Регион
Епидемиолошката слика во Словенија се подобрува, се отвора и туризмот
Епидемиолошката ситуација поврзана со коронавирусот во Словенија се подобрува, така што беше објавено дека набргу сите продавници ќе бидат отворени како дел од зголемената релаксација на рестриктивните мерки за заштита, а во тек се подготовки за почнување на туризмот.
Речиси два месеца по воведувањето на ограничувањата, сите продавници треба да почнат со работа в понеделник.
„Точно, ние не ја запревме целосно епидемијата, но ние сме на вистинскиот пат. По речиси два месеца, ќе се укине значителниот обем на претходни ограничувања на трговијата и туризмот“, рече државниот секретар на словенечкото Министерство за економија, Симон Зајц, на прес-конференција во Љубљана.
Тој истакна дека од понеделник сите продавници може повторно да бидат отворени, вклучително и големите трговски центри. Исто така, на баровите и гостилниците им е дозволено да работат повторно не само на отворените туку и во затворени простори, се отвораат кујните, а се создаваат предуслови за отворање на туристичките објекти.
За сите овие дејности, правилото е да се обезбеди бесконтактен однос со потрошувачите и гостите или минимален контакт при давањето услуги.
Од понеделник можно е повторно да се отворат сместувачките капацитети за туристи, и тоа оние со капацитет за сместување максимум 30 гости, а фитнес-центрите, базените и дискотеките остануваат затворени.
Во врска со прекуграничниот туризам, државниот секретар Симон Зајц изјави на онлајн-семинар со туристички работници дека останува главниот напор на владата да ги отвори своите граници кон оние земји од кои доаѓаат повеќето гости во Словенија.
Откако Европската комисија донесе насоки за отворање на туризмот, Словенија ќе почне дијалог со соседните земји, како Австрија, па дури и со Германија, за чии патници Словенија е достапна по копно и се надеваме дека ќе биде доволно подобрена епидемиолошката слика и во Италија, рече Зајц во обраќањето пред туристичките работници.
Словенија и Хрватска веќе водат интензивен дијалог за условите за отворање на меѓусебната граница за туристички премин. Седумдневната мерка на карантин при враќањето во земјата сè уште е во сила во Словенија, а Хрватска ги укина ваквите мерки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.