Од денеска, па во следните 4 дена, во рамките на самитот „Отворен Балкан“ во Белград, се одржува првиот меѓународен саем за вино, храна и туризам „Винска визија на ‘Отворен Балкан’“, каде што покровители се Република Србија, Република Северна Македонија и Република Албанија.

Саемот ќе го отворат лидерите на „Отворен Балкан“, премиерот на Република Северна Македонија, Димитар Ковачевски, премиерот на Албанија, Еди Рама, и претседателот на Србија, Александар Вучиќ, информираат владините служби.

На саемот ќе учествуваат повеќе од 330 изложувачи од 22 земји, а Македонија ќе ги претстави својата традиција, обичаите, карактеристичната кујна, музиката и фолклорот, како и обележјата и вредностите на сите други заедници што живеат во земјата.

На саемот за вино, храна и туризам, под слоганот „Вкуси го животот“, нашата земја ќе се претстави, пред сѐ, со 42 винарници и 3 дестилерници, кои пред посетителите ќе презентираат повеќе од 300 типа македонски вина и ракии.

Во рамките на саемот „Винска визија на ‘Отворен Балкан’“ ќе има дегустација на вина, а воедно ќе се одржи натпреварот „Трофеј на виното на ‘Отворен Балкан’ 2022 година“. Саемот е одлична можност за поврзување на винските патишта на Балканот и пред високите гости и посетители, како и отворање нови можности за соработка, за обезбедување поголем извоз, откуп и нови пласмани, што позитивно ќе се рефлектира на развојот на домашната економија.

Во рамките на саемот ќе се претстават повеќе од десет производители на храна од Северна Македонија, кои ќе се презентираат автентичните вкусови на македонската кујна. Македонската туристичка понуда на саемот за вино, храна и туризам во Белград ќе биде претставена преку Агенцијата за промоција и поддршка на туризмот. Фокусот е ставен на македонскиот ено-гастро туризам (туризам базиран на вино и храна), националните паркови, природните и вештачките езера, заштитените подрачја од УНЕСКО, руралниот туризам и адреналинскиот туризам.

Како дел од промотивните активности на македонските производи, вината, храната и националните богатства интересни за туристите, Ковачевски ќе биде домаќин на Македонската вечер, каде што ќе присуствуваат претставници на бизнис-заедниците и владите од Србија, Албанија и Северна Македонија.

Во рамките на активностите во Белград, ќе се одржи и традиционалниот лидерски политички самит на „Отворен Балкан“, предводен од претседателот на Србија, Александар Вучиќ, премиерот на Северна Македонија, Димитар Ковачевски, и премиерот на Албанија, Еди Рама.