Регион
„Жешко е како во пеколот, како во рерна“: јужна Европа и Балканот погодени од топлотни бранови
Италијанското Министерство за здравство во вторникот стави 12 града под предупредување од големите горештини бидејќи бран топол воздух од Африка ги зафати јужна Европа и Балканот. Температурите се искачија над 40 Целзиусови степени, а најлошото допрва доаѓа, пренесуваат медиумите во регионот.
Хрватска ја објави највисоката температура на Јадранското Море досега, а термометарот достигна речиси 30 Целзиусови степени во Дубровник, најпопуларното туристичко место во земјата.
Во Србија државното претпријатие за електрична енергија пријави рекордна потрошувачка во вторникот поради употребата на клима-уредите.
Општинските власти во неколку градови во јужна Европа и на Балканот презедоа мерки за грижа за старите лица, а тимовите за цивилна заштита повикаа на помош од авиони, кои фрлаат вода, како што се „канадерите“, за да ги изгаснат пожарите што беснеат во јужна Италија и Северна Македонија.
„Жешко е како во пеколот. Овие вентилатори малку помагаат, но навистина е жешко“, вели Кармен Дијаз, туристка од Мадрид, која се обидувала да се разлади со вентилатор за време на ручекот во Рим.
Во Грција општините направија климатизирани простори достапни за јавноста. Одредени форми на работа на отворено, како што се физичката работа, испораката и градежништвото, се забранети во најтоплиот период од денот кога температурите достигнуваат над 40 Целзиусови степени.
В среда и в четврток се очекува температурите да достигнат до 42 степена во повеќе земји.
Шпанската национална метеоролошка служба објави дека термометрите може да достигнат до 44 Целзиусови степени во јужниот слив на реката Гвадалкивир во наредните денови.
За борба против жештината, римската зоолошка градина планира да спроведе план за ладење на одредени животни со сладолед подоцна оваа недела кога се очекува температурите да достигнат 38 степени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вархеји: Добра средба со Вучиќ за спроведување на следните чекори, планот за раст во полн ек
Европскиот комесар за соседска политика и проширување Оливер Вархеји денеска изјави дека имал добра средба со српскиот претседател Александар Вучиќ во Брисел за да ги подготви следните чекори во време кога се започнуваат „амбициозните реформи засновани на реформската агенда на Србија“.
Вархеји на социјалната мрежа Х оцени дека новиот План за раст на Западен Балкан вреден шест милијарди евра е во полн ек.
„На маргините на состанокот на лидерите од Западен Балкан, имав добар состанок со претседателот Александар Вучиќ за да ги подготвам следните чекори додека започнуваме амбициозни реформи врз основа на реформската агенда на Србија. Новиот план за раст од 6 милијарди евра е веќе во полн ек. Повеќе реформи, повеќе поддршка!“, рече Вархеји.
Регион
Експлозија во Нови Сад: едно лице повредено
Едно лице е повредено денеска кога се случила експлозија во Нови Сад.
Дошло до експлозија на плинска боца.
Повредениот веднаш бил пренесен на Ургентниот центар, но за сега не се знае за сериозноста на повредите. Истрагата е во тек, а по задолжителниот увид, се очекува на самото место да излезат екипи на компанијата „Нови Сад гас“.
Регион
Три девојчиња претепале врсничка пред училиште во Панчево
На социјалните мрежи се појави снимка од тепачка што се случи синоќа во Панчево, а според првите информации, се работи за тинејџерки, инаку малолетни.
На видеото се гледа како три девојчиња ги тепаат своите врсници.
Околу нив има голем број луѓе, но никој не се обидува да ги спречи во насилството. Во еден момент претепаното девојче паѓа на бетонот, но трите врснички продолжуваат да ја удираат по главата по што некој од присутните ги раздвојува.
Од полициската управа во Панчево велат дека веднаш ги презеле сите дејства за идентификување на учесниците и утврдување на околностите, но дека самиот случај не бил пријавен во полиција од ниту еден од учесниците. Исто така, потенцираа дека по сознанијата за актерите на инцидентот, ќе се консултираат надлежното обвинителство и судот.