Командантот на КФОР, италијанскиот генерал Салваторе Куочи, изјави дека која било агресија на Косово во суштина е агресија против НАТО.

„Во принцип КФОР е НАТО и додека е КФОР тука, секоја агресија кон Косово ќе биде агресија кон нас“, рече Коучи во интервју за приштинскиот дневник „Зери“.

Тој смета дека и покрај обидите за политичко влијание на Русија на Косово, што е дел од меѓународната политика, не се гледа реална закана од Русија кон Косово.

Командантот на меѓународните мировни сили на Косово изрази подготвеност на КФОР, доколку е потребно, да им помогне на косовските власти да ги уапсат осомничените кога Специјалниот суд за воени злосторства на високи офицери на поранешната Ослободителна војска на Косово ќе подигне обвинувања.

Коучи наведе дека задача и одговорност на КФОР е да ја обезбеди безбедноста во случај на подигнување обвинувања, апсења, организирање евентуални протести и во случај полицијата на Косово да не биде подготвена да владее со ситуацијата.

„Во такви ситуации ние сме подготвени да дејствуваме зашто тоа е дел од нашата мисија“, изјави командантот на КФОР.

Говорејќи за апсењето на директорот на Канцеларијата на Владата на Србија за Косово и Метохија, Марко Ѓуриќ, командантот на КФОР рече дека можело да се избегне бруталност од страна на полицијата.