Регион
Критично на неколку точки во Хрватска: реката Драва се намалува, но населбите сѐ уште се загрозени

Состојбата со водотеците во Подравина во Хрватска, каде што реката Драва почна да опаѓа, денеска е слична на претходниот ден, критични населби се Дрње, Торчец и вештачкото езеро Шодерица, каде што се поплавени 15-ина куќи.
Позитивно е што во Ботово од час на час опаѓа водостојот на реката Драва, но целосното повлекување на водите во овој крај секако ќе потрае неколку дена, оцени утринава Томислав Новосел од Центарот за заштита од поплави на хрватските води, пренесуваат локалните медиуми.
Заменик-градоначалникот на општина Дрње, Петар Домбај, вели дека водостојот на Драва кај Ботово е 74 сантиметри и е помал во однос на понеделник попладне.
Во местото Торчец успешно беа заштитени куќите, кои исто така беа загрозени од потокот Глибоки. Сепак, Домбај предупредува дека ќе бидат потребни денови заводата целосно да се повлече во коритата, а штетите секако ќе бидат огромни.
„Страшно е да се види што направила водата, дури и околната почва е како сунѓер“, опиша Домбај во изјава за загрепската телевизија „Н1“.
Ситуацијата во Копривничко-крижевачката жупанија сѐ уште е критична, но под контрола, јави оваа телевизија. Штом нивото на водата падне под 560 см, состојбата е добра бидејќи водата повеќе не продира во езерото. Некои од викендичките се отсечени, луѓето имаат пристап само со чамци.
Звонко Гргец, раководител на Канцеларијата за цивилна заштита во Осиек, рече дека нивото на водата во моментот е на ниво на редовни мерки за одбрана од поплави.
„Се поставуваат и поправаат насипите во месноста Карашица, на истекот на Драва се поставени бариери високи еден метар. Подготовки беа направени и на подрачјето на градот Валпова, дел е небрането подрачје, се прават напори за заштита на викенд-населбата. Подготовките се во тек и во општина Подравска Мославина. Врвот на водниот бран го очекуваме од петок-сабота, подготвени сме за тоа, но никогаш не се знае“, рече Гргец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Ужас во Јагодина: Внук ги заклал бабата и дедото и избегал

Двојно убиство се случило во близина на Јагодина. Според првичните информации М.М. (39) ги заклал бабата Р.Ж. (76) и дедото Р.М. (79) и избегал. Неофицијално, убиството се случило во селото Богава, општина Деспотовац, а телата на сопружниците биле пронајдени рано утрово во семејната куќа.
Полицијата е на местото на настанот и во тек е истрага, а пристигнати се и обвинителот на Вишото јавно обвинителство во Јагодина.
Регион
Шеќеринска: НАТО нема да дозволи безбедносен вакуум во БиХ

Заменичката на генералниот секретар на НАТО, Радмила Шеќеринска, денес изјави дека алијансата нема да дозволи безбедносен вакуум во Босна и Херцеговина, откако српскиот лидер Милорад Додик објави дека ќе побара од Москва да ја прекине воената мисија ЕУФОР во таа земја.
Шеќеринска изјави дека НАТО е „трајно посветен на суверенитетот и територијалниот интегритет на Босна и Херцеговина“.
Таа додаде дека НАТО нема да дозволи дестабилизација во Босна и Херцеговина, соопшти канцеларијата на бошњачкиот член на колективното претседателство на Босна и Херцеговина, Денис Беќировиќ, кој се сретна со претставничката на НАТО.
„Без оглед на исходот од претстојната седница на Советот за безбедност на ООН, НАТО нема да дозволи безбедносен вакуум во Босна и Херцеговина“, рече Шеќеринска.
Регион
Албанска министерка го разреши својот заменик поради непочитување на забраната за пушење

Министерката за внатрешни работи на Албанија, Албана Кочиу, го разреши својот заменик поради непочитување на забраната за пушење во ресторан во САД, објавува „Спутник“.
Таа потврди на социјалните мрежи дека го сторила тоа врз основа на пријавата на албански државјанин кој живее во Њујорк, каде што бил во посета нејзиниот заменик Анди Махила. Како што изјави, тој пушел цигара во ресторанот „што предизвикало немир кај присутните“.
Албана Кочиу е првата жена на чело на полицијата во историјата на Албанија, а во претходната влада беше министерка за здравство.
Фото: принтскрин