Регион
Кој им дозволил на Вучиќ и новинарите да влезат кај пациентите од Македонија: студентите бараат одговорност

Народниот правобранител на Србија, Зоран Пашалиќ изјави дека ќе ги истражи сите околности наведени во шестото барање на студентите, кои сакаат да утврдат кој им дозволил на претседателот на Србија, Александар Вучиќ и новинарите да влезат во одделението за интензивна нега на Клиничкиот центар на Србија (КЦС), каде што беа сместени повредените од пожарот во Северна Македонија, пренесуваат српските медиуми.
Студентите бараат покренување на постапка и разрешување на надлежните во Универзитетскиот клинички центар на Србија и во Ургентниот центар. Оттаму посочуваат дека директорите на овие здравствени установи им дозволувале на луѓето да влегуваат на одделението за интензивна нега и да ги снимаат пациентите, со што грубо се нарушува нивното здравје и правото на приватност.
Пашалиќ потсетува дека според Уставот и законот не може да го контролира претседателот на државата, но може да се обрати до Министерството за здравство преку кое се врши контрола на Клиничкиот и Ургентниот центар.
„Кога има случај во болницата за кој се смета дека е неадекватен третман, се обраќаме до Министерството за здравство да го истражи и да даде заклучоци. Ова е постапка која е апсолутно пред нас“, рече Пашалиќ.
По пожарот во дискотеката во кој загинаа повеќе од 60 лица, дел од тешко повредените пациенти се пренесени на лекување во Белград.
Тие беа сместени во одделението за интензивна нега на Ургентниот центар на Универзитетскиот клинички центар на Србија (УКЦС), каде Вучиќ заедно со медиумски тимови ги посети на 17 март.
Студентите бараат покренување постапка за утврдување одговорност и разрешување на директорката на УКЦС Јелена Друловиќ, директорот на Ургентниот центар на УКЦС Марко Ерчеговац и началникот на одделението за интензивна нега во Ургентниот центар на УКЦС, Душан Мициќ.
„Овие лица прекршиле низа хигиенски мерки за заштита на пациентите од ризик фактори кои можат да доведат до сериозна закана по здравјето и животот на пациентите“, се наведува во нивното соопштение, пренесуваат медиумите во соседството.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Разбиена криминална група за илегална миграција во Грција, правеле лажни пасоши и ги продавале за 600 евра

Уапсени се 23 лица осомничени за криумчарење илегални мигранти и фалсификување документи во Грција, а се уште се трага по 26 други членови на оваа криминална мрежа.
Оваа банда преку шверц и фалсификување заработила 4.865.200 евра, а меѓу уапсените е и водачот на групата, кој од почетокот на 2024 година правел лажни патни исправи за мигранти, јавува ЕРТ.
При претреси на четири локации во Атина и Пиреја, запленети се 4.831 лажни патни исправи во вредност од 68.000 евра, а идентификувани се 558 мигранти прошверцувани во ЕУ од оваа група.
Во зависност од тоа дали шверцувале мигранти по пат, море или воздушен пат, трошоците за превоз се движеле од 700 до 8.000 евра, додека фалсификуваниот документ чинел од 400 до 600 евра.
Регион
(Видео) Силни врнежи од дожд и град во Белград, поплавени улици и дел од автопатот

Ветер, град и пороен дожд го погодија Белград. Улици и автопат беа поплавени откако невреме го погоди српскиот главен град.
Според снимките објавени на социјалните мрежи, дел од автопатот бил под вода.
Бројни улици во Белград беа исто така поплавени. Подводниот премин во близина на железничката станица во Раковица е под вода.
Според извештајот на репортерот на Н1, во Авала паѓало град со големина на лешници.
Регион
(Видео) Вучиќ го пречека Орбан во Белград: „Не разбирам што зборува, но му верувам сто проценти“

Српскиот претседател Александар Вучиќ и унгарскиот премиер Виктор Орбан се сретнаа во Белград каде што разговараа за зајакнување на односите меѓу Србија и Унгарија, кои двајцата лидери денес ги нарекуваат најдобри во историјата.
Вучиќ по средбата се огласи на Инстаграм, велејќи: „Горд сум на нашето пријателство и најдобрите односи во српско-унгарската историја“. Заедно со објавата, тој сподели заедничко видео со Орбан, на кое му се заблагодари со зборовите: „Виктор е многу повеќе од пријател. Ти благодарам за сè“.
Во видеото, Вучиќ го нарекува Орбан „искрен и вистински пријател на Србија“ и ја нагласува неговата улога во градењето блиски односи меѓу двете земји. Тој додаде дека е особено задоволен што може да го угости во Белград.
По говорот, Вучиќ се пошегува дека Орбан веројатно не знаел што рекол бидејќи не разбирал српски.
Потоа Орбан се осврна на прашањето на англиски:
„Не разбирам српски, па не знам што рече мојот пријател Вучиќ, но верувам дека сè што кажа е точно. Му верувам сто проценти, иако не знам ниту еден збор на неговиот јазик“.
Потоа двајцата лидери срдечно се ракуваа.