Регион
Пропадна иницијативата на Рама да ја поништи резолуцијата за „жолтата куќа“ во Советот на Европа
Албанскиот премиер Еди Рама не успеа да го поништи извештајот на поранешниот известувач на Советот на Европа, Дик Марти, за трговијата со органи на киднапираните Срби во Косово и северна Албанија, пренесува „Данас“.
Рама побара и поддршка од земјите-членки на СЕ за почнување процес што ќе доведе до нов извештај кој ќе го исправи она што тој го нарече „трагична грешка“.
Иницијативата на Рама за донесување нова резолуција со која ќе се оспори извештајот на Марти беше на дневен ред на Бирото на Парламентарното собрание на Советот на Европа, но беше одлучено да се направи само „информација“ која нема никаква политичка тежина бидејќи нема да има извештај.
Албанскиот премиер ја поднесе оваа иницијатива на 3 април, на денот кога во Хашкиот суд за ОВК почна судскиот процес против поранешниот лидер на терористичката Ослободителната војска на Косово (ОВК), Хашим Тачи, и неговите соучесници Кадри Весељи, Реџеп Сељими и Јакуп Красничи.
Рама во документот тврдеше дека во резолуцијата на Марти „без никакви факти се упатени страшни обвинувања за трговија со човечки органи против ОВК“ и дека ни по 11 години од усвојувањето на Резолуцијата во СЕ врз основа на извештајот на Марти, нема докази за трговија со човечки органи.
„Единаесет години подоцна, сите истражни напори направени оттогаш, на национално, регионално или меѓународно ниво, за докажување на обвиненијата за трговија со човечки органи, успеаја да го докажат она што беше познато: нема апсолутно никакви докази, ниту во Албанија ниту на друго место во регионот, за вадење и тргување со органи, за што може да се обвинат и припадници на ОВК,“ напиша во иницијативата албанскиот премиер.
Неуспехот на Рама да го реализира својот план го потврди и Елвира Ковач, членка на српската делегација и потпретседател на ПССЕ.
„Кога некој ќе покрене иницијатива за усвојување резолуција, како што направи Албанија, одлуката не мора да биде да се направи извештај од неа, како што сакаше Рама. Тој сакаше иницијативата да биде проследена до Комисијата за правни прашања, потоа да се избере известувач и на крајот да испадне дека „жолтата куќа“ не постои. Тоа не му помина,“ истакнува Ковач.
Според неа, навистина би било безобѕирно да се доведуваат во прашање претходните извештаи и работата на Комитетот на СЕ.
„Тоа би бил невиден преседан, никогаш досега не се случил. Одлуката за иницијативата на Рама е донесена со акламација, со неа се согласија сите во Бирото,“ нагласи таа.
Според професорот по безбедносни науки, Мирослав Бјеговиќ, Рама сака да го оспори извештајот на Марти тој недвосмислено докажал оти имало трговија со органи на киднапирани Срби.
„Тоа заедничко злосторство се случи под закрила на ШИК, разузнавачката служба на Косово на чело со Кадри Весељи. Истиот тој Весељи се школувал во албанската разузнавачка служба ШИШ. СЕ веќе усвои резолуција врз основа на извештајот на Марти, а тоа е тешко да се оспори,“ убеден е Бјеговиќ.
Коментирајќи ги тврдењата на Рама дека резолуцијата на Марти повеќе се заснова на шпекулации отколку на факти, пратеничката на СНС од Косово, Данијела Вујичиќ, оценува дека ова е обид за притисок врз Србија, но и врз хашките судии.
„Иницијативата на Рама е користење на моментот на невиден притисок врз Србија за прашањето на Косово за да се минимизираат злосторствата на ОВК и нејзините лидери кои сега се во Хаг. Познато е што се случувало на северот на Албанија, во „Жолтата куќа“, како и на други места во Косово. Ќе беше премногу да поминеше и овој евтин обид,“ вели таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Нови сведоци во случајот за убиството на Данка Илиќ: закажани рочишта, телото на детето сѐ уште не е пронајдено
Во Вишото јавно обвинителство во Заечар на 27 и 28 мај е закажан распитот на нови сведоци во врска со истрагата против Дејан Драгијевиќ и Срѓан Јанковиќ, осомничени за убиството на двегодишната Данка Илиќ, објавија српските медиуми.
Од обвинителството за „Танјуг“ велат дека е завршен дел од ДНК-испитувањето на примероците земени и од автомобилот што го управувале осомничените, а на нив не е пронајдена ДНК на девојчето.
Од таму додаваат дека вештачењето на движењата на возилата на осомничените врз основа на ГПС-уредот е во тек, а психијатриското вештачење на осомничените е завршено, но наодот и мислењето на вештачењето сѐ уште не се доставени до Обвинителството.
Покрај Дејан Д. и Срѓан Ј., во притвор е и таткото на Дејан, кој е осомничен дека му помогнал на синот да го премести телото на девојчето.
Братот на Дејан Д., Далибор Драгијевиќ, почина на 7 април во просториите на Полициското одделение во Бор при приведувањето.
Двегодишната Данка Илиќ исчезна на 26 март во Бањско Поле кај Бор, а полицијата по 10-дневна потрага и детаљни проверки на сите индиции и информации, ги уапси Срѓан Ј. и Драган Д. од Бор, кои се осомничени дека го удриле девојчето со автомобилот, а потоа нејзиното тело го ставиле во багажникот и го однеле на депонија.
