Регион
Курти води политика на заплашување, за Србите да се иселат од Косово и Метохија, вели српскиот министер Весиќ

Најголемото насилство и терор врз еден народ во Европа во моментов се случува врз Србите на Косово и Метохија, истакна денеска српскиот министер за градежништво, транспорт и инфраструктура Горан Весиќ, кој побара од Србите на Косово и Метохија да го слушаат советот на претседателот Александар Вучиќ, затоа што, како што рече, важно е да не се одговори на провокациите на Приштина, како што би сакал косовскиот премиер Албин Курти.
„Курти апсолутно не бира кого ќе нападне, бидејќи неговата политика е заплашување. Тој сака да ги заплаши Србите за да го напуштат Косово. Кога мајката ќе види како ги малтретираат нејзините деца, што друго може да помисли освен да се спакува и да го напушти Косово. Тоа е целта на Курти и затоа малтретира деца и апси луѓе“, изјави Весиќ за ТВ Прва.
Како што истакна, Курти сака да создаде нестабилност, за Србите да мислат дека таму нема иднина и да ги напуштат своите огништа, бидејќи му треба етнички чисто Косово.
„Најголемото насилство врз еден народ во Европа во моментов се случува врз Србите на Косово и Метохија. А, не сум слушнал дека тие што зборуваат против насилството во Белград, го спомнуваат насилството врз Србите на Космет, уште повеќе, тие дејствуваат како да не постои“, истакна Весиќ.
Министерот посочи дека претседателот Вучиќ води одговорна политика и ги советува Србите да бидат мирни и трпеливи, бидејќи оние кои ја поддржуваат независноста на Косово само чекаат погрешен потег од Србија, за да го обвинат Белград за тоа што го прави Курти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Успеавме да ги одложиме санкциите на САД врз српската нафтена индустрија

Српскиот претседател Александар Вучиќ денес изјави дека САД го одложиле воведувањето санкции против Нафтената индустрија на Србија (НИС) за осум дена со цел, како што рече, „за да покажат почит кон Србија“.
„Им благодарам, сакаа да покажат почит, да ни кажат дека нè слушаат и ја разбираат нашата позиција. Благодарам за тоа, но дали добивме нешто суштинско? За седум дена, ќе го имаме истото прашање, а јас сè уште нема да го имам одговорот“, рече Вучиќ во Обреновац, каде што учествуваше на граѓанскиот марш против блокадите.
Тој додаде дека ќе има реакција од Србија и од самата НИС и кон американската страна и кон другите партнери кога станува збор за нови понуди.
„Верувам дека ова е добро, но дали ќе биде доволно и дали ова е она што го сакаат Американците – ќе видиме“, рече Вучиќ.
Санкциите на САД против НИС требаше да стапат во сила на 1 октомври, но рокот сега е одложен барем до 9 октомври.
фото: принтскрин
Регион
Албанија продолжува со рекордни бројки на странски туристи

Албанија продолжува со рекордни бројки на странски туристи, која во периодот јануари – август ја посетиле околу девет милиони.
Албанскиот Институт за статистика објави податоци што потврдуваат дека влезот на странски државјани е за 5,2 отсто поголем ако се спореди со истиот период пред една година, кога беа регистрирани вкупно 8,5 милиони странски државјани.
Само во август бројот на странски државјани кои влегле на албанска територија е 2,3 милиони, што е зголемување од 9,9 отсто, во споредба со истиот месец минатата година.
Албанската економија имаше корист од странските туристи од 2,1 милијарди евра за само шест месеци, до кога ја посетиле 4,76 милиони странци. Овие бројки потврдуваат дека 2025 година ќе биде уште пооптимистичка во однос на туризмот во земјата, додека приходите се очекува да се зголемат за околу 7,7 отсто во споредба со лани.
Се очекува приливот на туристи да продолжи и есенва, со што ќе се продолжи туристичката сезона во земјата. Туроператорите известуваат дека резервациите се високи и за септември и за октомври.
Минатата година Албанија ја посетиле над 11,7 милиони туристи или 15,2 отсто повеќе од претходната година. Очекувањата за годинава се над 12 милиони туристи.
Регион
Жена убиена на свадба во центарот на Шибеник, ја погодила ракета

Жена е повредена кога пиротехничко средство – сигнална ракета – било испукано во близина на катедралата „Свети Јаков“ во Шибеник синоќа, и починала од повредите во болница, соопшти хрватската полиција.
Во соопштението од полициската управа Шибеник-Книн се додава дека е уапсен 52-годишен маж, пренесува Хина. Во тек е кривична истрага, соопшти полицијата.
Хрватските медиуми неофицијално известуваат дека несреќата се случила за време на свадбена прослава, кога осомничениот испукал ракета.