Регион
Полицајката која што се поврзува со убиецот од Градачац ќе биде суспендирана
Полицајката од Градачац, Џенана Селимовиќ, која се поврзува со Нермин Сулејмановиќ, утре ќе биде суспендирана, потврди за „Н1 Сараево“ Џевад Корман, директор на полициската управа на кантонот Тузла.
„Полицајката Џенана Селимовиќ се врати од одмор. Таа денеска побарала лекарска помош и зела боледување. Наредив до утре изутрина да се подготват сите релевантни факти и докази, врз основа на кои таа евентуално би можела привремено да биде отстранета, односно привремено да биде суспендирана до завршување на дисциплинската постапка засега“, рече Корман.
„Сите информации со кои располагаме фрлаат сомнеж за нејзино дружење со криминално активни лица и во таа насока таа го прекршила кодексот и направила службена повреда на дисциплинската должност. Значи, работиме во таа насока. Значи, само во таа точка, ништо не е поврзано со овој последен настан“, додаде тој.
Во јавноста се шпекулира дека Џенана Селимовиќ наводно ја дала локацијата на која е убиена Низама Хеќимовиќ. Сепак, овие наводи се уште не се потврдени, пишува „Н1 Сараево“.
Адвокатот на Џенана Селимовиќ, Бакир Хеќимовиќ, претходно за медиумите изјави дека таа наводно немала никаков контакт со Нермин Сулејмановиќ.
„Медиумите ја линчуваат без причина. Сето ова е неосновано сè додека нема барем индикативен доказ дека таа воопшто имала контакт со Сулејмановиќ. Велат и дека побегнала во Италија, но е на годишен одмор и на 16 август редовно ќе се јавува во полициската станица Градачац и редовно ќе продолжи со своите обврски. Доколку се покаже дека Џенана немала никаква врска со убиецот, ќе покренеме низа тужби во нејзин интерес“, изјави адвокатот.
Нермин Сулејмановиќ на 11 август изврши тројно убиство, а три лица беа ранети. Убиството на невенчаната сопруга го пренесуваше во живо на Инстаграм. Сулејмановиќ неколку дена претходно бил пријавен во полиција за насилство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Хрватска се подготвува за поплави: Се поставуваат насипи, службите на терен
Источна и централна Европа беа тешко погодени од поплавите, 16 лица загинаа, илјадници останаа без покрив над главата, а вкупната штета се брои во стотици милиони евра.
Циклонот „Борис“ продолжува да се заканува, реките надојдоа. Хрватска е во опасност поради Дунав. Другите реки се помалку проблематични, пренесуваат хрватските медиуми.
„Имаме мапи за ризик и опасност од поплави. Сигурно ова е една од петте најголеми во историјата. Ова може да се спореди со 2013 година. Но сите ние се бориме против тоа и неуморно работевме, дење и ноќе. Сега има повеќе од 300 луѓе на терен, а пратени се повеќе од 10.000 вреќи, изјави генералниот директор на „Хрватски води“, Зоран Ѓуроковиќ, коментирајќи ја можноста од поплави и водостојот на реките.
Напомена и дека нема недостиг од материјал, ниту од работна сила.
Хрватска, како што рече, е подготвена, без разлика на зголемениот ризик. Исто така, предвидува дека ниту една населена област не треба да биде загрозена.
„Имавме доволно време бидејќи бранот вода патува седум дена до Хрватска. На сите луѓе им беше предложено колкаво ниво на водата може да се очекува, а обезбедивме и луѓе и ресурси. Од недела кога ќе ги завршиме сите активности, главен фокус ќе бидат насипите затоа што не смеат да попуштат“, заклучи Ѓуроковиќ.
Тој одговори и на прашањето како може ситуацијата да се избегне:
„За жал, пред се, придонесоа климатските промени и екстремните хидролошки услови, а тие области имаат поголема населеност, густо се изградени, има и земјоделски површини, а ги стесниле котлинските профили, па можни се природни поплави“ рече тој и продолжи:
„Тешко е да се надградат системите. Традиционално се прават. Проблемот е да се направат десет километри насипи, а само во Хрватска имаме 4.100 километри насипи. Во моментот кога имате најава за екстремни околности не е можно да ги надградиме насипите, ако тоа не беше направено со години пред тоа, да се прилагоди на климатските промени и да се направи се за да се осигура дека дел од водата е безопасна од излевање.
Како ја доживеа одбраната од поплави во Европа? Гледаме дека парламентот во Будимпешта е како остров.
„Унгарија има долга традиција на одбрана од поплави и верувам дека ќе се брани подобро од другите земји. Германија, Австрија, Словенија и Италија имаат големи проблеми. Добро се спротивставуваме досега, без разлика на рекордните водостои на некои реки Ние го прифаќаме сето ова без поголеми последици, но мора да работите, ништо не се случува само по себе.
Регион
Пилот пријавил дека во авионот има бомба: принудно слетал на аеродромот во Подгорица
Капетанот на „ЛОТполиш“ пријавил во полиција во Подгорица дека во авионот на таа компанија има бомба.
На терен е и полицијата, како и полициската антидиверзантска заштита, пренесуваат медиумите во соседството.
Од аеродромот официјално беше соопштено дека нешто пред 17 часот на аеродромот во Подгорица започнала вонредна инспекција на авионот на националната полска авиокомпанија „ЛОТ Полиш ерлајнс“, пишува „Вијести“.
Од таму изјавиле дека авионот бил изолиран и далеку од патничкиот терминал.
Сите други патници се безбедни, а останатите операции засега се одвиваат непречено. Контролата се врши според пропишаните процедури во синхронизирана акција на Полициската управа, аеродромот и другите служби“, се вели во соопштението.
Авионот од Варшава (LO585) летал над Црна Гора, но капетанот по дојавата на Контролата на летање кажал дека мора да слета на пистата на аеродромот во Подгорица.
Полскиот авион слетал во 16:34 часот и во тек е антидиверзантска проверка, стои во написите на медимите.
Регион
Вархеји: Добра средба со Вучиќ за спроведување на следните чекори, планот за раст во полн ек
Европскиот комесар за соседска политика и проширување Оливер Вархеји денеска изјави дека имал добра средба со српскиот претседател Александар Вучиќ во Брисел за да ги подготви следните чекори во време кога се започнуваат „амбициозните реформи засновани на реформската агенда на Србија“.
Вархеји на социјалната мрежа Х оцени дека новиот План за раст на Западен Балкан вреден шест милијарди евра е во полн ек.
„На маргините на состанокот на лидерите од Западен Балкан, имав добар состанок со претседателот Александар Вучиќ за да ги подготвам следните чекори додека започнуваме амбициозни реформи врз основа на реформската агенда на Србија. Новиот план за раст од 6 милијарди евра е веќе во полн ек. Повеќе реформи, повеќе поддршка!“, рече Вархеји.