Регион
Нови детали за трагедијата во Нови Сад: двегодишното дете пронајдено во рацете на мајката, соседите се обиделе да го скршат ѕидот и да ги спасат
Maja С. (23), Данијел А. (29) и четири деца на возраст од 2, 4, 5 и од 7 години загинаа во пожар во Нови Сад, кој околу 3 часот по полноќ избувнал во нивната семејна куќа.
Се сомнева дека пожарот го предизвикал скутер, кој бил приклучен на полнење, пишува „Телеграф.рс“.
Српски „Блиц“ пишува дека најмалото дете овој месец наполнило две години: „По пожарот, тоа е пронајдено во прегратките на мајка си“, им кажале очевидци.
Сите шест жртви спиеле во една соба од куќата, а според првичните информации, причина за смртта е задушување.
Докторката Николина Мариќ од Итната помош за 021.rs изјавила дека дошле на интервенција во 2.45 часот, но веќе било доцна. Тој наведува дека не можеле ништо друго, освен да ја констатираат смртта на неколку лица.
Соседите за српски „Телеграф“ велат дека веднаш штом го забележале пламенот, тргнале кон куќата, а се обиделе да го скршат ѕидот за да дојдат до семејството.
Куќата во која избувнал пожарот имала само еден прозорец, но тој се потпирал на друг ѕид поради што не било можно да се отвори.
„Пробавме сè, удиравме, земавме алат и се обидовме да го скршиме ѕидот за да ги извадиме“, велат тие.
Се обидел да ги спаси и нивниот вујко, кој денеска полни 18 години, јавуваат српските медиуми.
„Кутрото момче се обиде да ги извлече низ дупката, но не успеа. Соседите му помогнаа, но сè заврши фатално. Децата умираа пред неговите очи. Страшна, страшна трагедија“, раскажале соседите за медиумите.
Еден од соседите се обидел да ја скрши вратата од куќата.
„Викав, се јавив, но никој не се јави. Истрчав до вратата и удирав, се обидов да ја скршам, но не успеав, потоа повикав противпожарна единица“, вели тој за „Телеграф“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Брнабиќ: Ситуацијата на Косово е најсериозна досега, Курти сака да започне војна
Претседателката на Собранието на Србија, Ана Брнабиќ, истакна дека ситуацијата на Косово е најсериозна досега, бидејќи очигледно премиерот Албин Курти, сака етничко чистење на Србите и да предизвика конфликт со Белград.
„Тоа е затоа што ми се чини дека Курти нема друг избор или излез од својата политика, освен да предизвика вооружен конфликт, односно војна со Белград и затоа е најдрскиот и најневнимателниот досега. Затоа што тој е целосно турнат до ѕидот и тоа е неговиот единствен излез“, рече таа, зборувајќи за „Euronews“.
Од друга страна, таа нагласи дека „во наш интерес е претседателот на Србија, Александар Вучиќ, да се труди да го зачува мирот“.
Со тоа што, како што додаде таа, не смее да се дозволи малтретирање на српскиот народ на Косово, како и конфискација на имот и немање каква било правна сигурност, пренесуваат српските медиуми.
Таа напомена дека животот на Србите на Косово е исклучително тежок.
„Апсолутно сè води до она за што зборуваше и Александар Вучиќ во Советот за безбедност на Обединетите нации, а тоа е свесно провоцирање и создавање невозможни услови за живот на Србите на Косово, при што Албин Курти свесно предизвикува етничко чистење, а тоа сега им е јасно на сите“, нагласи таа.
Според неа, голем проблем е што сето ова се случува под будното око на меѓународната заедница, тоа се ЕУЛЕКС и КФОР.
Таа нагласи дека е оптимист што конгресменката Клаудија Тени од редовите на републиканците испратила писмо до американскиот државен секретар Ентони Блинкен во кое прашува што ќе направат Соединетите Американски Држави бидејќи се загрозени правата на Србите на Косово.
Регион
Сијарто: Мирот и стабилноста на Балканот се приоритет за Унгарија, која претседава со ЕУ
Унгарскиот министер за надворешни работи Петер Сијарто изјави денеска во Будимпешта дека мирот и стабилноста на Балканот се приоритети за неговата земја, која во моментов претседава со Европската унија.
„Унгарија е земја претседавач со ЕУ, а мирот и стабилноста на Балканот се наш приоритет“, рече Сијарто на прес-конференција во Будимпешта.
Тој оцени дека во Европа „има лицемерие, бидејќи еден дел од земјите-членки застапуваат различни ставови, имајќи предвид дека земјите од Западен Балкан во просек чекаат 14 години за членство во ЕУ“.
„Сметаме дека тоа е непринципиелна позиција“, потенцира Сијарто.
„Заканите со санкции или кој било друг вид притисок треба да се остават настрана“, додаде тој.
Регион
Падна првиот снег на Балканот: студениот бран над Европа се движи кон исток
Студениот атлантски бран над Европа се движи кон исток, па на словенечка Кредарица падна првиот снег.
Невремето предизвика најмногу проблеми на словенечкото крајбрежје, но најлошите сценарија не се остварија, соопшти денеска словенечката агенција за животна средина (Арсо).
Врнежите во Словенија се уште не престануваат, а на места падна и првиот снег, но и покрај ова не се очекуваат поголеми проблеми.
За само неколку часа наврнале повеќе од 50 литри дожд на метар квадратен, а во некои случаи и стотина.
„Во Порторож во текот на летото наврнаа помалку од 100 литри дожд на метар квадратен. Значи, овие врнежи се доста големи, но ваквите врнежи не се рекордни за овој регион“, велат од Арсо.