Властите во Приштина побараа од Европската унија во четвртокот врз Србија, којашто е земја кандидат за членство, да изврши притисок и да се откаже од меѓународниот налог за апсење за поранешните косовски герилци, вклучително и налогот за поранешниот премиер Рамуш Харадинај, кој е уапсен во Франција.

Рамуш Харадинај, еден од командантите на поранешната Ослободителна војска на Косово (ОВК – UCK), во средата беше уапсен на аеродромот Басел-Мулус во источна Франција врз основа на меѓународната потерница која ја издаде Србија, иако сегашниот челник на косовска опозиција против кој Меѓународниот суд за воени злосторства извршени на територијата на поранешна Југославија во Хаг водеше процес за воени злосторства сторени во судирот 1998/1999 година, беше ослободен во 2008 откако му беше судено по 37 обвинувања и потоа повторно ослободен на апелациониот суд во 2012 година.

Владата во Приштина и тамошните опозициски лидери веднаш повикаа да запрат преговорите за нормализација на односите со Србија кои се водат со посредство на ЕУ. Тие преговори се предуслов за двете земји во процесот на приближување кон полноправното членство на ЕУ.

Од безбедносни извори беше соопштено дека Србија издала меѓународни потерници за околу 20 лица од нејзината поранешна јужна покраина, повеќето припадници на ОВК.

„Со ваквото примитивно постапување, Србија не само што му наштетува на духот на дијалогот за добрососедски односи, туку исто така покажува дека е дестабилизирачки фактор во целиот регион и оттаму меѓународните партнери би требало сериозно да се загрижат“, изјави косовската министерка задолжена за дијалогот со Србија под покровителство на ЕУ./крај/мф/сн