Регион
„Како е можно дете да направи таков план“ – половина година од масакрот во Врачар

Пред точно шест месеци, Коста К.(14), ученик во седмо одделение, вооружен со два пиштоли на татко му, уби девет ученици и обезбедувањето во ОУ „Владислав Рибникар“ во Врачар.
По невиденото злосторство на овие простори, Коста К. сам повикал полиција, го ставил оружјето на земја и чекал да го уапсат, а потоа кога полицијата го прашала зошто го направил тоа, тој само рекол: „Јас сум психопат“, пишува српскиот весник „Информер“.
Коста во времето кога го изврши масакрот имаше само 13 години, а според српскиот кривичен законик, на таа возраст, тој не одговара за делото што го направил. Веднаш по апсењето беше однесен на Клиниката за неврологија и невропсихијатрија за деца и младинци, каде најверојатно ќе остане до полнолетство, а потоа ќе биде префрлен во друга затворена установа, бидејќи според тврдењата на сите вештаци, тој е опасност за општеството и никогаш нема да биде слободен.
Од тој 3 мај се’ се смени, а шокантни беа деталите кои протекоа во јавноста за подготовката на момчето убиец за злосторството, неговото правење список на пријатели што треба да ги убие.
Како е можно детето да направи таков план?!Прашање на кое веројатно никогаш јавноста нема да добие одговор.
Второто прашање што се поставува во српската јавност е: „Што направија неговите родители?!“ Таткото и мајката на најмладиот масовен убиец во светот се инаку успешни и професионално остварени луѓе.
Таткото Владимир, кој веднаш по злосторството беше уапсен бидејќи е сопственик на оружјето со кое Коста ги изврши убиствата, е почитуван лекар, додека мајката Миљана е универзитетски професор. Богати родители кои можеле да му дозволат на своето дете речиси се, но дали е тоа навистина така?
„Информер“ се присетува дека најчудно е што татко му го однел Коста на стрелиште и го научил да пука, дури ангажирал и инструктор кој го научил да биде добар стрелец и се гордеел со него.
Во меѓувреме, Вишото обвинителство поднесе обвинителен акт против неговиот татко Владимир, бидејќи не го обезбедил соодветно оружјето, но и против Миљана, бидејќи на оружјето беше пронајдена нејзината ДНК. Во обвинението се вклучени и претседателот на стрелачкиот клуб и инструкторот за стрелање кои му овозможиле на Коста да пука од огнено оружје и на тој начин да се подготви за делото што го направил.
Исто така, во Вишиот суд во Белград беа покренати две правни постапки од страна на родителите, браќата и сестрите на жртвите на Коста за надомест на нематеријална штета и душевна болка што ја претрпеле поради овој негов чин.
Во двата случаи се одржаа прелиминарни рочишта, а судењето ќе продолжи во декември.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Српските полицајците сакаа да ги растераат граѓаните, но самите паднаа на колена

Видео кое кружи на социјалните мрежи покажува необична ситуација во која полициски службеници сами се најдоа погодени од солзавецот што го фрлиле кон граѓаните.
И покрај тоа што беа во целосна опрема, со маски и шлемови, не успеале да се заштитат од чадот кој ветерот го вратил кон нив.
Во еден момент, неколкумина полицајци ги симнале маските и клекнале на земја, очигледно со потешкотии да продолжат да издржат во облакот од солзавец.
Според коментарите на очевидци и граѓани кои ја следеле ситуацијата, станува збор за иронична сцена во која природата им го „вратила ударот“ на службениците, поради што и видеото брзо се прошири на интернет и предизвика бурни реакции.
Plaćenici gubarski se od sopstvenog suzavca guše, čak su neki skinuli opremu i otišli. ‼️‼️‼️‼️ pic.twitter.com/LmEqDPWbXD
— o0o0o0o (@KoronVirus) September 5, 2025
Регион
Три земјотреси во Србија за час и половина – „Се затресе добро“

