Регион
Нов бран на коронавирус во Србија: чекалниците преполни, лекарите предупредуваат на внимателност

Висока температура, слабеење на сетилото за мирис и вкус, покачено ЦРП и пневмонија се симптоми на новите соеви на коронавирус што ја зафатија Србија. Лекарите предупредуваат да се биде внимателен бидејќи постојните тестови на коронавирусот се несигурни, а чекалниците пред ординациите се преполни. Масовно на болничко лекување завршуваат лица над 65 години, лица со хронични заболувања, од кои повеќето се невакцинирани, јавуваат српските медиуми.
Според написите, во последните две недели лекарите по општа медицина работат со полна пареа, а респираторните вируси и новиот бран на коронавирус се сè поагресивни, па болничките кревети на Инфективната клиника и на Клиниката за пулмологија при Универзитетската болница на Србија се пополнуваат.
„Веќе 15 дена се бориме со короната, таа повторно се разгоре“. Граѓаните го носат вирусот од Грција, Црна Гора и од други земји, каде што биле на одмор. Овој вид има очигледни симптоми, но лекарите може да го помешаат и со алергии, кои се сега актуелни. Се јавува високо ЦРП и бргу се појавува пневмонија бидејќи вирусот го напаѓа ткивото на белите дробови. Изгледа цел на вирусот се оние што не се вакцинирани, но има и спорадично вакцинирани со поблаги симптоми. Помладите имаат висока температура до 40, која трае неколку дена. Повозрасните граѓани имаат компликации, како и луѓето со коморбидитети, а неколку мои пациенти веќе се примени на Инфективната клиника“, изјави Драган Миљковиќ, специјалист по општа медицина, за „Нова.рс“.
Тој нагласува дека постојните тестови на коронавирусот се несигурни.
„Тестовите се целосно бескорисни бидејќи овој вид е многу отпорен. Тоа е мутант што тестот не го ни препознава. Допрва треба да се направи тест за овој сој на коронавирус. Луѓето се тестираат и добиваат негативни резултати, а ги имаат сите симптоми на коронавирус. Не ми требаат да ми носат тест, знам доволно за овој вирус за да проценам дека нападнал. Сè може да се види во крвната слика и на белите дробови. Овој сој бргу ги напаѓа белите дробови, што не се случува во толкава мера со грипот и другите респираторни вируси. Секој што чувствува симптоми мора да направи Д-димер, ЦРП, крвна слика и ЛДХ“, советува докторот.
Тој истакнува дека клиничката слика на овој вид е слична на онаа на првиот вид од Вухан.
„Хроничните пациенти се во најголема опасност. Чувството за мирис и вкус слабее, како и со видот од Вухан. Масовните невакцинирани имаат потешка клиничка слика, но има и луѓе што ја примиле вакцината, но се постари. Астматичарите спаѓаат во најчувствителната група, но и сите со хронични заболувања, хипертензија и имунокомпромитирани пациенти. Вирусот се третира симптоматски, а антибиотиците се воведуваат по потреба, сè зависи од крвната слика и од комплетната лабораторија“, потенцира Миљковиќ.
Нова варијанта на коронавирусот БА2.86, наречена пирола, е регистрирана пред две недели во Америка, Велика Британија, Данска и во Израел.
Виролозите, пак, сметаат дека треба да се проучи оваа подваријанта и да се подготват граѓаните доколку се работи за соеви што предизвикуваат потешка клиничка слика.
„Тоа се омикронски подваријанти. Ова се нови мутации, а претпоставката е дека лесно се пренесуваат. Во земјите во кои се регистрирани постојано ги тестираат варијантите што се присутни, проверуваат дали влијаат на тежината на клиничката слика, дали помагаат терапии, дали вакцините се ефикасни. Верувам дека коронавирусот ќе дејствува како грипот, па од сезона на сезона ќе имаме нова мутација за која ќе биде неопходно да се прими сезонска вакцина за да останеме имуни на инфекции. Институтот за молекуларна генетика и генетско инженерство во моментот е единствената институција во земјата што може да регистрира нова подваријанта на вирусот бидејќи со ваква работа веќе не се занимава ниту една друга лабораторија“, објаснува Александра Кнежевиќ, вирусолог, за „Нова“.
СЗО нагласи дека засега нема податоци дека оваа варијанта предизвикува потешка клиничка слика, а не се знае како реагира на лековите и на организмот на вакцинираниот.
Нова варијанта на коронавирусот, ерис, е идентификувана и во Унгарија, објави во петокот Националниот центар за јавно здравје и лекови МТИ. Официјалните лица нагласија дека, како и другите варијанти на омикрон, болеста предизвикува симптоми слични на грип – треска, главоболка, течење на носот, болки во грлото, болки во мускулите и зглобовите, слаб имунитет.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Пленковиќ: Моето семејство е длабоко трогнато од фактот што се сретнавме со папата во неговите последни часови

