Регион
Прекината потрагата по младиот Британец, кој падна од брод за крстарење во Јадранското Море

Вчера, околу 14 часот, и официјално е прекината големата потрага по младиот Британец, кој во петокот падна од брод за крстарење во Јадранското Море, јавува ХРТ.
Акцијата е почната во петокот во 5 часот по добиена пријава од капетанот на патнички брод што пловел од правец на Дубровник кон Задар, а била координирана од Националниот центар за координација за пребарување и спасување на море во Риека.
Во потрагата биле вклучени мали чамци, екипажи и чамци за крстарење, бродови и авиони на крајбрежната стража. Фокусот на потрагата беше на поширокото подрачје на архипелагот Вис. Националниот координативен центар за поморско пребарување и спасување ќе продолжи да емитува пораки на крајбрежните радиостаници како дел од редовните активности за пребарување.
„Човекот падна во морето од над 30 метри височина, можеби е повреден при падот“, изјави пред два дена Радован Линиќ, координатор во Националниот центар за координација на потрагата и спасувањето на море.
Едо Шаруниќ, шеф на Националниот центар за координација на потрагата и спасувањето на море, објасни дека член на екипажот на бродот за крстарење го забележал младиот Британец во морето и веднаш му фрлил појас за спасување.
„Сплитската капетанија, која е одговорна за таа област, поморската полиција и крајбрежната стража веднаш беа контактирани“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Шеќеринска: НАТО нема да дозволи безбедносен вакуум во БиХ

Заменичката на генералниот секретар на НАТО, Радмила Шеќеринска, денес изјави дека алијансата нема да дозволи безбедносен вакуум во Босна и Херцеговина, откако српскиот лидер Милорад Додик објави дека ќе побара од Москва да ја прекине воената мисија ЕУФОР во таа земја.
Шеќеринска изјави дека НАТО е „трајно посветен на суверенитетот и територијалниот интегритет на Босна и Херцеговина“.
Таа додаде дека НАТО нема да дозволи дестабилизација во Босна и Херцеговина, соопшти канцеларијата на бошњачкиот член на колективното претседателство на Босна и Херцеговина, Денис Беќировиќ, кој се сретна со претставничката на НАТО.
„Без оглед на исходот од претстојната седница на Советот за безбедност на ООН, НАТО нема да дозволи безбедносен вакуум во Босна и Херцеговина“, рече Шеќеринска.
Регион
Албанска министерка го разреши својот заменик поради непочитување на забраната за пушење

Министерката за внатрешни работи на Албанија, Албана Кочиу, го разреши својот заменик поради непочитување на забраната за пушење во ресторан во САД, објавува „Спутник“.
Таа потврди на социјалните мрежи дека го сторила тоа врз основа на пријавата на албански државјанин кој живее во Њујорк, каде што бил во посета нејзиниот заменик Анди Махила. Како што изјави, тој пушел цигара во ресторанот „што предизвикало немир кај присутните“.
Албана Кочиу е првата жена на чело на полицијата во историјата на Албанија, а во претходната влада беше министерка за здравство.
Фото: принтскрин
Регион
Улиците во Белград оштетени за време на воената парада

Јавното комунално претпријатие Белград (ЈКП) доби наредба денес да излезе на терен и да започне со поправка на патиштата оштетени за време на воената парада „Силата на единството“ во саботата во српскиот главен град.
Членови на кабинетот на српскиот министер за одбрана и Секторот за инфраструктура и стандардни услуги вчера ја посетија рутата на парадата со претставници на Град Белград, Јавното комунално претпријатие Путеви Београда и ЈКП Белград за да ја утврдат штетата предизвикана за време на подготовките и одржувањето на парадата.
На жителите на Белград претходно им беше ветено дека сè ќе биде вратено во првобитната состојба, објавува Нова.рс.
Во саботата во Белград се одржа воена парада насловена како „Силата на единството“, на која учествуваа околу 10.000 војници. На парадата присуствуваа претставници на српскиот државен врв, предводени од претседателот Александар Вучиќ.
фото: принтскрин