Регион
Лајчак: Косово и Србија мора да воспостават дијалог, во спротивно постои закана од ескалација

Специјалниот пратеник на Европската Унија, Мирослав Лајчак, ги повика Србија и Косово повторно да воспостават дијалог за нормализација на односите, со цел да се избегне повторување на минатомесечното насилство на северот на Косово. По 24 септември, кога околу 30 вооружени Срби упаднаа во селото Бањска на северот на Косово со мнозинско српско население и се забарикадираа во српскиот православен манастир, тензиите меѓу Белград и Приштина се зголемија.
По пукањето, полицијата го опколи манастирот. Во престрелката загинаа тројца напаѓачи и еден косовски полицаец. „Нападите во Бањска променија многу работи и тие треба соодветно да се истражат… Во исто време, дијалогот мора да продолжи“, рече Лајчак по средбата со косовскиот премиер Албин Курти. „Доколку нема дијалог, може да има уште една ескалација“.
Лајчак допатува во посета на регионот со специјалниот пратеник на САД за Западен Балкан Габриел Ескобар и со претставници на Франција, Германија и Италија. По разговорот со Курти, тие во Белград се среќаваат со српскиот претседател Александар Вучиќ. Околу 50.000 Срби кои живеат на северот на Косово не ги признаваат институциите на Приштина и го сметаат Белград за главен град.
Тие често се судираат со косовската полиција и меѓународните мировници, но минатомесечното насилство беше најлошо во последните години.
Лајчак ја повика Приштина да почне да работи на формирање на Заедница на српски општини со цел да се овозможи поголема автономија за областите со српско мнозинско население, но Курти го отфрли предлогот, тврдејќи дека автономијата може да доведе до отцепување на областа со мнозинско српско население и обединување со Србија.
Властите во Приштина го обвинуваат Белград за вооружување и поддршка на српските борци во Бањска, што српските власти го негираат. Лајчак го повика Белград да ги истражи настаните и да ги казни сите сторители на нејзина територија. Србија одбива да ја признае независноста на Косово и се уште го смета за дел од својата територија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Очекувам да се сретнам со Доналд Трамп во следните два месеци

Српскиот претседател Александар Вучиќ изјави дека се надева дека ќе се сретне со американскиот претседател Доналд Трамп во следните два месеци.
„Очекувам да ја имам таа средба. Тој е премногу зафатен, секогаш е можно нешто да се смени, датумот се уште не е одреден, но знаете дека јас сум многу внимателен кога зборувам за тоа. Тоа би било огромна чест за нашата Србија и верувам дека е изводливо“, изјави Вучиќ.
Зборувајќи за вчерашниот телефонски разговор со францускиот претседател Емануел Макрон, како и за нивната средба во април, Вучиќ рече дека секогаш имаат неколку важни теми за разговор.
„Вчера поминавме низ неколку важни теми. Понекогаш разговараме ненадејно. Како што оди по државен протокол, тоа е закажано и се чека пет до седум дена“, рече Вучиќ.
Регион
Продолжен притворот за 10 осомничени за уривање на настрешницата во Србија

Високиот суд во Нови Сад го продолжи притворот на осомничените во истрагата за уривањето на настрешница на Железничката станица во Нови Сад на 1 ноември за уште 30 дена, соопштија од Вишиот суд во Нови Сад.
Продолжен е и куќниот притвор на сите осомничени.
На крајот на минатата година беше поднесен обвинителен акт против 13 лица.
Регион
Деканката на филозофскиот факултет од Ниш нападната со нож, вечерва собир за поддршка

Вечерва во Ниш се случува собир за поддршка на нападнатата деканка Наталија Јовановиќ.
Студентите велат дека ова е втор напад врз деканката Наталија Јовановиќ, но и уште еден во низата напади врз оние кои сакаат на фер начин да дојдат до вистината.
„Никогаш не сме молчеле за насилството, ниту ќе поминеме со наведнати глави покрај него. Ги повикуваме сите граѓани кои се желни за правда да ни се придружат на овој митинг“, се вели во повикот.
Деканката на Филозофскиот факултет на Универзитетот во Ниш, Наталија Јовановиќ денеска беше повредена со нож за време на собир на студенти и други граѓани.
Таа беше пренесена во Ургентниот со исеченица на раката, а потоа пуштена на домашно лекување.
„Доживеав голем стрес, останува само да се распарчиме. Нема потреба вака да продолжат тензиите, а знаеме кој ги шири, обвинувам една личност, таа ми извади нож, а тоа е претседателот на оваа држава“, изјави Јовановиќ, пренесе Н1.
За нападот уапсена е 69 годишна жена, поради сомнение дека сторила кривично дело насилничко однесување на спортски настан или јавен собир.