За само час и половина, Србија беше погодена од 3 земјотреси, од кои најсилниот беше 4,4 степени според Рихтеровата скала.
Денес, во 14:43 часот, земјотрес со магнитуда од 4,2 степени според Рихтеровата скала беше регистриран во областа Голија, околу 20 километри источно од Сјеница. Според прелиминарните податоци, теоретскиот интензитет на епицентарот беше проценет на шестиот степен според Меркалиевата скала. Околу дваесет минути подоцна, следеше уште еден, послаб земјотрес со магнитуда од 2 степени, а помалку од час и половина по првиот, на истото место беше регистриран и трет земјотрес со магнитуда од 1,9 степени, пренесуваат медиумите во соседството.
Земјотресот беше почувствуван во Нови Пазар, Трстеник, Чачак, Краљево, Ужице, Крагуевац, Јагодина, Алексинац, Аранѓеловац, Ниш, Панчево, па дури и во Белград и во Скопско, според написите.
Првиот земјотрес е регистриран во планинскиот регион Голија, на половина пат помеѓу Рашка и Сјеница, поточно околу селото Црчево.
Републичкиот сеизмолошки завод објави дека во 14:43 часот е регистриран земјотрес со јачина од 4,4 степени според Рихтеровата скала на длабочина од 3 километри во регионот Сјеница.
„Добро се затресе“, „Ормарите се тресеа“, „Се почувствува мало нишање на креветот“, пишуваат граѓани кои го почувствувале земјотресот.
Тие исто така известуваат дека земјотресот е почувствуван во Трстеник, Чачак, Краљево, Ужице, Крагуевац, Љиг, Јагодина, Алексинац, Аранѓеловац, Ниш, Панчево, па дури и во Белград и Скопје.
Граѓаните на Пријепоље и Нова Варош, исто така, го почувствуваа потресот, но засега нема информации за материјална штета или повредени. Експертите истакнуваат дека земјотресите со овој интензитет најчесто можат да предизвикаат помали штети на зградите во епицентралното подрачје, но тие не се невообичаени за овој регион.
„Се тресеше добро, навистина бевме исплашени бидејќи сè се тресеше за секунда“, изјави жител на Сјеница за агенцијата РИНА, опишувајќи го моментот на земјотресот.
Надлежните служби продолжуваат да ја следат ситуацијата и апелираат до граѓаните да останат смирени. Во случај на посилни последователни потреси, се препорачува сите да се придржуваат до основните упатства за однесување за време на земјотрес – да бараат засолниште под цврст мебел, да се држат подалеку од стаклени површини и да избегнуваат користење лифтови.
Регион
Бугарија ја менува приказната за авионот на Урсула фон дер Лајен

Целосна конфузија владееше вчера кога бугарската влада неколкупати го промени својот официјален став за наводното руско блокирање на ГПС-сигналот на авионот на претседателката на Европската комисија, Урсула фон дер Лајен. Поради контрадикторни изјави, службениците во Брисел беа оставени во целосна неизвесност за тоа што навистина се случило, пишува „Политико“.
Сè почна вчера наутро кога бугарскиот премиер Росен Желјасков изјави во парламентот дека авионот на претседателката на Комисијата не бил блокиран, туку само доживеал делумно прекинување на сигналот, што е вообичаено во густо населените подрачја.
Неговите зборови ги потврди вицепремиерот и министер за транспорт Гроздан Караџов, кој исто така негира постоење на докази за мешање.
„Според емпириските податоци, според радиодетекцијата, евиденцијата на нашите агенции, цивилни и воени, не постои ниту еден факт што би го поткрепил тврдењето за пречки на ГПС-сигналот што влијаел на авионот“, изјави Караџов за бугарската телевизија bTV.
Сепак, само неколку часа подоцна дојде до нов пресврт. Премиерот Желјасков свика вонредна прес-конференција, на која ја врати официјалната верзија на приказната за можноста за електронско војување поврзано со Украина.
„Имаше конфузија на информациите со прашања, факти и околности, што беа толкувани на начин што имаше цел да им наштети на бугарските институции“, рече премиерот.
Тој нагласи дека фактот што копнените инструменти не ги регистрирале пречките не ја исклучува можноста дека се откриени од уреди на самиот авион.
„Во овој поглед ѝ наложив на Управата за цивилно воздухопловство да стапи во контакт со авиокомпанијата што го управува летот за да спроведе дополнителни проверки на инструментите и на компјутерите на авионот“, додаде тој.
„Фајненшл тајмс“ во понеделникот објави дека авион на Европската комисија за време на турнеја во „земјите на фронтот“ наводно го изгубил својот ГПС-сигнал додека се приближувал кон аеродромот во Пловдив, Бугарија. Новинар во авионот објави дека авионот слетал користејќи хартиени мапи и кружел околу аеродромот еден час, што Брисел веднаш ѝ го припиша на Русија како „очигледно мешање“.
Инцидентот одекна во цела Европа и предизвика реакции од американскиот претседател Доналд Трамп, генералниот секретар на НАТО, Марк Руте, и други функционери. Сепак, во последните денови аналитичарите почнаа да ги доведуваат во прашање деталите од инцидентот.
Податоците за следење на летот наводно покажуваат дека ГПС-сигналот никогаш не бил целосно изгубен, а доцнењето на слетувањето било само девет минути. Јавните записи исто така сугерираат дека истиот авион доживеал ГПС-блокирање еден ден претходно над Балтикот, но не и над Бугарија.
Портпаролката на Европската комисија, Аријана Подеста, вчера изјави дека бугарските власти ја информирале Комисијата за мешањето осврнувајќи се на нивната изјава од понеделникот.
„Бев многу јасна во мојата изјава дека немаме информации во оваа смисла. Но, ние сме исклучително свесни дека ова е проблем што… постојано се случува на нашето небо и во нашите мориња од почетокот на војната и затоа е важно да се справиме со него заедно со нашите земји членки“, изјави таа за новинарите во Брисел.
Фото: ЕПА