Регион
(Видео) Карпи паѓаа во морето – рибар го сними моментот на земјотресот во Хрватска
![](https://makfax.com.mk/wp-content/uploads/2023/02/zemjotres-hrvatska.jpg)
Денеска во утринските часови посилен земјотрес со јачина од 4,8 степени според Рихтеровата скала го погоди хрватскиот остров Крк. Епицентарот на земјотресот бил во Башчанска Драга, за среќа нема жртви, но има информации за материјална штета.
На една од снимките која ја направил рибар, а ја објави „24 часа“ се гледа како карпи паѓаат во морето за време на потресот.
Паднаа оџаци на постари куќи, во некои куќи се појавија пукнатини, имаше и пожари…
-Денеска, 16 февруари 2023 година, во 10 часот и 47 минути, сеизмографи на Сеизмолошката служба на Република Хрватска забележаа силен земјотрес со епицентар кај Башчанска Драга на Крк. Магнитудата на земјотресот била 4,8 степени според Рихтеровата скала, а интензитетот во епицентарот е проценет на VI степен од ЕМС скалата. Земјотресот е почувствуван на целото хрватско крајбрежје – соопшти Сеизмолошката служба.
Корисниците на EMSC известија дека потресот се почувствувал и во Сплит.
Порталот Нови лист објави снимка од надзорна камера од стан во областа Суха Пунта.
– Во моментот на земјотресот бев на работа, а тие неколку секунди добро не потресоа. Видеото од станот го снимила безбедносна камера. Засега се чини дека нема штета – изјави за Нови лист сопственикот на станот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Регион
Голема воена вежба во Србија: 1.500 војници, беспилотни летала, оклопни транспортери, хеликоптери…
![](https://makfax.com.mk/wp-content/uploads/2024/07/srpska-vojska-2.jpg)
Српската армија ја изведува заедничката тактичка вежба „Огнен удар 2024“ на полигонот „Пасуљанска ливада“.
Се вежба извршување на борбени дејствија со употреба на беспилотни летала за извидување и огнена поддршка, соопшти српското Министерство за одбрана.
Општите цели на вежбата се подобрување на способноста за собирање и дистрибуција на разузнавачки податоци, зголемување на ефикасноста на огнената поддршка на современото бојно поле и проверка на функционалноста на организацијата и единиците на армијата.
Во вежбата учествуваат единици на копнената армија, воздухопловство, противвоздушна одбрана, сили за специјални операции и контраелектронско војување и експерти од Воено-техничкиот институт, јавува Нова.рс.
Беа ангажирани околу 1.500 војници и повеќе од 300 борбени средства, вклучително и оние кои се во процес на модернизација, развој и тестирање.
Вежбата ќе трае две недели. Врз основа на вежбата ќе се утврдат ограничувањата и потребите за развој на нови тактички принципи, ќе се проверува можноста за заштита и одбрана од напади од воздушен простор и ќе се утврдат потребите за развој на нови софтверски и хардверски решенија.
Регион
Земјотрес ја погоди Црна Гора
![](https://makfax.com.mk/wp-content/uploads/2024/07/zemjotres-cg.jpg)
Земјотрес со јачина од 3 степени според Рихтеровата скала го потресе подрачјето на Црна Гора, јавува ЕМСЦ.
Епицентарот на земјотресот бил во близина на границата со Босна и Херцеговина, на речиси 25 километри источно од Гацко, а бил почувствуван и на територијата на Херцеговина. Земјотресот е регистриран на длабочина од 9,2 километри.
Нема податоци за евентуална материјална штета предизвикана од земјотресот.
Регион
(Видео) Паднати дрвја, скршени клупи, водопади: невремето го опустоши Белград
![](https://makfax.com.mk/wp-content/uploads/2024/07/nevreme-dozd.jpg)
Белград денеска повторно го зафати силно невреме.
Според локалните медиуми, градските улици се поплавени, паднаа многу дрвја, а многу возила се оштетени.
Невремето собори огромни дрвја и во близина на Музејот на Југославија.
Поради пороите заглавија многу возила. Градоначалникот на Белград, Александар Шапиќ, изјави дека суперќелиските бури стануваат реалност.
„Мораме да ги прифатиме новите временски услови. Суперќелиските бури стануваат наша реалност. Имавме дури и среќа во споредба со регионот и светот. Загреб беше целосно уништен. Количеството на врнежи беше околу 55 литри на метар квадратен. Максималната е околу 60 литри. Ова е количината што вообичаено паѓа за еден месец“, изјави Шапиќ.
Градоначалникот на Белград истакна дека канализацијата не може да прими поголемо количество дожд и дека тоа е проблем и во многу побогатите области и градови.
„Имавме над 250 интервенции од нашите комунални претпријатија, 1.500 работници постојано се на терен, состојбата во градот се стабилизира“, додаде тој.
Дождот буквално предизвика колапс во Белград и делови од градот. Најлошо беше во општините Раковица и Чукарица. Во првиот буквално е создаден водопад, како што може да се види на видеата од социјалните мрежи, додека во Чукарица е снимен гејзер.
Градот беше целосно блокиран, а претходно невремето ги зафати и Рума, Нови Сад и Инџија.