Регион
Милановиќ за странските работници: И нашите деца треба да ги работат овие работи, ние сме разгалени

Претседателот на Хрватска, Зоран Милановиќ денес учествуваше на церемонијата на доделување награди по повод Денот на градот Загреб.
„Загреб, нашиот сакан, е мојот град каде што го поминав целиот свој живот. Загреб е синтеза на Хрватска како земја, татковина, како град на Хрвати, Срби, а низ историјата и на други националности. Град кој се полнеше во последните сто години и растеше врз основа на човечки придонес и човечко населување.
Прво како строго кајкавска мала заедница, потоа почнаа да доаѓаат луѓе од поширок круг“, рече Милановиќ, кој нагласи дека сега мора да се соочaт и да живеaт во град кој ќе се промени на поинаков начин, пренесува N1.
Се осврна на странските работници кои доаѓаат и живеат во Загреб и работат работи за кои верува дека и хрватските деца треба да ги работат. „Станавме малку разгалени. Во еден момент, ќе мора да видиме каде е таа граница и кои работни места не се достојни за нас и дали навистина треба да ги работи по секоја цена некој што не е од тука и кој доаѓа од далечен свет со своите копнежи, стравови, амбиции и напуштена татковина, бидејќи ова се луѓе како нас“, рече Милановиќ.
Испрати порака до градската власт на Загреб: „Сакам, пред сè, нашиот град да биде добро управуван, строго управуван, но не на режимски, а не на репресивен начин“, рече тој, додавајќи дека очекува да има повеќе комунален ред, истакнувајќи го проблемот со уништување на имотот со графити.
Понатаму, тој им рече да земаат пари од фондовите на Европската Унија. „Обидете се да го добиете последното евро од овие средства легално, за која било намена, бидејќи најлошото е тие пари да отидат залудно. Тие пари се наши пари“, рече Милановиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео/Фото) Србите и Унгарците одржаа заедничка воена вежба

Србија и Унгарија одржаа заедничка воена вежба „Соседи 25“ со цел зголемување на нивото на соработка меѓу армиите на двете земји и размена на борбени искуства, соопшти српското Министерство за одбрана.
Вежбата се одржа на воениот полигон Пасуљанске ливаде со учество на припадници на Првата бригада на српската армија и 30-та механизирана бригада на Унгарија.
За време на повеќедневната вежба, војниците заедно ги вежбаа дејствата на единиците во тактички операции, вклучително и употребата на современи борбени возила, комуникациски системи и опрема за собирање и обработка на разузнавачки информации.
Ова е десетта заедничка вежба наречена „Соседи“ што ја спроведуваат вооружените сили на Србија и Унгарија.
Регион
Во Бугарија и Романија на сила црвен метео аларм поради обилни дождови

Во Бугарија и Романија на сила е црвен метео аларм поради обилни дождови. Обилните дождови продолжија да ја погодуваат Бугарија, што доведе до затворање на патишта, прогласување црвен метео аларм во неколку области, а 51 населено место останаа без електрична енергија поради бурата. Надлежните органи го интензивираат надзорот над сите мостови и инфраструктура што е потенцијално оштетена од поплавите, пишува денес „Новините“. Службениците предупредија дека секоја локација што е изложена на ризик ќе биде веднаш затворена.
Граѓаните се повикуваат да бидат внимателни, да избегнуваат патувања и да ги следат упатствата на надлежните служби. Бугарскиот национален институт за метеорологија и хидрологија прогласи црвен метео аларм, највисоко ниво на предупредување, за осум области каде што се очекуваат повеќе од 65 литри дожд на квадратен метар, пренесува Танјуг.
Во исто време, властите објавија дека Бугарија ќе побара помош од Европскиот фонд за солидарност за погодените места поради предизвиканите штети.
Метеоролозите во Романија денес го продолжија црвениот временски аларм поради предвидените обилни врнежи од дожд за пет области и градот Букурешт со можност за врнежи до 140 литри на квадратен метар.
Според најновото предупредување на Романската национална метеоролошка управа (ANM), од 21 часот на 7 октомври до 15 часот на 8 октомври се очекуваат обилни врнежи од дожд во неколку области, пишува романската новинска агенција Аѓерпрес.
Фото: принтскрин
Регион
Убиен судија на Апелациониот суд, во судница во Тирана

Судијата Астрит Каљаја беше убиен денес во Апелациониот суд во Тирана додека траеше рочиштето.
Напаѓачот, засега непознат, влегол во судницата и го застрелал Каљаја, кој бил однесен во болница каде што му била пружена медицинска помош, објавува „Албанија пост“.
На местото на настанот, според медиумот, има бројни полициски сили, кои веднаш го уапсиле осомничениот сторител, а како што се наведува, идентитетот на напаѓачот и мотивите на нападот засега се непознати.
Судијата Астрит Каљаја служел со години во албанскиот судски систем, а неодамна во Апелациониот суд во Скадар.
Тој го поминал процесот на верификација во 2019 година, каде што бил потврден на функцијата од Независната квалификациска комисија, а потоа и од Специјалниот жалбен панел во 2022 година.
Фото: принтскрин