Регион
На паркинг во Загреб се отвори дупка, во која пропаднал автомобил
На паркиралиште во Загреб се отворила дупка, а настанот вознемирил многу станари од околните згради. Како што пренесува порталот „24сата“, наводно дошло до пукање на цевки под асфалтот, по што се отворила и дупката.
„Се слушна некаков пукот. Потоа следеше звук на рушење, како кога се урива ѕид. Се стрчавме кон балконот и ја видовме дупката, долу на паркиралиштето. Врз неа имаше автомобил, не можев да забележам дали беше целосно пропаднат“, изјавил еден од станарите.
Како што пренесува хрватскот портал, инцидентот се случил во петокот вечерта, а дупката која се отворила во асфалтот била со дијаметар од околу 1 и пол метар, при што во неа делумно пропаднал и еден паркиран автомобил.
Дупката била затворена веќе наредниот ден, а веднаш потоа биле отстранети и знаците за предупредување околу неа. Локалните власти соопштиле дека дошло до дефект на подземна цевка, што резултирало со отворање на дупката.
Иако дупката е затворена, станарите не паркираат во близина на местото каде што истата се појавила. Околу местото на дупката од двете страни се слободни по најмалку две паркинг места, пишува „24сата“.
„Од сега па натаму ќе паркирам на соседната улица“, кратко изјавил млад човек кој живее во една од блиските згради.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Дете најдено живо по два дена од поплавите во Јабланица под урнатините на семејната куќа
Продолжува борбата на голем број спасувачи за пронаоѓање на живите исчезнати лица по катастрофалната поплава што пред два дена се случи во Јабланица и во околните населени места.
Според официјалните информации, досега животот го загубиле 18 лица, а по голем број се уште се трага.
Сепак се појави и една добра вест, спасувачите пронашле дете под урнатините на неговата семејна куќа. Успеале да го извлечат и итно бил пренесен во болница.
Момчето било пронајдено под плочата тешка два тона која се срушила одозгора.
Регион
Во Јабланица прогласена тридневна жалост: Загинаа 15 лица, се трага по уште исчезнати
Градоначалникот на општина Јабланица Дамир Шабановиќ деновите од недела до вторник ги прогласи за Денови на жалост во врска со трагичната смрт на сограѓанин во природна катастрофа што го зафати подрачјето на Јабланица, пренесува Ал Џезира Балканс.
Деновите на жалост се одбележуваат со спуштање на знамињата на половина копје на зградите на општината и јавните установи основани од општина Јабланица.
Културни, забавни и слични програми нема да се одржуваат на јавни места, а физичките и правните лица кои вршат угостителска дејност, како и локалните медиуми ќе го приспособат своето работење.
Досега на подрачјето на Јабланица и Коњица се пронајдени телата на 15 лица, а по 10 до 15 исчезнати лица се уште се трага.
Регион
Дрвја и кал во БиХ, местата зафатени од поплавите се непрепознатливи
По поплавите што вчера ја зафатија БиХ, најтешка е состојбата во општина Јабланица, каде што најголем број урнати згради и објекти се под вода, а истото е и во Трусина и Бутуровиќ Поље, јави телевизијата БХТ1.
Новинарка на телевизијата, која известува од терен, изјави дека овие места се непрепознатливи.
-Можеме да видиме само дрвја и вода, кал, се’ лебди на површината на водата, можеме да видиме загрижени жители, изјави таа и додаде дека веќе се започнати хуманитарни акции за помош на загрозените.
Според последните неофицијални податоци само на територијата на Јабланица како исчезнати се водат 48 лица, додека официјалните податоци велат дека по поројните поплави и свлечиштата кај Јабланица, Кониќ, Крешево и Кисељак, потврдена е смртта на 19 лица, а дека по многу други уште се трага.
Населението во погодените подрачја има потреба од итна помош, а најитни се конзервираната храна и вода во шишиња.
Патната комуникација е отежната, а на места и целосно прекината.
Во страшните поплави кои зафатија делови од Босна и Херцеговина, една од жртвите е и 29-годишна трудница од Јабланица. Брачна двојка е пронајдена гушната во одроните во Доња Јабланица, а според првичните информации почина и уште еден брачен пар од овој крај.