Регион
Загадувањето на воздухот во Србија алармантно

Воздухот во повеќе градови во Србија во изминатите денови е енормно загаден и покрај топлото време, пренесуваат српските медиуми. Лекарите апелираат луѓето со распираторни и кардиоваскуларни проблеми да не излегуваат од дома од 8 до 18 часот.
Имајќи предвид дека грејната сезона сè уште не е почната и дека домаќинствата и топланите се едни од најголемите загадувачи во Србија, се поставува прашањето каков воздух ќе дишат граѓаните кога зимата навистина ќе почне, пишува српскиот весник „Блиц“.
Во Ваљево, кој е еден од најзагадените српски градови, без оглед на топлите денови, веќе сега тешко се дише, а мерењето на квалитетот на воздухот во изминатите седум дена покажало дека воздухот е загаден на ниво од 4. категорија.
„Ова ги загрозува пациентите со распираторни и кардиваскуларни болести. Кога во текот на зимата загадувањето ќе биде уште повисоко, ќе бидат загрозени и останатите ранливи категории, како што се децата и трудниците. Поради тоа, во периодот кога загадувањето е на највисоко ниво, а тоа е од 8 до 18 часот, загрозените треба да избегнуваат да излегуваат надвор, да ја намалат физичката активност и да поминуваат повеќе време во домашни услови“, рекол онкологот Зоран Живковиќ, претседател на врањскиот Совет за здравје за „Блиц“.
Тој потсетил дека во Србија поради загадувањето на воздухот годишно прерано умираат 5.400 луѓе.
Живковиќ појаснил дека при вдишувањето на ПМ10-честичките, кои го скратуваат здивот, срцето се напрега за да го компензира намаленото внесување на кислород и притоа се исцрпува. На тој начин, покрај болести на белите дробови, честичките доведуваат и до срцев и мозочен удар и може да се сметаат за причинители на изненадна смрт од срцев удар.
Во средата е регистрирано рекордно загадување во Србија – 223 ПМ10-честички на метар кубен измерени на мерната станица во Панчево во три часот наутро. Во 7 часот, пак, во Нов Белград, биле измерени 167 ПМ10-честички на метар кубен.
На веб-страницата Air visual, која се занимава со мерење на загадувањето во цел свет, Белград пред два дена бил означен како четврти град со најзагаден воздух во светот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Младо момче пропадна низ отвор на лифт во Сараево

На Природно-математичкиот факултет во Сараево денеска млад човек паднал низ отворот од лифтот, пренесува Radiosarajevo.ba.
„Денеска во 13 часот и 44 минути пријавена е оваа несреќа. Млад човек се обидел да излезе од лифтот и паднал низ отворот“, изјавиле од противпожарната бригада на Сараево.
Пожарникарите за две до три минути биле на местото на несреќата и го ослободиле, а момчето било при свест.
Откако пожарникарите го извлекле младиот човек, брзата помош дошла да го пренесе во болница.
Не е познато според написите, дали младиот човек е потешко повреден.
Регион
Лирман дојде скришум да се сретне со своите пулени во подрумот: Додик ја прогласи германската министерка за непожелна

Германската министерка за Европа и климатски прашања Ана Лирман требаше да одржи средба во Бања Лука со претставници на Партијата за демократски напредок (ПДП), но средбата беше откажана во последен момент, пишува „Klix.ba“.
Според потпретседателот на ПДП, Игор Црнадак, причина за откажувањето на состанокот е одлуката на Владата на Република Српска да ја прогласи министерката за персона нон грата, поради што таа ја напушта земјата.
Претседателот на Република Српска, Милорад Додик, се огласи по повод средбата и ја повика полицијата да ја спроведе министерката. „Како и секој непожелен посетител, германската министерка Ана Лирман дојде во Бања Лука скришум да се сретне со своите пулени во подрумот“, рече Додик.
Како што пишува „Клик“, тој додаде дека очекува полицијата на Република Српска наскоро да ја испрати министерката. Додик, кој веќе е санкциониран од Германија и има забрана за влез во земјата, ја критикуваше и Германија, прашувајќи „во што западна некогаш моќната Германија“.
Регион
Вучиќ: Србија мора да биде подготвена за безбедносни предизвици

Српскиот претседател Александар Вучиќ вечерва изјави дека Србија склучува договори со Унгарија и ја зајакнува својата армија, бидејќи мора да биде подготвена за безбедносни предизвици.
Во Софија, Вучиќ за РТС изјави дека нема да бара објаснување за безбедносниот договор потпишан од Албанија, Косово и Хрватска, бидејќи, како што додаде, го поставил во разговорите со генералниот секретар на Европската унија Марк Руте и лидерите.
„Покрај тоа што кревавме раменици и велиме ете се случи, не можев да очекувам или да добијам друг одговор. Реагиравме соодветно. Сојузите се важни, но важно е да ја зајакнеме нашата позиција. Србија ќе продолжи да работи на зајакнување на својата армија, сите нејзини безбедносни капацитети, за да можеме да гарантираме мир на секое дете во нашата земја, на секој човек, на секој што живее во нашата земја.
Како што додаде, тоа е една од причините поради која Србија се повеќе се движи кон договор во таа област со Унгарија.
Вучиќ посочува дека ова не е начин да се креираат политички контрамерки, туку полека, длабински и суштински да се обиде да даде одговор на безбедносните предизвици.
Како што истакна, голем предизвик за Србија е се што се случува околу Република Српска.
„Она што ме загрижува е немањето желба за компромис. Разговарав со сите насекаде, од Брисел, вчера со Англичаните, со сите. Ја гледам нивната многу, многу силна посветеност“.
Голем предизвик за Србија, како што рече Вучиќ, е приказната за Бриселскиот договор.
Вучиќ наведува дека никому не му е грижа што Приштина не го почитува Договорот за регионална полиција, Договорот за правда и обвинителството, дека не се почитуваат шест од 15-те точки од Бриселскиот договор за формирање Заедница на српски општини, пренесува Танјуг.
„Формално ќе кажат дека им е грижа, но во суштина не им е грижа. Тоа е нивното дете што ќе го штитат, а Србија во исто време ја знае својата позиција, ние знаеме дека сме мали во споредба со големите, знаеме дека сме против нив во однос на почитувањето на меѓународното јавно право, нормите на Обединетите нации. Мораме да бидеме внимателни, но доволно цврсти, доволно храбри за да ја заштитиме нашата позиција порача Вучиќ, пренесува Танјуг.