Регион
Илјадници мигранти на Лезбос трета ноќ под отворено небо

Илјадници мигранти и бегалци кои останаа без покрив над главата поради пожар во прифатниот камп на островот Лезбос трета ноќ поминаа под отворено небо.
Обидувајќи се да се заштитат од топлoто време преку ден и од значително пониските температури во текот на ноќта, некои од нив имале на располагање шатори и вреќи за спиење, додека други можеле да користат само ќебиња или трски што ги исекле за таа намена.
Грчките власти соопштија дека пожарот, кој избувна во преполниот камп две последователни ноќи, всушност го подметнале некои негови жители кои биле бесни поради мерките за изолација, воведени откако 35 лица сместени во тој објект биле позитивни на коронавирус.
Максималниот капацитет за сместување на кампот е околу 2.800 места, но бројот на неговите жители надминал 12.500.
Првиот пожар, што избувна во вторникот вечерта, остави без покрив над главата околу 3.500 мигранти, на кои грчките власти итно им дадоа помош и потребно сместување, но следната вечер изгоре остатокот од кампот, па затоа голем број мигранти останаа без сместување.
Портпаролот на грчката влада Стелиос Пекас пред два дена објави дека, освен 406 деца-мигранти и тинејџери кои пристигнале во Лезбос без придружба, никој од жителите на уништениот камп нема да може да го напушти островот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Ученик од седмо одделение приведен во Србија: донел нож и список за отстрел во училиште

Ученик од основното училиште „Јован Стерија Поповиќ“ во Нов Белград е однесен во полиција на разговор, објави српски Блиц.
Се сомнева дека вчера во училиштето донел список за убивање и нож.
Момчето е испрашувано од полицијата по наредба на Вишото јавно обвинителство во Белград, а се вели дека станува збор за ученик во седмо одделение.
Сите околности на инцидентот сè уште се утврдуваат, а деталите не се познати.
Регион
Млад човек уапсен во Далмација за силување и детска порнографија

Окружното државно обвинителство во Сплит отвори истрага против 25-годишен хрватски државјанин под сомнение за силување и повеќе кривични дела на детска порнографија.
Според соопштението од државното обвинителство, мажот е осомничен дека ги сторил овие кривични дела во 2024 и почетокот на 2025 година во Сплитско-далматинската жупанија. Тој е обвинет за силување согласно член 153 став 1 од Кривичниот законик и повеќе кривични дела детска порнографија согласно член 163 став 1 и 2.
По сослушувањето на осомничениот, Окружното државно обвинителство му предложи на истражниот судија да му биде одреден притвор поради можноста за влијание врз сведоците и ризикот од повторување на кривичното дело. Судијата го прифати предлогот и му одреди притвор врз основа на законски основи согласно член 123 од Законот за кривична постапка.
Регион
Вучиќ е во посета на Украина

Српскиот претседател Александар Вучиќ денес ќе ја посети Украина, што е прва посета на лидерот на земјата која одржува срдечни односи со Москва од почетокот на војната во февруари 2022 година, објави претседателството во соопштение.
„Претседателот на Република Србија ќе ја посети Украина еден ден во среда, 11 јуни, каде што ќе учествува на самитот Украина-Југоисточна Европа“, објави српското претседателство.
Српскиот шеф на државата не ја посетил Украина од почетокот на руската инвазија во февруари 2022 година.
Посетата доаѓа неколку дена откако Русија ги обвини српските компании за оружје дека се обидуваат да „забијат нож во грб“ на Москва со продажба на муниција на Украина.
Присуството на српска муниција во Украина никогаш не е јавно признато или целосно негирано. Неколку недели претходно, Александар Вучиќ, кој балансира помеѓу својот историски сојузник Русија и својата желба да се приклучи на Европската Унија, беше на Црвениот плоштад во Москва за да ја прослави 80-годишнината од поразот на нацистичка Германија.