Регион
ЕУ изготви санкции за Косово, Рама ја откажа заедничката седница со Курти

Албанскиот премиер Еди Рама вечерва соопшти дека средбата планирана за утре меѓу владите на Албанија и Косово е откажана, бидејќи нема договор со косовскиот премиер Албин Курти, а Косово оди кон санкции од меѓународната заедница.
„Се наоѓаме во услови на заострување на односите меѓу Косово и целата евроатлантска заедница и оваа средба не може да се одржи во очекуваниот формат, откако разговарав со високиот претставник на ЕУ за надворешна и безбедносна политика, Жосеп Борел“, рече Рама на прес-конференција, пишува „Косово онлајн“, пренесе „Нова.рс“.
Тој изјави дека побарал од Курти утре да се сретнат во потесен формат и да разговараат за ситуацијата која е драматична за односите меѓу Косово и евроатлантската заедница.
„Морам да кажам дека со Курти не се договоривме за промена на форматот, бидејќи тој побара средбата да се одржи според планираното, но тоа не е можно, бидејќи не е време да се организира како ништо да не се случува. Можеби тоа не е конечниот одговор на премиерот“, рече Рама.
Албанскиот премиер објасни дека средбата меѓу двете влади не е можна бидејќи Косово оди кон санкции, а наведе и дека побарал од западните влади засега да не воведуваат санкции кон косовските власти.
„Ние сме 100 отсто против начинот на кој сега дејствува косовската влада“, рече Рама.
За санкциите што ЕУ ги изготви за Косово пишува и „Радио Слободна Европа“.
„Кабинетот на високиот претставник на Европската унија за заедничка надворешна политика и безбедност, Жозеп Борел, подготви предлог за пакет мерки насочени кон косовската влада и премиерот Албин Курти, за кои се смета дека немаат политичка волја да ја преземат неопходни мерки за деескалација на ситуацијата на северот на Косово“, јавува Радио Слободна.Европа.
Како што дознава РСЕ од дипломатски извори, меѓу предложените мерки на кабинетот на Борел е да се блокираат сите покани за настани на високо ниво, како и билатерални посети на Косово, освен оние кои имаат за цел да се реши кризата на северот на земјата.
Исто така, се предлага да се намали присуството на јавни настани поврзани со финансиската соработка на ЕУ, во кои се вклучени членови на косовската влада.
Се предлага и суспендирање на значително финансирање од ЕУ, почнувајќи со суспензија на одобрувањето и спроведувањето на предлогот поднесен од Косово во последниот круг на Инвестицискиот фонд за Западен Балкан во рамките на Спогодбата за стабилизација и асоцијација.
Портпаролот на ЕУ Петер Стано во вторникот потврди дека кабинетот на шефот на европската дипломатија споделил со земјите-членки на ЕУ нацрт мерки што треба да се преземат доколку премиерот Курти не преземе соодветни и итни чекори за деескалација на ситуацијата и намалување на тензиите.
Дипломатски извори од повеќе земји-членки за РСЕ потврдија дека земјите-членки на ЕУ не се обврзани да ги спроведат предложените мерки, но секако се очекува да ги почитуваат.
Некои дипломатски извори посочија дека одредени земји од ЕУ „веќе презеле некои мерки“ кои се слични на некои елементи од пакетот предлози што го подготвил кабинетот на Жозеп Борел.
На 3 јуни, ЕУ побара од косовските власти да дејствуваат на начин кој не ескалира и веднаш да ги прекинат полициските операции во близина на општинските згради на северот на Косово. Беше порачано новоизбраните градоначалници на четирите општини на северот привремено да ги извршуваат работните задачи во други простории надвор од општинските згради, како и во најкраток можен рок да распишат предвремени избори.
ЕУ, исто така, предупреди дека е подготвена да преземе мерки против оние политичари кои одбиваат да преземат мерки за смирување на ситуацијата.
Сепак, тие не добија гаранции од Курти дека сите барања ќе бидат исполнети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Судири меѓу полицијата и демонстрантите во Бугарија, десничарите против воведувањето на еврото

Приврзаниците на крајната десница денеска се судрија со полицијата за време на протестот за поддршка на бугарската валута лев и против воведувањето на еврото, јавува Анадолија.
Протестот се одржа пред Бугарската народна банка (БНБ) и пред претставништвото на Европската комисија во Софија.
Демонстрантите се обидоа да упаднат во зградата на претставништвото на Европската унија, користејќи црвена боја, петарди и молотови коктели. Околу 10 полицајци се повредени, а шест лица се уапсени.
Демонстрантите потоа ја запалија вратата од зградата на претставништвото на Европската комисија во Бугарија, јави репортерот на БГНЕС.
Бугарските парламентарци минатата година усвоија нацрт-закон за преминување на еврото како национална валута од почетокот на 2025 година. Сепак, влезот во еврозоната беше одложен поради високата инфлација и други економски фактори.
Предлог-законот ги регулира принципите, рамката и процедурите за воведување на еврото во Бугарија и ги утврдува правилата и преоден период за да им се даде време на граѓаните да се прилагодат на новата валута.
Регион
Возач во БиХ наполнил гориво и побегнал без да плати

На бензинска пумпа во БИХ, непознато лице наполнило гориво и си заминало без да плати.
Покрената е истрага за кражба на гориво, веднаш реагирала полицијата, пишуваат тамошните медиуми.
Инцидентот го пријавил во полиција, вработен на бензинската пумпа.
По пријавата патролата веднаш излегла на терен и започнала истрага.
Регион
Вучиќ: Србија e една од најбезбедните земји во Европа

Претседателот Александар Вучиќ изјави дека Белград и Србија се меѓу најбезбедните градови или земји во Европа.
„Значи, државата и државните институции, и покрај валканата пропаганда на секојдневно ширење на несигурност, страв и се, си ја вршат својата работа на најчист можен начин и се погрижија денес и Белград како град и Србија како држава да бидат една од најбезбедните земји во Европа. Една од трите или четирите најбезбедни земји во Европа“, рече Вучиќ.
Тој наведе дека во 2001 година имало 3.140 разбојништва, а лани 496, дека во 2001 година имало 215 убиства, а во 2024 година 50 убиства и дека бројот на силувања е 3,4 пати помал од тогаш. Вучиќ додаде дека бројот на убиства постојано се намалува.
„Тоа значи дека воспоставивме добра соработка меѓу разузнавачко-безбедносниот сектор во целина и обезбедивме дa сме една од најбезбедните земји во Европа. Ова се добри резултати“, изјави Вучиќ.