Словенечкиот портал „Нецензурирано“ го објави нон-пејперот, односно неофицијалниот дипломатски документ за новите поделби на територијата на поранешна Југославија.

Документот, кој крена прашина во регионот во последните денови, зборува за идеи за распарчување на Босна и Херцеговина, присоединување на Република Српска кон Србија и обединување на Косово со Албанија, а се шпекулира дека словенечкиот премиер Јанез Јанша го испратил нон-пејперот до Брисел.

Никој официјално не потврди дека претседателот на Европскиот совет, Шарл Мишел, добил документ со таква содржина од Словенија. Но, неофицијален дипломатски документ, кој предвидува распад на Босна и Херцеговина, присоединување на Република Српска кон Србија и обединување на Косово со Албанија, кон која е додаден и дел од Северна Македонија, всушност постои, пишува „Нецензурирано“.

Во документот во воведот се споменуваат нерешените национални прашања на Србите, Албанците и Хрватите што се појавија по распадот на Југославија. Авторите на документот посочуваат дека и по воспоставувањето на мирот по завршувањето на војните, ветените европски перспективи и напредокот на Северна Македонија и Црна Гора во оваа насока во регионот, клучните прашања остануваат нерешени.

Според информациите на словенечкиот портал, документот со наслов „Западен Балкан – патот напред“ бил примен од кабинетот на Шарл Мишел во февруари.

Кој го напишал не може официјално да се знае. Според словенечките новинари, тоа сигурно не било напишано во словенечкото Министерство за надворешни работи.

Според некои информации, дел од неговата содржина може да биде напишана во Будимпешта. Меѓутоа, во дипломатските кругови во Брисел тој се нарекува словенечки документ бидејќи кабинетот на Јанша наводно учествувал во испраќањето на разни адреси.