Хрватскиот премиер Андреј Пленковиќ упати сочувство по повод смртта на светиот отец Франциско до кардиналот Кевин Фарел, Камерленго на Светата Римска црква.
„Во името на Владата на Република Хрватска и во мое лично име, изразувам длабоко и искрено сочувство за смртта на Светиот Отец Франциско, чиј животен и духовен пат оставија неизбришлива трага во современиот свет.
Хрватскиот народ, кој чувствува блискост и длабока почит кон папата Франциско од самиот почеток на неговиот понтификат, денес жали за загубата на човекот со вера, едноставност, понизност и сила.
Тој остави длабока трага не само на Католичката црква, туку и на меѓународната заедница. Неговиот постојан повик за солидарност, милост и блискост со исклучените, заборавените, сиромашните и болните инспирираше и поттикна милиони луѓе ширум светот на акција.
Имав особена чест да се сретнам лично со Светиот Отец вчера на Велигден, во Неговите последни часови, заедно со мојата сопруга и нашите три деца. Тоа беше краток, но длабоко трогателен момент – средба исполнета со добрина, насмевки и благослови кои ќе останат трајно врежани во сеќавањето на целото мое семејство како скапоцен подарок во моментот на збогување.
Република Хрватска и хрватските верници остануваат благодарни за сè што беше и направи папата Франциско – за Црквата, за светот и за секој од нас“, напиша Пленковиќ.
Регион
Вучиќ: Папата Франциско ќе биде вечна инспирација

Светот изгуби исклучителен духовен водач кој ширеше љубов, мир и солидарност преку своето апостолско дело, објави денеска српскиот претседател Александар Вучиќ по повод смртта на папата Франциско, оценувајќи дека животот на папата посветен на верата, љубовта и служењето на другите треба да биде инспирација за целиот свет.
На платформата Х, Вучиќ истакна дека работата на папата Франциско за зајакнување на меѓурелигискиот дијалог и неговата посветеност на хуманизмот оставиле неизбришлива трага во историјата. „Папата Франциско беше гласник на надежта и помирувањето, секогаш во служба на најранливите, а неговото заминување е загуба и тага за сите нас, бидејќи својот живот го посвети на верата, љубовта и служењето на другите. Тој ќе биде вечна инспирација за сите нас“, рече тој.
Вучиќ, во име на граѓаните на Република Србија и во свое лично име, изрази длабоко сочувство до Римокатоличката црква и до сите верници ширум светот. „Нека му е вечна слава“, напиша тој на социјалната мрежа Икс.
Регион
Додик: Британски специјалци се дојдени во Република Српска да ме убијат

Милорад Додик, претседателот на Република Српска и осуден бегалец кој е наведен како бегалец во Федерацијата на Босна и Херцеговина, во интервју за Новости упати сериозни обвинувања.
Тој тврди дека „тројца претседатели на европски земји и еден премиер“ му кажале дека во Босна и Херцеговина е префрлена британска воена единица со многу специфична задача – негова ликвидација.
„Тоа не е класична единица. Станува збор за четириесет војници кои пристигнаа со јасна наредба – не да ме уапсат, туку да ме убијат. И тоа под изговор дека давам отпор. Мафијашки принцип – ако отстраните човек, го отстранивте проблемот. Лидерите од Европа ми го потврдија тоа. Тие не се откажаа, но засега молчат“, вели Додик.
Тој во интервјуто нагласува дека не живее во страв и дека слободно се движи, отфрлајќи ги тврдењата дека е изолиран.
„Никогаш нема да бидам скршен од политичките процеси. Нема да се откажам од борбата за Република Српска“, вели тој.
Додик открива и дека официјални лица од Брисел наводно го советувале да се засолни.