Регион
Ердоган до американскиот амбасадор: Како не ти е срам!

Турскиот претседател Реџеп Таип Ердоган одби дополнителни средби со американскиот амбасадор во Анкара.
Причина за тоа е средбата на американскиот амбасадор со еден од кандидатите на опозицијата на изборите на 14 мај, Кемал Киличдароглу.
Турскиот претседателски кандидат Кемал Киличдароглу на иницијатива на американската страна се сретна со шефот на американската дипломатска мисија Џефри Флејк, изјави претходно неговиот советник за „РИА новости“.
„Амбасадорот на Џозеф Бајден се среќава со Кемал?! Срам да ви е, мисли со својата глава. Ти си амбасадор. Вашиот соговорник во оваа земја е претседателот. Како ќе имаш после лице да дојдеш и да побараш средба со претседателот? Мојата врата за него е затворена, тој веќе не може да влезе“, рекол Ердоган, пренесува весникот „Стар“.
Ердоган смета дека американскиот дипломат мора да знае каде припаѓа.
„Нека научи како треба да работи еден амбасадор. Ако не го знае тоа, не може да ми дојде на врата“, нагласи Ердоган, а пренесува „Раша тудеј Балкан“.
Претседателските и парламентарните избори во Турција се закажани за 14 мај. Главен противник на актуелниот претседател Ердоган – единствениот кандидат на Републиканската алијанса, е кандидатот на опозициската Народна алијанса, Кемал Киличдароглу.
Резултатите од анкетите сè уште не го покажале фаворитот на претстојните избори, но експертите забележуваат дека тоа ќе биде најтешката изборна трка за владејачката партија поради разорните земјотреси, кои однесоа животи на повеќе од 50 илјади луѓе, како и поради тешката економска состојба во земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ оди во Русија на прославата на Денот на победата, ќе се сретне со Путин

Српскиот претседател Александар Вучиќ потврди дека на 9 мај ќе отпатува за Москва, каде ќе присуствува на парадата за Денот на победата и ќе се сретне со рускиот претседател Владимир Путин, јавува Анадолија.
При гостувањето на ТВ Пинк, Вучиќ изјави дека „со гордост ќе ја претставува Србија“ на обележувањето на 80-годишнината од крајот на Втората светска војна.
„Пред осум месеци реков дека ќе одам во Москва. Ќе одам во Москва“, рече Вучиќ.
Тој додаде дека најверојатно сам ќе отпатува во руската престолнина и дека поради тоа „ќе ги прими сите удари на светот, и однадвор и од внатре“.
„Не сакам владата на Ѓуро Мацут да ја плати цената. Сакам тој да има можност правилно да соработува со Европската унија и никој да не го обвинува за ништо. Тешко дека армијата ќе оди, бидејќи би била изложена на притисоци и санкции“, рече Вучиќ.
Тој најави дека со рускиот претседател ќе разговара за новиот гасен аранжман, како и за иднината на Нафтената индустрија на Србија (НИС), која е загрозена од американските санкции поради рускиот сопственички удел.
„Мораме да го потпишеме договорот за гас до 30 мај. Мора да го решиме прашањето за нафтената компанија. Мора да разговараме и за сите други теми“, рече Вучиќ.
Тој ја најави и посетата на еврокомесарката за проширување Марта Кос на Белград на крајот на април и изрази надеж дека ќе има можност да разговара со претставници на Републиканската партија и американското раководство пред да замине за Москва.
Регион
Се запали градинка во Загреб – пожaрот избил од клима уредот

Пожар изби попладнево во градинка во Загреб.
Според информациите на хрватските медиуми, причина за избувнување на пожарот е палење на клима уредот.
Првата личност која се обидела да се справи со огнот била жена која го гаснела со ПП апарат. Во меѓувреме сите деца навреме го напуштиле објектот и биле испратени на безбедно.
Пожарот се проширил низ една од просториите, а неговото натамошно ширење го спречиле загрепските пожарникари, кои дојавата за пожарот ја добиле околу 16:55 часот.
Допрва ќе се утврдуваат околностите под кои избил пожарот во градинката.
Регион
Пленковиќ: Моето семејство е длабоко трогнато од фактот што се сретнавме со папата во неговите последни часови

Хрватскиот премиер Андреј Пленковиќ упати сочувство по повод смртта на светиот отец Франциско до кардиналот Кевин Фарел, Камерленго на Светата Римска црква.
„Во името на Владата на Република Хрватска и во мое лично име, изразувам длабоко и искрено сочувство за смртта на Светиот Отец Франциско, чиј животен и духовен пат оставија неизбришлива трага во современиот свет.
Хрватскиот народ, кој чувствува блискост и длабока почит кон папата Франциско од самиот почеток на неговиот понтификат, денес жали за загубата на човекот со вера, едноставност, понизност и сила.
Тој остави длабока трага не само на Католичката црква, туку и на меѓународната заедница. Неговиот постојан повик за солидарност, милост и блискост со исклучените, заборавените, сиромашните и болните инспирираше и поттикна милиони луѓе ширум светот на акција.
Имав особена чест да се сретнам лично со Светиот Отец вчера на Велигден, во Неговите последни часови, заедно со мојата сопруга и нашите три деца. Тоа беше краток, но длабоко трогателен момент – средба исполнета со добрина, насмевки и благослови кои ќе останат трајно врежани во сеќавањето на целото мое семејство како скапоцен подарок во моментот на збогување.
Република Хрватска и хрватските верници остануваат благодарни за сè што беше и направи папата Франциско – за Црквата, за светот и за секој од нас“, напиша Пленковиќ.