Регион
Ердоган ја претстави новата влада: Нови лица, само двајца министри од претходниот кабинет

Новоизбраниот турски претседател Реџеп Тајип Ердоган синоќа именуваше министри во новата влада на Турција. Ердоган одлучи повторно да го назначи Мехмет Шимшек (56) на функцијата министер за финансии во новата влада. Шимшек беше многу ценет меѓу инвеститорите кога претходно беше министер за финансии и вицепремиер помеѓу 2009 и 2018 година.
За министер за надворешни работи е именуван Хакан Фидан (55), на местото на долгогодишниот шеф на дипломатијата Мелвут Чавушоглу. Фидан е на чело на Националната разузнавачка служба од 2010 година, а пред тоа беше советник на Ердоган. Наместо Хулуси Акар за министер за одбрана е именуван Јашар Ѓулер (69), кој е во армијата 49 години, а од 2018 година беше и началник на Генералштабот.
Потпретседател на Турција ќе биде Џевдет Јилмаз (56), кој претходно беше директор на АК Партијата на Ердоган за економски прашања и вицепремиер за економски прашања.
Министер за полиција ќе биде Али Јерликаја, наместо Сулејман Сојлу, кој на таа функција е од 2018 година. Јерликаја (55) беше гувернер на провинциите Газиантеп, Текирдаг, Агри и Ширнак.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Ужас во Јагодина: Внук ги заклал бабата и дедото и избегал

Двојно убиство се случило во близина на Јагодина. Според првичните информации М.М. (39) ги заклал бабата Р.Ж. (76) и дедото Р.М. (79) и избегал. Неофицијално, убиството се случило во селото Богава, општина Деспотовац, а телата на сопружниците биле пронајдени рано утрово во семејната куќа.
Полицијата е на местото на настанот и во тек е истрага, а пристигнати се и обвинителот на Вишото јавно обвинителство во Јагодина.
Регион
Шеќеринска: НАТО нема да дозволи безбедносен вакуум во БиХ

Заменичката на генералниот секретар на НАТО, Радмила Шеќеринска, денес изјави дека алијансата нема да дозволи безбедносен вакуум во Босна и Херцеговина, откако српскиот лидер Милорад Додик објави дека ќе побара од Москва да ја прекине воената мисија ЕУФОР во таа земја.
Шеќеринска изјави дека НАТО е „трајно посветен на суверенитетот и територијалниот интегритет на Босна и Херцеговина“.
Таа додаде дека НАТО нема да дозволи дестабилизација во Босна и Херцеговина, соопшти канцеларијата на бошњачкиот член на колективното претседателство на Босна и Херцеговина, Денис Беќировиќ, кој се сретна со претставничката на НАТО.
„Без оглед на исходот од претстојната седница на Советот за безбедност на ООН, НАТО нема да дозволи безбедносен вакуум во Босна и Херцеговина“, рече Шеќеринска.
Регион
Албанска министерка го разреши својот заменик поради непочитување на забраната за пушење

Министерката за внатрешни работи на Албанија, Албана Кочиу, го разреши својот заменик поради непочитување на забраната за пушење во ресторан во САД, објавува „Спутник“.
Таа потврди на социјалните мрежи дека го сторила тоа врз основа на пријавата на албански државјанин кој живее во Њујорк, каде што бил во посета нејзиниот заменик Анди Махила. Како што изјави, тој пушел цигара во ресторанот „што предизвикало немир кај присутните“.
Албана Кочиу е првата жена на чело на полицијата во историјата на Албанија, а во претходната влада беше министерка за здравство.
Фото: принтскрин