Регион
Меѓу жртвите во нападот во Истанбул и Русинка, ранет Американец
Една државјанка на Русија е меѓу жртвите од терористичкиот напад во Истанбул во новогодишната ноќ, а меѓу ранетите е и Американец, потврдија во неделата вечерта генералните конзулати на двете земји во турската метропола.
„Ја потврдуваме смртта (на државјанката на Русија). Првично се претпоставуваше дека станува збор за државјанка на Азербејџан, но според документите таа има руско државјанство“, изјавиле од рускиот конзулат во Истанбул и додале дека нема други руски државјани смртно настрадани или ранети во терористичкиот напад во ноќниот клуб.
Истовремено претставници на американскиот Стејт департмент потврдија дека во истиот напад е ранет и државјанин на САД.
„Можеме да потврдиме дека еден државјанин на САД бил ранет за време на тој напад. Продолжуваме да му ги даваме сите расположливи конзуларни услуги“, изјавиле од американската дипломатија истакнувајќи дека меѓу загинатите нема Американци.
Во меѓувреме турските медиуми пишуваат дека идентификацијата на жртвите е завршена и оти е малку веројатно дека досегашните податоци ќе се менуваат.
Ноќта кон неделата напаѓач по кого турската полиција уште трага, со автоматска пушка изврши напад врз ноќниот клуб „Reina“ во истанбулскиот кварт Ортекај. Според последните информации кои ги соопшти турскиот министер за внатрешни работи Сулејман Сојлу, во нападот се убиени 39 луѓе, од кои 16 се странски државјани. Меѓу жртвите се државјани на Франција, Русија, Тунис, Белгија, Саудиска Арабија, Јордан, Мароко, Либија, Либан и Израел.
Министерот за здравство Реџеп Акдага соопшти дека во истанбулските болници се згрижени 65 ранети лица, од кои четворица и натаму се во критична состојба.
Снимките од надзорните видео камери емитувани на турските телевизии покажуваат дека напаѓачот со капа на Дедо Мраз почнува да пука во луѓето пред влезот на ноќниот клуб и во возилата кои се движат по улицата. По нападот, сторителот исчезна и по него се трага. Засега никој не ја презема одговорноста за нападот./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Во Србија пронајдени три деца киднапирани во Романија
Киднапирани деца од Романија, денеска биле пронајдени во српскиот град Ниш. Министерот за внатрешни работи Ивица Дачиќ денеска за ова ја информирал министерката за внатрешнира работи на Романија.
Случајот во последните денови ја брануваше романската јавност.
Имено, министерот Дачиќ ја информирал својата романска колешка дека припадниците на Министерството за внатрешни работи, Управата за криминалистичка полиција, Службата за сузбивање криминал и Техничката управа, во соработка со Полициската управа во Ниш, постапувајќи по пријава за кривично дело киднапирање извршено во Романија, уапсен е романски државјанин А.М.(1970) поради сомнение дека ги грабнал неговите три малолетни деца, исто така романски државјани на возраст од 11, 9 и 8 години.
Регион
Мајката на убиеното момче во „Рибникар“: Зошто го уби мојот син единец?; Коста: Се чувствував отфрлено
Во зградата на Специјалниот суд во Белград денеска продолжува судењето на Милјана и Владимир Кецмановиќ, родителите на момчето Коста, кое уби девет ученици и чуварот во основното училиште „Владислав Рибникар“. Момчето убиец и денеска продолжува да дава исказ во постапката. Со оглед на тоа дека за време на масакрот имал 13 години, нема да сноси кривична одговорност за своето дело.
Денеска му поставуваат прашања родителите на убиените деца. Судењето е затворено за јавноста, пренесуваат тамошните медиуми.
„Мајка ми секогаш бараше да бидам најдобар. Се лутеше и викаше кога не бев најдобар. Бидејќи секогаш бараше повеќе од мене, јас ѝ се лутев. Тоа нејзино однесување влијаеше да го направам тоа што го направив. Да го немав пиштолот на татко ми, немаше да го сторам ова“, изјави денеска пред судот Коста К., пренесуваат српските медиуми.
Кога Сузана Станковиќ-Чикиќ, мајката на убиениот Андрија Чикиќ, го прашала зошто ѝ го убил синот единец, тој одговорил: „Се чувствував отфрлено“. Во тој момент речиси сите во судницата плачеа, пишува „Телеграф“.
Огњен Божовиќ, адвокатот на семејствата на оштетените, зборуваше за постапката пред судењето.
„Денеска, треба да продолжи сослушувањето на малолетниот убиец, имаме можност да поставиме дополнителни прашања. Ќе се обидеме да разбереме како се случија настаните, да ги разгледаме темите, кои биле мотивите и што сакал да постигне. Се надевам дека дополнително ќе утврдиме одговорност и ќе разјасниме зошто тоа се случило, верувам дека одиме кон осуда, неговото сведочење не е пресудно во таа смисла, но мислам дека е значајно“, рече адвокатот и додаде:
„Се надевам дека денеска ќе добиеме повеќе дополнителен материјал, кој ќе го потврди нашиот став. Разбирам дека постои легитимен интерес на јавноста и уште од првиот ден ја застапував тезата дека судењето треба да биде отворено за јавноста, но со оглед на судската одлука за изземање, сметам дека секое истекување информации треба да се истражи и санкционира. Со тоа се создава амбиент во кој ние како адвокати не можеме да ги коментираме насловите во порталите и весниците, а во јавноста завршуваат разни детали. Ова ја отежнува нашата работа“, рече тој.
Регион
Вучиќ: Никогаш немало поголем притисок од разни надворешни служби
Претседателот на Србија, Александар Вучиќ, денеска, во безбедносно-информативната агенција (БИА), која го прославува својот ден и 22 години работа, изјави дека никогаш немало поголем внатрешен притисок од разни надворешни служби, кои сакаат да го пренасочат патот на Србија и нагласи дека патот на Србија е единственото добар пат.
Вучиќ во својот говор рече дека никогаш не почувствувал таков притисок однатре.
„Бидејќи сите играчи на разните служби, западни и источни, се под притисок да ги постигнат резултатите што ги бараат странските служби. Речиси е невозможно да го издржам тој притисок. Тоа е на секојдневно ниво на моите колеги и пријатели, и од едната и од другата страна, сакајќи да го свртат патот на Србија некаде на друго место или како што сметаат дека е во вистинската насока, а таа вистинска насока е или овде или таму, а не она што го зацртавме со поддршка на народот, кој е српската насока“, нагласи Вучиќ.