Регион
Потрагата по телото на малата Данка се пресели во Лазарева Пештера

Се уште нема трага од телото на малата Данка Илиќ (2), која беше убиена кај Бор во Србија.
За нејзиното убиство се осомничени 50-годишниот Дејан Драгијевиќ и Срѓан Јанковиќ, работници на локалното претпријатие Водовод, кои прво ја прегазиле со автомобил, а потоа ја задавиле и и го фрлиле телото.
Потрагата се префрли во месноста Лазарева Пештера и Злотска река, кои се на нешто повеќе од 3 километри од селото Злот, каде се наоѓа куќата на Дејан Драгијевиќ, кој призна дека го задавил девојчето.
Српското Министерство за внатрешни работи најави дека продолжува со потрага по телото на убиената Данка. „Припадниците на МУП интензивно вршат детален претрес на теренот на подрачјето на градот Бор во потрага по телото на двегодишната Данка Илиќ, за чиешто грозоморно убиство се осомничени С.Ј.(50) и Д.Д. (50).
Како што наведуваат, повеќе од десетина припадници на полицијата со најсовремена опрема во моментов ја пребаруваат Лазарева Пештера, која се наоѓа на околу три километри од селото Злот каде живее осомничениот Д.Д, Лазаревиот Кањон, како и целиот простор покрај Злотска Река во потрага по телото на детето.
Се сомнева дека телото на Данка од депонија во околината на Бањско Поље го префрлил Д.Д., вториот ден по извршеното кривично дело, се вели во соопштението на МВР на Србија.
Како што јавува репортерот на Телеграф од местото на настанот, пред пештерата има припадници на полицијата, како и пожарникари и спасувачи. Денеска е целосен молк пред куќата на осомничениот Дејан Драгијевиќ. Никој нема, освен една дежурна полициска патрола.
Да потсетиме, полицијата вчера изврши интензивен претрес на теренот на куќата на осомничениот Дејан Д., кој и самиот вчера бил на местото на настанот. Во селото Злот од утрото пристигнуваат цистерни за одводнување на септички јами, пожарникари, полиција, багери.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Министерството за внатрешни работи на Србија: Дачиќ примил плик со три куршуми во него

Српското Министерство за внатрешни работи соопшти дека вчера во зградата на владата на Република Србија е пронајден плик адресиран до вицепремиерот и министер за внатрешни работи, Ивица Дачиќ, во кој имало три куршуми.
Сомнителната пратка е откриена вчера за време на безбедносна проверка на рендгенски уред при сортирање пошта. Истрагата утврдила дека пликот бил предаден два дена претходно во филијалата на поштата на Србија во Пожаревац.
Полицијата го идентификувала и го пронашла лицето што го доставило пакетот, а истрагата за сите околности на настанот е во тек.
Министерството соопшти дека ги презема сите законски пропишани мерки и дејства со цел да се заштити безбедноста на граѓаните и на институциите.
Фото: принтскрин
Регион
Четиригодишно дете од Србија за малку ќе се удавело на Халкидик: уапсен таткото

Четиригодишно момче од Србија за малку ќе се удавело вчера на плажа на Халкидик, а полицијата го уапси таткото по инцидентот, пренесуваат медиумите во регионот.
Вистинската драма се одвиваше вчера попладне на плажата Калитеа, во општина Касандра, кога четиригодишно момче од Србија речиси ќе се удавело додека беше на одмор со своето семејство во Грција.
Според крајбрежната стража, откога на четиригодишното момче му беше укажана прва помош од спасувач на плажата, тоа беше пренесено со брзата помош првин во Здравствениот центар – Касандра, а потоа во Општата болница на Халкидик за понатамошен медицински третман.
Потоа полицијата го уапси таткото на момчето за прекршување на член 306 од Кривичниот законик. Не е познато дали детето било само во водата во времето на инцидентот.
Фото: принтскрин
Регион
Бебе старо 7 дена пронајдено покрај контејнер во Белград

Во раните утрински часови во Земун, на улицата Дунавска, покрај контејнер, пронајдено е новороденче. Како што дознава српски „Телеграф“, станува збор за бебе старо само седум дена.
Детето било завиткано во пешкир, а по пристигнувањето на брзата помош, покажувало знаци на живот. Веднаш било пренесено во Клиничката болница Земун, каде што му била укажана медицинска помош.
Повеќе информации засега не се познати.
фото: принтскрин