони Грци бараа поддршка и спокој во најмоќната институција во земјата, наведува „Дојче веле“, додавајќи дека Ципрас сега конечно сака да ги пресече врските меѓу државата и православната црква. Меѓутоа, според ДВ, Ципрас сака и удел во богатството на црквата, а истовремено тежнее и тоа да биде чист „развод“.
Во обид да се најде пријателско решение, грчкиот премиер состави план од 15 точки кој го отвора патот за одвојување на црквата и државата. Според овој план, треба да биде отпуштено свештенство од 9.000 луѓе. Тие би биле отстранети од државниот платен список, со што ќе им бидaт одземени големи привилегии, како и правото на пензија, која наместо државата би требало да ја плаќа богатата Грчка православна црква, пишува „Дојче веле“.
На тој начин Грција ќе може да се декларира како религиозно неутрална земја, а свештениците од православието ќе мора да се откажат од титулата проповедници на национална религија. За возврат, државата треба да ги отфрли барањата за големи парцели земјиште, кои црквата одамна ги смета за свои, по што би следел голем заеднички развоен проект кои двете страни би го следеле, при што профитот ќе се дели пола-пола.
Неделава на итен состанок свикан од највисокото тело на Грчката православна црква, 72 од 82 владици застанале на страната на свештенството, одбивајќи да го симнат од државниот платен список.
„Да ги расчистиме работите. Владата има право да го регулира сето она што се однесува на државниот буџет. Значи, ако црквата не се придржува кон нашиот предлог за свештенството, тогаш Владата ќе ги преземе работите во свои раце“, рече портпаролот на грчката владата Димитрис Цанакопулос по средбата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Трагедија во Хрватска: маж почина од убоди на стршлени додека сечел дрва за огрев

Додека сечел дрва во шума, 54-годишен маж бил нападнат од стршлени. И покрај брзата лекарска интервенција, починал на самото место.
Во Хрватска, во шумско подрачје близу Крижевци, 54-годишен маж бил смртно нападнат од стршлени, соопшти полицијата од Копривничко-крижевечката жупанија.
Вчера, додека сечел дрва за огрев, мажот бил нападнат од стршлени, по што му се слошило, јавува Хина.
И покрај тоа што брзо му била укажана лекарска помош, мажот починал на самото место
Регион
Вучиќ: Ќе има војна

Српскиот претседател Александар Вучиќ предупреди за време на отворањето на новата брза железница што ги поврзува Белград и Суботица дека целиот свет се подготвува за војна.
„Ќе биде сè потешко во светот. Ќе биде тешко и тука, од едноставна причина што луѓето мора да знаат дека сите се подготвуваат за војна. А кога се подготвуваат за војна, тоа значи дека ќе има. И ви велам, ќе има“, рече српскиот претседател, пренесува Телеграф.
„Тие не се заинтересирани за разговори и преговори. Тие копаат ровови и чекаат почеток, а знаат дека војната дефинитивно доаѓа. Тие чекаат и се подготвуваат“, додаде тој.
„Мораме да подготвиме некои работи што не сме ги подготвиле“
Тој нагласи дека светот се движи кон војна и дека малкумина можат да ја спречат.
„Би платил сè на светот ако тоа не се случеше. За жал, се плашам дека сум во право. Ќе мора да подготвиме некои работи што не сме ги подготвиле. Нашата армија е подготвена да го одврати секој непријател, но ќе мора да подготвиме и некои други работи“, изјави тој.
„Двапати ги зголемив сите резерви на храна, и за армијата и преку нашите стокови резерви. Сега повторно ќе побарам зголемување“, објави тој.
Во врска со можните проблеми со снабдувањето со гориво поради санкциите на САД врз нафтената индустрија на Србија (НИС), Вучиќ рече дека сè ќе биде решено и дека нема да има купување гориво во кантички.
„Она што ни го оставија, денес се обидуваме да го решиме. Не сме ниту виновни ниту обврзани да се најдеме во проблем и ја плаќаме цената. Но, граѓаните не треба да се грижат. Ќе ги решиме проблемите и нема да има бензин во кантички, но нека знаат дека ако случајно имаме бензин во кантички, единствените што треба да се обвинат се тие“, заклучи тој.
Фото: принтскрин
Регион
На средбата со Путин, Додик ги нарече Германците примитивци од Западот

Поранешниот претседател на Република Српска, Милорад Додик, повторно побара поддршка од рускиот претседател Владимир Путин, а откако двајцата се сретнаа во Сочи синоќа, изјави дека ја добил и дека смета на Москва да продолжи да биде негова силна поддршка.
На снимките прикажани од јавниот сервис на РС (РТРС), можеше да се слушне како Путин го нарекува Додик претседател иако остана без мандатот на прв човек на РС уште во август, откако беше осуден на една година затвор за неспроведување на одлуките на високиот претставник.
Додик пристигна во Сочи на Валдај форумот, каде што Путин беше главен говорник.
„Знам дека ситуацијата во вашата земја и регион не е едноставна, може да се каже дека е комплицирана“, сè уште можеше да се чуе како Путин му вели на Додик пред да престане снимањето.
После тоа, Додик изјави за RTRS дека разговорот со Путин бил „многу отворен и фер“ и дека го повикал да „не го изоставува Балканот“ во разговорите со другите важни партнери, особено САД, и да не дозволи Германците да ја контролираат ситуацијата таму бидејќи, како што рече, тие не се на страната на Србите.
Додик ги нарече Германците, како и претставниците на другите влијателни земји што се занимаваат со Босна и Херцеговина, „исплашени примитивци од Западот“. Затоа, тој се потпира на Русија како можен коректив и верува дека сегашното претседателство на Русија со Советот за безбедност на ООН ќе биде корисно за неговите политички цели.
Фото: ЕПА