Регион
Пленковиќ: Европа мора да ги зајакне своите одбранбени капацитети, тоа сите го сфативме

Европската Унија мора да ги зајакне своите одбранбени капацитети, а нејзините членки го сфатија тоа, изјави хрватскиот премиер, Андреј Пленковиќ, на Светскиот економски форум во Давос.
Премиерот зборуваше на панелот „Бранење на европскиот обединет фронт“, на кој присуствуваа полскиот претседател Анджеј Дуда, шефот на украинската дипломатија, Дмитро Кулеба, унгарската претседателка, Каталин Новак, и претставничката на белоруската опозиција, Светлана Тихановскаја.
„Европската Унија мора да ги зајакне своите одбранбени капацитети. Ова е нешто што мислам дека сите го разбравме и за кое сите бевме јасно ангажирани“, рече Пленковиќ во дискусијата за европската безбедност, пренесе „Индекс“.
Хрватска покажа посилен ангажман со зголемување на средствата за одбрана за повеќе од 100 отсто во последните седум години, додаде хрватскиот премиер.
Зборувајќи за руската агресија врз Украина и европскиот одговор, Пленковиќ рече дека „цврсто верува оти ЕУ ќе истрае да ѝ помага на Украина“.
Полскиот претседател рече дека иако не е „политички коректно да се каже, Полска се чувствува уморна од војната во Украина“. Сепак, тој додаде дека Варшава ќе продолжи да помага.
Шефот на украинската дипломатија одговори дека не слушнал ниту еден западен функционер, на состаноци или во приватни разговори, да каже дека помошта ќе престане и дека Киев не чувствува притисок да почне мировни преговори.
„Оваа година целта е да ја исфрлиме Русија од небо бидејќи оној што го контролира небото, ќе ја добие војната“, додаде Кулеба.
Унгарскaта претседателка рече дека треба да се разговара за заморот од војната за да се намали. Претставничката на земјата чиј премиер Виктор Орбан ја забавува европската помош за Украина јасно ја осуди руската агресија врз таа земја.
„Мораме да ставиме до знаење дека Русија не може да победи во таа војна“, рече Новак.
Тихановскаја истакна дека судбината на Белорусија е поврзана со Украина поради што победата на Киев е исклучително важна за нејзината земја.
„Без слободна Украина, нема слободна Белорусија“, изјави претставничката на опозицијата во земјата додавајќи дека Александар Лукашенко моментно е во многу кревка позиција во која ја изгубил поддршката од населението, па затоа зависи од помошта на Москва.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Министерството за внатрешни работи на Србија: Дачиќ примил плик со три куршуми во него

Српското Министерство за внатрешни работи соопшти дека вчера во зградата на владата на Република Србија е пронајден плик адресиран до вицепремиерот и министер за внатрешни работи, Ивица Дачиќ, во кој имало три куршуми.
Сомнителната пратка е откриена вчера за време на безбедносна проверка на рендгенски уред при сортирање пошта. Истрагата утврдила дека пликот бил предаден два дена претходно во филијалата на поштата на Србија во Пожаревац.
Полицијата го идентификувала и го пронашла лицето што го доставило пакетот, а истрагата за сите околности на настанот е во тек.
Министерството соопшти дека ги презема сите законски пропишани мерки и дејства со цел да се заштити безбедноста на граѓаните и на институциите.
Фото: принтскрин
Регион
Четиригодишно дете од Србија за малку ќе се удавело на Халкидик: уапсен таткото

Четиригодишно момче од Србија за малку ќе се удавело вчера на плажа на Халкидик, а полицијата го уапси таткото по инцидентот, пренесуваат медиумите во регионот.
Вистинската драма се одвиваше вчера попладне на плажата Калитеа, во општина Касандра, кога четиригодишно момче од Србија речиси ќе се удавело додека беше на одмор со своето семејство во Грција.
Според крајбрежната стража, откога на четиригодишното момче му беше укажана прва помош од спасувач на плажата, тоа беше пренесено со брзата помош првин во Здравствениот центар – Касандра, а потоа во Општата болница на Халкидик за понатамошен медицински третман.
Потоа полицијата го уапси таткото на момчето за прекршување на член 306 од Кривичниот законик. Не е познато дали детето било само во водата во времето на инцидентот.
Фото: принтскрин
Регион
Бебе старо 7 дена пронајдено покрај контејнер во Белград

Во раните утрински часови во Земун, на улицата Дунавска, покрај контејнер, пронајдено е новороденче. Како што дознава српски „Телеграф“, станува збор за бебе старо само седум дена.
Детето било завиткано во пешкир, а по пристигнувањето на брзата помош, покажувало знаци на живот. Веднаш било пренесено во Клиничката болница Земун, каде што му била укажана медицинска помош.
Повеќе информации засега не се познати.
фото: принтскрин