Регион
ЕУ: На Западен Балкан местото му е во Унијата, но нема фиксен датум за влез

Лидерите на ЕУ денеска им повторија на земјите од Западен Балкан дека местото им е во Унијата и дека ја разбираат фрустрацијата од бавниот процес за проширување, но повторно го изоставија временскиот рок за нивно влегување во блокот.
„ЕУ ја потврдува својата недвосмислена поддршка за европската перспектива на Западен Балкан“, се вели во декларацијата.
Исто така, во неа се споменува „посветеност кон процесот на проширување“, но нема временска рамка за тоа кога овие земји би влегле во ЕУ.
Словенија, која претседава со Советот на ЕУ, сакаше декларацијата да ја вклучи во 2030 година како краен рок за зачленување на Западен Балкан во ЕУ, но иницијативата не била прифатена како реална опција бидејќи, според европските лидери, земјите од Југоисточна Европа не напредуваат со исто темпо.
„Не поддржав да им се даде фиксен датум на земјите од Западен Балкан за нивно пристапување во Европската Унија“, рече германската канцеларка Ангела Меркел на самитот ЕУ – Западен Балкан во Брдо кај Крањ.
„Навистина не верувам во одредување датуми, но верувам во исполнување на нашите ветувања. Кога ќе се исполнат условите, пристапувањето може да се реализира“, им рече Меркел на новинарите по завршувањето на самитот, а пренесе агенцијата „Ројтерс“.
Некои членки на ЕУ, вклучувајќи ги Хрватска, Словенија и Австрија, предупредиле дека поради недоволната посветеност на ЕУ, Југоисточна Европа може да потпадне под влијание на Русија и Кина, а другата страна, предводена од Франција, во принцип е за проширување на Унијата, но без амбиција процесот да се забрза.
Шефицата на Европската комисија, Урсула фон дер Лаен, повтори дека ЕУ и Западен Балкан имаат иста историја, интереси и вредности, а како што рече, се надева и судбина.
„ЕУ не е комплетна без Западен Балкан. (…) Без сомнение, нашата цел е проширување“, истакна таа.
Исто така, порача дека ја разбира фрустрацијата на земјите поради бавниот напредок кон членство во ЕУ и дека отсуството на одлука за отворање преговори со Северна Македонија и Албанија го поткопува кредибилитетот на ЕУ.
Претседателот на Европскиот совет, Шарл Мишел, изјави дека присуството на ЕУ мора да биде поопипливо и видливо на Балканот и дека ЕУ расправа за нејзиниот капацитет да прими нови членки.
ЕУ најави помош од речиси 30 милијарди евра за Западен Балкан, дел за економско закрепнување, а дел за инвестиции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Србија им препорачува на граѓаните да не патуваат во Хрватска на почетокот на август

Министерството за надворешни работи на Србија им препорача на граѓаните на Србија да се воздржат од патување во Хрватска во периодот од 1 до 10 август.
Во соопштението Министерството им советува на граѓаните што ќе бидат на територијата на Хрватска во тој период да избегнуваат собири и други јавни собири, кои може да носат ризик од инцидентни ситуации.
Во тој период – на 5 август, Хрватска ја одбележува годишнината од воено-полициската операција „Бура“. Прославата се одржува на денот кога завршила акцијата. Во Србија годишнината од „Бура“ е на 4 август, денот кога почнала, како ден на сеќавање на жртвите и протераните Срби.
Регион
(Видео) Турист падна во базен откога му се откопча падобранот за време на парасејлинг во Црна Гора

Турист доживеа опасен инцидент за време на парасејлинг во Бечичи, откако поради силен ветер му се откопча падобранот.
Снимка од инцидентот кој можел да заврши трагично беше објавена на популарната страница Подгорички времеплов, со опис:
„Туристот имал многу среќа што поминал без повреди. Имено, станува збор за странски државјанин кој во Бечичи останал неповреден кога поради силен ветер се откопчал падобранот што го влечел глисер. Туристот паднал во базен. Станува збор за адреналинскиот спорт парасејлинг.“
View this post on Instagram
Полицијата, според досегашните информации, не добила пријава за овој инцидент.
Регион
Пожари беснеат на Балканот: илјадници се евакуирани, гори и во близина на популарна туристичка дестинација во Албанија

Пожарникарите денес се обидуваат да изгаснат шумски пожари во три одделни покраини во Турција, Грција, во близина на туристичка дестинација во Албанија, Бугарија, Македонија по неколкудневните интензивни горештини.
Чад се издигаше над планинската црноморска покраина Карабук, околу 200 километри северно од главниот град Анкара, а пожарот, кој беснее веќе шести ден, принуди евакуација на повеќе од десетина села и опустоши делови од шумата. Тројца пожарникари загинаа вчера во северозападната покраина Бурса, објави денес турското Министерство за шумарство.
Пожарникарите денес се борат со два одделни пожари, по евакуацијата на повеќе од 3.600 луѓе од населбите во јужните покраини Мерсин и Анталија. Турција беше место на десетици шумски пожари поради екстремна топлина во последните недели, а минатата недела 10 пожарникари загинаа борејќи се со пожар во централната покраина Ескишехир.
Топлите и суви лета се вообичаени во медитеранскиот регион, но сè поинтензивните топлотни бранови придонесоа за разорни шумски пожари во последните години. Во Грција, десетици пожарникари се борат со пожар што избувна во подножјето на планината Химет во Атина, во близина на универзитетски кампус во густо населено предградие. Најмалку 18 хеликоптери и авиони дејствуваат во областа.
Во Албанија, пожарникарите, со помош на армијата, се обидоа да го стават шумскиот пожар под контрола пред да стигне до крајбрежниот град Саранда и други туристички места на југот од земјата на јонскиот брег. Локалната полиција објави дека во последните три дена уапсила 13 лица за намерно палење.
Бугарија распореди противпожарни авиони за да им помогне на копнените сили во борбата против голем шумски пожар во пошумен југозападен регион, додека во Грција неколку села беа евакуирани, а пет лица беа повредени во одделни пожари за време на викендот, кои беа поттикнати од висока топлина и силни ветрови.
Додека Грција денес се соочува со својот трет топлотен бран, дождот во Србија им помогна на пожарникарите да стават под контрола повеќе од 100 шумски пожари.
Во моментов низ Македонија беснеат 15 пожари на отворено, од кои девет сè уште се активни, а шест се ставени под контрола. Најсериозни се огнените линии кај Прилеп, Василево, Кавадарци, Македонски Брод и Берово, каде гори шума, грмушки и ниска вегетација. На некои места ситуацијата е дополнително отежната поради детонации и непристапен терен. Од друга страна, пожарите кај Штип, Карбинци, Кичево и околината на Куманово се стабилизирани и под надзор. Властите повикуваат на внимателност и воздржување од активности што можат да предизвикаат нови пожари.