Регион
„Косата ми се запали, мамо, не знам како успеав да се извлечам“, и’ рекол млад Грк на мајка си која го дочекала по несреќата

По железничката несреќата околу 200 преживеани со пет автобуси се пренесени во Солун, а повеќето од нив во шок и плачат и ги гушкаат своите најблиски, пишуваат грчките медиуми раскажувајќи ги нивните приказни.
„Косата ми се запали, мамо, не знам како успеав да се извлечам“, и’ рекол млад човек на мајка си која го дочекала по несреќата.
„Мислев дека ќе умрам“, вели младиот човек кој се возел зад предните вагони кои биле зафатени од пламен.
Уште еден млад човек имаше невидена среќа. Тој го преживеал сударот благодарение на тоа што купил билет за второто купе, но ги помешал бројките и седнал во петтиот вагон кој успеал да остане на шините по судирот. Да седел каде што требало, веројатно ќе бил мртов.
Трет преживеан во железничката несреќа во Грција раскажа дека мислел оти нема да излезе жив од вагонот кој бил зафатен од пожар.
„Го видов пламенот, вагонот беше исполнет со чад, не можев да видам ништо околу мене и наеднаш здогледав светлина од скршен прозорец. Им алармирав на другите да излезат. Не знаевме како и каде ќе застане вагонот“, вели младиот човек, кој се лекува во болницата АХЕПА.
Со лузните на лицето, кои сведочат низ што поминал, шокиран од трагедијата, вели дека е чудо што останал жив.
„Пожарот избувна покрај скршеното стакло. Гореа каблите и излегуваше црн чад. Кога излегов, скокнав врз урнатините. Ги газев и сè уште беа топли од ударот. Првата слика што ја видов беше човек паднат пред мене. Не знаевме што се случи, дали возот се судри, дали удривме животно“, раскажува тој.
Стергиос го изгубил мобилниот телефон за време на трагичната несреќа и откога излегол жив, вели дека барал начин како да ги извести родителите.
28-годишникот е по потекло од Волос, но работи во Солун и многу ретко патува со воз, пренесуваат грчките медиуми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Суштината на обоената револуција е Србија да биде најслаба во регионот, а јас да клекнам пред сите

Српскиот претседател Александар Вучиќ денес изјави дека суштината на обоената револуција е дека Србија мора да биде послаба во споредба со сите во регионот, како и тоа тој да биде неспособен претседател, кој би клекнал пред сите што не ѝ посакуваат добро на Србија, пренесуваат медиумите во соседството.
„Тоа е суштината на обоената револуција. Србија мора да биде скромна и секогаш мора да биде послаба од Хрватска и од сите други во регионот за да може да бидат задоволни“, рече Вучиќ во Палатата на Србија одговарајќи на новинарско прашање.
Вучиќ рече дека денес не е случај Србија да е најслаба во регионот, иако е посиромашна од другите, туку дека, од друга страна, напредува побргу од другите, што никому не му одговара.
„Тоа е една од причините зошто го прават тоа бидејќи би сакале да имаат некомпетентен претседател, кој би клекнал на колена пред сите оние што не ѝ посакуваат добро на Србија“, рече Вучиќ.
Тој ги обвини луѓето, за кои тврди дека се водачи на блокади, дека ја мразат Србија и ѝ посакуваат најлошо на својата земја наведувајќи дека поради нив, земјата е во тешка ситуација бидејќи „ја намалиле стапката на раст, го уништиле туризмот, како и многу економски гранки“.
„Дури и меѓу блокадите има такви што ја сакаат Србија, но не може да се одвојат од овие водачи – новинари, професори и политичари. Тоа е еден од проблемите“, рече Вучиќ, пренесува „Бета“.
Регион
Поради силни ветрови, во прекин фериботскиот сообраќај во Грција

Фериботскиот сообраќај во Егејското Море во Грција денес беше прекинат поради силни ветрови, кои достигнаа брзина од 60 километри на час, поради што илјадници туристи не можеа да одат до своите планирани дестинации.
Забраната за пловидба, која ќе биде во сила денес најмалку до 13 часот по локално време, важи во сите поголеми пристаништа во Атика, а само фериботите на неколку линии во областа Аргосароникос сè уште пловат, објавува „Јуроњуз“.
Пристанишните власти чекаат ветерот да стивне за да може да се укине забраната за пловидба.
Пловењето кон островите Киклади беше прекинато во пристаништето Рафина иако екскурзиите до Мармарис на островот Кос продолжија според планот.
Фериботите не сообраќаат од Пиреја, а пловидбата во пристаништето Лаврио е прекината во правец на Китнос и Агиос Маринас и Неа Стира.
Илјадници патници не можеа да го почнат своето патување утрово поради прекин на пловидбата и чекаат да одат на своите дестинации.
Грчката крајбрежна стража им советува на патниците да се консултираат со компанијата чиј ферибот треба да ги превезува кога ќе бидат можни нови поаѓања, како и да ги избегнуваат пристаништата на кои се појавил сообраќаен метеж.
Метеоролошката служба прогнозира дека силните ветрови ќе траат најмалку до недела, што би можело да влијае на фериботскиот сообраќај.
Поради оваа причина, властите им препорачаа на туристите да стапат во контакт со локалните пристанишни власти и компании пред да заминат.
Регион
Гори во Грција: издадена наредба за итна евакуација

Голем шумски пожар избувна денес во областа Каравадос на грчкиот остров Кефалонија, а издадена е наредба за евакуација на три области, јавуваат грчките медиуми.
Пожарот избувнал во земјоделска и шумска зона, а ангажирани биле 20 припадници на противпожарната служба со седум возила, како и членови на планинската спасувачка служба и волонтери, објави „Катимерини“.
„Доколку се наоѓате во областите Каравадос, Доризата и Керамис, засолнете се и упатете се во правец на Аргостоли. Следете ги упатствата на властите“, се наведува во известувањето на противпожарната служба.
Четири авиони и два хеликоптера исто така помагаат во гаснењето на пожарот, пишува грчкиот весник.
Фото: принтскрин