Регион
Претседателот на Србија ѝ ги предаде вакцините на БиХ

Претседателот на Србија, Александар Вучиќ, денеска, во Сараево, предаде контингент од 5.000 вакцини од компанијата „Астра зенека“, што Србија ѝ ги донира на Босна и Херцеговина.
На сараевскиот аеродром „Бутмир“, претседателот на Србија беше пречекан од претседателот на Претседателството на БиХ, Милорад Додик, и од бошњачкиот член на Претседателството, Шефик Џаферовиќ.
Беше најавено дека Вучиќ ќе биде пречекан на аеродромот од комплетното претседателство на БиХ, но присуството на хрватскиот член Жељко Комшиќ изостана.
Во пресрет на заминувањето Вучиќ за сараевските медиуми изјави дека е многу среќен што може да дојде во Сараево и да ги донесе првите дози вакцини.
Тоа, вели тој, не е помош, туку нешто што им припаѓа еднакво на сите, а Србија, како што додава, ја имаше таа среќа да обезбеди повеќе вакцини.
„Тоа се вкупно 10.000 дози. Утре 5.000 дози, а за неколку дена уште 5.000. Мислам дека тоа е особено важно за здравствените работници што работат во зоната на црвената коска во БиХ. Мојата порака е дека мора да се свртиме едни кон други, да не сметаме дека сите други ни се поважни и дека е важно колку лошо ќе кажеме за оние што се најблиску до нас“, истакна претседателот на Србија.
Тој претходно зборуваше за балканските народи, кои, според него, имаат голема сила и моќ кога се обединети.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Ужас во Јагодина: Внук ги заклал бабата и дедото и избегал

Двојно убиство се случило во близина на Јагодина. Според првичните информации М.М. (39) ги заклал бабата Р.Ж. (76) и дедото Р.М. (79) и избегал. Неофицијално, убиството се случило во селото Богава, општина Деспотовац, а телата на сопружниците биле пронајдени рано утрово во семејната куќа.
Полицијата е на местото на настанот и во тек е истрага, а пристигнати се и обвинителот на Вишото јавно обвинителство во Јагодина.
Регион
Шеќеринска: НАТО нема да дозволи безбедносен вакуум во БиХ

Заменичката на генералниот секретар на НАТО, Радмила Шеќеринска, денес изјави дека алијансата нема да дозволи безбедносен вакуум во Босна и Херцеговина, откако српскиот лидер Милорад Додик објави дека ќе побара од Москва да ја прекине воената мисија ЕУФОР во таа земја.
Шеќеринска изјави дека НАТО е „трајно посветен на суверенитетот и територијалниот интегритет на Босна и Херцеговина“.
Таа додаде дека НАТО нема да дозволи дестабилизација во Босна и Херцеговина, соопшти канцеларијата на бошњачкиот член на колективното претседателство на Босна и Херцеговина, Денис Беќировиќ, кој се сретна со претставничката на НАТО.
„Без оглед на исходот од претстојната седница на Советот за безбедност на ООН, НАТО нема да дозволи безбедносен вакуум во Босна и Херцеговина“, рече Шеќеринска.
Регион
Албанска министерка го разреши својот заменик поради непочитување на забраната за пушење

Министерката за внатрешни работи на Албанија, Албана Кочиу, го разреши својот заменик поради непочитување на забраната за пушење во ресторан во САД, објавува „Спутник“.
Таа потврди на социјалните мрежи дека го сторила тоа врз основа на пријавата на албански државјанин кој живее во Њујорк, каде што бил во посета нејзиниот заменик Анди Махила. Како што изјави, тој пушел цигара во ресторанот „што предизвикало немир кај присутните“.
Албана Кочиу е првата жена на чело на полицијата во историјата на Албанија, а во претходната влада беше министерка за здравство.
Фото: принтскрин