Регион
Под српско-унгарската граница откриен тунел за шверц на мигранти
Минатиот викенд унгарската полиција спречила повеќе од 300 мигранти илегално да влезат на територијата на Европска Унија, пренесува РТС. Граничните полицајци пронашле 54 лица, кои се обидувале да ја прескокнат или да ја пресечат жичената ограда на унгарско-српската граница, а 258 мигранти биле пронајдени во граничната зона без документи.
Повеќето од нив се декларираат како Сиријци, а потоа следуваат граѓани на Ирак, Иран, Авганистан и Палестина.
Полициските службеници во округот Бац-Кискун, во соработка со унгарската војска, откриле тунел под жичената ограда на границата, во близина на градот Морахал. Унгарската полиција смета дека тунелот висок 40 сантиметри и долг 24 метри бил користен за шверцување мигранти од српската кон унгарската страна.
Тоа е трет подземен премин под оградата што унгарските гранични власти го откриле минатата година во тоа подрачје, пренесува РТС.
Говорејќи на националната телевизија „М1“, Џерџ Баконди, советник за национална безбедност на унгарскиот премиер, рече дека илегалната миграција би можела да се запре ако има политичка волја на државите на нивниот пат да ги затворат границите за нив, што се покажа за време на епидемијата на коронавирусот.
По неколкумесечното затишје поради пандемијата и затворените граници, Унгарија повторно бележи големо зголемување на бројот на мигранти кои се обидуваат илегално да стигнат до Европската Унија од крајот на мај. Речиси 900 обиди за илегално преминување на границата беа забележани минатата недела.
Унгарските власти повторуваат дека Унгарија нема да ја отстрани оградата на унгарско-српската граница, туку ќе ја зајакне одбраната на шенген-границите со цел да се зачува безбедноста на граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сијарто: Фокусот на унгарското претседателство со ЕУ ќе биде проширувањето на Унијата на Западен Балкан
За време на претстојното претседавање со ЕУ, Унгарија планира да се фокусира на прашања кои се важни за централна Европа, како што се борбата против илегалната миграција, проширувањето на Унијата кон Западен Балкан и енергетската безбедност, изјави денеска унгарскиот министер за надворешни работи, Петер Сијарто.
Кога станува збор за проширувањето на ЕУ, Сијарто на прес-конференција со својот чешки колега Јан Липевски рече дека регионот на Западен Балкан не заслужува да чека 14 години и 11 месеци за членство, што, како што вели, го поткопува кредибилитетот на политиката на Унијата, објави унгарската агенција МТИ.
„Тоа е ситуација што треба да се реши, така што унгарското претседателство (со Унијата) има јасна агенда да им помогне на земјите од Западен Балкан да го забрзаат пристапниот процес“, рече Сијарто.
Посочи дека ефектите од миграцијата директно се чувствуваат во Централна Европа од 2015 година и неопходна е сериозна регионална соработка за да се запре мигрантскиот прилив.
„Чешката, словачката и полската полиција ни помогнаа и ни помагаат на јужните граници на Унгарија да ги задржиме илегалните мигранти кои и се закануваат на Европа надвор од границите. Потребни се континуирани заеднички напори на четворицата централноевропски премиери за да се држи под контрола прашањето за квотите и да не се дозволи илјадници или десетици илјади илегални мигранти да се шетаат неконтролирано“, додаде Сијарто.
Шефот на унгарската дипломатија нагласи дека централна Европа „ќе продолжи да се спротивставува на притисоците поврзани со квотите“. Сијарто се осврна и на енергетската безбедност, наведувајќи дека Унгарија и Чешка планираат нуклеарен развој и затоа ќе продолжат да се борат против негативната дискриминација поврзана со нуклеарната енергија во Брисел.
Нуклеарната енергија е одржлив начин за производство на енергија, тоа е безбеден, еколошки и евтин метод за производство на големи количини електрична енергија“, заклучува Сијарто.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Регион
(Видео) Уапсени Срби во Атина, поранешни членови на „Пинк Пантер“: осомничени се за украден накит вреден 315.000 евра
Двајца Срби, кои во минатото биле членови на организацијата „Пинк Пантер“, се уапсени во Атина под сомнение дека ограбиле две познати златарници во центарот на грчката престолнина, соопшти атинската полиција.
Според соопштението на грчката полиција, уапсените оперираат најмалку од минатиот декември, а се претпоставува дека имале соодветна мрежа за канализирање на украдени предмети, бидејќи оствариле добивка од над 315.000 евра.
По претресот во нивните домови, меѓу другото, пронајден е алат користен при кражбата, три рачни часовници, накит, 190 евра, лажна возачка дозвола, три мобилни телефони, лични предмети, како и дополнителен мотоцикл и автомобил што служеле за превоз.