Телото на девојчето сѐ уште не е пронајдено.
Регион
Вучиќ: На седницата на Советот за безбедност на ОН ќе им одговорам на оние што ги обвинуваат Србите дека се геноциден народ
Српскиот претседател Александар Вучиќ нема да учествува на самитот на лидерите на Западен Балкан и Европската Унија во Котор, Црна Гора, бидејќи ќе присуствува на седницата на Советот за безбедност на ОН за, како што рече, „да им одговори на оние што би ги обвинилe Србите дека се геноцидна нација“.
Пред заминувањето за Њујорк, Вучиќ во Белград се сретна со рускиот амбасадор Александар Боцан-Карченко, откога во понеделникот беше домаќин на шефот на дипломатијата на Украина, Дмитро Кулеба, кој беше во Србија во исто време со Олена Зеленска, сопругата на п0ретседателот на Украина.
Србија постојано ја осудува руската инвазија на Украина во Обединетите нации и други меѓународни форуми, но одбива да се приклучи на меѓународните санкции против Кремљ, пишува „Н1“.
На денешната средба со рускиот амбасадор, Вучиќ рече дека одржувањето на стабилноста во регионот е од витален интерес за Србија, но дека произволните потези и иницијативи на Приштина, како што е резолуцијата на Генералното собрание на ОН за Сребреница, не придонесуваат за процесот на помирување, градење доверба и соработката во регионот.
Во посета на Србија е и европскиот комесар за соседство и проширување, Оливер Вархељ, кој во понеделникот на заедничката прес-конференција со српскиот претседател, зборувајќи за резолуцијата за Сребреница, рече дека не се согласува со колективното казнување еден народ.
„Не се согласувам со ставот за колективна вина, не мислам дека стигматизирањето на српскиот народ и колективната вина е одржлив избор ниту, пак, ќе придонесе за надминување на ужасите од балканските војни“, рече Вархељ.
Резолуцијата со која се потсетува на геноцидот врз Бошњаците од Сребреница треба да биде претставена на седницата на Генералното собрание на Обединетите нации во мај, а Вучиќ и претседателот на Република Српска, Милорад Додик, постојано укажуваа дека споменатата резолуција е обид за наметнуваат колективна вина на српскиот народ, а тие инсистираат на тоа дека немало геноцид во Сребреница, иако тоа беше потврдено со пресудите на Хашкиот трибунал.
Резолуцијата повикува да се воспостави 11 јули како меѓународен ден на сеќавање на жртвите на геноцидот во Сребреница, уште еднаш се осудуваат сите дејства со кои се величат сторителите на воени злосторства, злосторства против човештвото и геноцидот, утврдени со пресудите на меѓународните судови. Ја нагласува важноста од завршување на потрагата по останките на преостанатите жртви, кои досега не се пронајдени, и повикува на продолжување на гонењето на сторителите на геноцидот, кои сѐ уште се на слобода.
Македонија е коспонзор на Резолуцијата за Сребреница. Претходно денес, претседателот на партијата Македонци во Србија, Горан Илијевски, испрати писмо до новата претседателка на Македонија, Гордана Силјановска-Давкова, да се огради од непромислената одлука на министерот за надворешни работи Бујар Османи и со тоа да ја поништи одлука за прогласување геноцид во Сребреница.
Регион
Вархељ во Србија: Денешните одлуки ги обликуваат следните пет години
Комесарот за соседска политика и проширување на Европската Унија (ЕУ), Оливер Вархељ, по средбата со српскиот премиер Милош Вучевиќ во Белград, најави дека денешните клучни одлуки „ќе ги обликуваат следните пет години“.
Вархељ, кој претходно се сретна со српскиот претседател Александар Вучиќ, на X напиша дека се сретнал со Вучевиќ и со членовите на неговиот кабинет.
„Ова е критична година. Следните пет години ќе се обликуваат врз основа на денешните клучни одлуки. Нема време за губење“, напиша Вархељ.
Тој додаде дека детаљно разговарал за отворените прашања од реформската агенда во владата на Србија, кои треба да бидат финализирани во наредните денови.
„Разговаравме и за планот за раст. Диверзификацијата на гасот е најитното прашање. Тоа има значително влијание врз иднината на енергетската безбедност на Србија“, напиша тој.
До изградбата на гасоводот со Бугарија, кој делумно беше финансиран од ЕУ, Србија се потпираше исклучиво на увоз на гас од Русија.
Овој гасовод беше пуштен во пробна работа во декември 2023 година и Србија преку него ќе купува гас од Азербејџан.
Властите во Србија делумно го оправдаа својот став да не воведуваат санкции кон Русија со нивната зависност од рускиот гас.
На прес-конференцијата по средбата со премиерот на Србија, Оливер Вархељ изрази надеж дека новата влада на Србија ќе го забрза патот на земјата кон Европската Унија, јавува Радио-телевизија на Србија (РТС).
Во владата на Србија беше потпишан договор со кој Европската Унија ќе донира десет милиони евра за втората фаза од програмата „Обновливи извори на енергија – развој на пазарот на биомаса во Србија“.
Проектот ќе им овозможи на топланите во неколку локални самоуправи да се префрлат на користење биомаса како извор на енергија, што на нивните граѓани ќе им донесе сигурно снабдување и поздрава животна средина.
Вархељ, како што е најавено, во вторник ќе разговара и со министерот за надворешни работи, Марко Ѓуриќ, и со министерот за внатрешни работи, Ивица Дачиќ.