Регион
Најкритични точки во Грција на кои крадците масовно оперираат и упаѓаат во автомобили
„Внимание, крадци упаѓаат на плажата на Неа Каликратија“, „Во Солун обиени дури три автомобили еден по друг“, „Украдено бело ‘клио’ пред супермаркет на плажа во Пефкохори“, се само дел од предупредувањата што зачестија во последните неколку дена во фејсбук-групата „Грција инфо“, во која членовите разменуваат искуства за плажите, сместувањето, цените, храната… Крадците не се насочени само кон туристите од регионот, туку кон сите оние што, изгледа, оставаат ранец, очила или каков било личен предмет во автомобилот, а кои го привлекуваат вниманието на крадецот. Грчките власти апелираат до сите посетители дојдени на одмор да не оставаат ништо во возилата и да внимаваат при паркирање на одредени места, кои се чини дека ги фаворизираат крадците.
Туристите и граѓаните на Грција се целосно свесни за проблемите со обивање автомобили на паркинзи, кршење стакла и крадење работи, како и за фактот дека овој вид криминал во Грција е зголемен во последните години.
Крадците не се задржуваат долго на самото место, па тешко е да се фатат како крадат. Велат дека ваквите кражби траат од 10 до 15 секунди, а се случуваат во секое време од денот или ноќта.
Најчесто го кршат стаклото од автомобилот со цврст предмет (затоа што не им треба алат за тоа) или ја кршат бравата, грабнуваат што ќе најдат и бегаат. Добро ги знаат локациите на кои туристите најчесто оставаат скапоцености во своите автомобили.
Затоа, не оставајте ништо вредно во автомобилот, дури и кога ќе излезете на неколку минути, ниту на прометни улици ниту на јавни паркинзи, кои немаат чувар.
Конкретно, не смеете да оставате пари (дури ни ситни парички), картички, клучеви, куфери и чанти, техника, паричници, очила и парфеми на видно место во автомобилот.
Порталот „Грчкаинфо.ком“ ги објави клучните локации на кои врз основа на досегашните пријави од туристите крадците се сè почести.
Тоа не значи дека ќе ви се случи на истото место, но секако може да биде добар потсетник да бидете внимателни на слични места.
Според досегашните искуства, крадците најчесто оперираат на паркинзите на големите супермаркети и трговски центри, како ИКЕА, „Лидл“, „Џамбо“, потоа на отворени паркинзи во Солун, кај Белата кула, во околината на плоштадот Аристотелис, на паркингот кај аквапаркот во Солун, како и на паркинзите на некои плажи на Халкидик.
Порталот наведува туристите никако да не одат на шопинг во големите маркети директно од граница и во автомобили со куфери и други работи.
„Крадците многу добро знаат дека туристите најчесто купуваат храна веднаш по пат за да не мора да доаѓаат подоцна и знаат дека се полни со вредни работи. Немојте да го правите тоа, а ако треба, нека остане барем едно лице до автомобилот за да внимава на работите. Минимум 4 автомобили се обиени во последните три дена на необезбедениот паркинг до плажата „Сахара“ во Неа Ираклија и Неа Каликратија. Од едниот автомобил украдени се патики, а од другиот лаптоп и пасош“, наведува порталот.
Без разлика дали крадците ви украле нешто или само го скршиле стаклото или ја скршиле бравата, пожелно е целиот случај да го пријавите во грчката полиција.
Најдобро е да не допирате ништо, туку веднаш да повикате полиција на бројот 100 или да отидете во најблиската полициска станица.
Известете ја полицијата доколку сте забележале дека нешто е украдено бидејќи секогаш постои шанса украдените предмети да ви бидат вратени. Ако ви се украдени банкарските картички, јавете се во вашата банка и веднаш откажете ги сите картички за да не останете без пари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сирија го призна Косово
Претседателката на Косово, Вјоса Османи, објави дека Сирија ја признала независноста на Република Косово, пренесува Анадолу.
Османи, која е во официјална посета на Ријад, изјави дека со поддршка на саудискиот престолонаследник Мохамед бин Салман, е постигнат договор со кој Сириската Арапска Република ја признава Република Косово.
Османи му се заблагодари на сирискиот претседател Ахмед ал-Шарија за одлуката за признавање на Косово, како и за неговата поддршка за Косово.
„Народот на Косово и Сирија многу страдаше и жртвуваше за да постигне слобода. Затоа, ова меѓусебно признавање денес не е само признавање на државниот суверенитет, туку и признание на жртвите на многу генерации за слободен живот“, рече Османи.
Таа, исто така, му се заблагодари на саудискиот престолонаследник „што го овозможи овој историски чин меѓу двете земји“. Со признавањето од Сирија, сега 120 земји ширум светот го признаа Косово.
Регион
Додик му се заблагодари на Трамп
Поранешниот претседател на Република Српска, Милорад Додик, се огласи откако САД ги укинаа санкциите против него, заблагодарувајќи му се на американскиот претседател Доналд Трамп за исправката, како што тврди, на големата неправда. Тој ја нарече одлуката морална рехабилитација на вистината за Република Српска.
Во објава на социјалните мрежи, Додик му се заблагодари на американскиот претседател Доналд Трамп и неговите соработници за „исправката на големата неправда нанесена врз Република Српска, нејзините претставници и нивните семејства“, која, како што наведува, „ја создадоа администрациите на Обама и Бајден“.
„Одлуката за укинување на санкциите не е само правна, туку и морална рехабилитација на вистината за Република Српска и сите оние кои чесно ѝ служат. Уште еднаш се покажа дека сè што беше кажано против нас беше лага и пропаганда, врз која беше изграден големиот хаос што го создаде Кристијан Шмит – хаос што сега мора да се исчисти“, рече Додик.
Тој додаде дека може да им прости сè на оние кои се фалеле и верувале во туѓите лаги во изминатите години, „освен годините што ги изгубиле затоа што верувале дека Република Српска ќе падне“. „Денес е јасно – таа никогаш нема да падне“, рече Додик.
Фото: ЕПА
Регион
САД ги укинаа санкциите за Додик
САД одлучија да ги укинат санкциите за неколку лица од Република Српска, што е поврзано со неофицијален договор меѓу Милорад Додик и новата американска администрација.
Санкциите беа укинати за Милорад Додик, Жељка Цвијановиќ, семејството Додик, нивните компании и многу други блиски соработници.
Во петок, 17 октомври, САД ги укинаа санкциите за четворица блиски соработници на Додик, кои првично беа ставени на црната листа за организирање и промовирање на неуставниот „Ден на РС“. Тие се Јелена Пајиќ Баштинац, Данијела Драгичевиќ, Горан Раковиќ и Дијана Миланковиќ.
Неофицијални извори тврдат дека укинувањето на санкциите е резултат на договор меѓу САД и Додик, според кој Додик морал да ја напушти функцијата претседател на РС по конечната пресуда и да назначи вршител на должноста претседател.
Откако Ана Тришиќ-Бабиќ беше избрана за вршител на должноста претседател на Република Српска, со што се исполни тој дел од договорот, Америка постепено ги укинува санкциите за другите соработници на Додик, а тој процес треба да биде завршен до крајот на овој месец.

