Регион
Родителите на децата убиени во белградското училиште протестираат пред српската влада

Родителите на децата што беа убиени во масакрот во белградското училиште на 3 мај, како и други граѓани, протестираат пред зградата на владата на Србија, јавува „Нова.рс“. Тие се собраа точно во 8.40 часот, времето кога почна масовното пукање во основното училиште „Владислав Рибникар“.
Пред да стигнат до зградата на владата тие запалија свеќи и оставија цвеќе пред училиштето. Нинела Радичевиќ, мајката на убиеното девојче Ана Божовиќ, објасни дека причината за нивното собирање е тоа што Советот на родителите не гласал за вклучување на таткото на едно од убиените девојчиња во ова тело иако тоа е препорака на Министерството за образование.
Тие исто така сакаат да привлечат внимание на неопходноста од спомен на зградата.
„Институциите мора да се вклучат во овој проблем и сакаме да го свртиме вниманието“, рече Радичевиќ.
Таа се пожали дека родителите сѐ уште ја немаат добиено официјалната информација за меморијалниот центар што ја бараат.
„Како мајка на убиено дете, последното нешто што ми треба е меморијалниот центар. Му треба на ова општество“, истакна таа.
Насобраните родители тврдат дека е потребно достоинствено споменување и обнова на училишната заедница врз основа на хуманост и солидарност.
Да потсетиме, ученик од седмо одделение на 3 мај уби уште девет ученици и училиштен чувар во „Рибникар“. Поминаа речиси седум месеци од масовното пукање, а некои родители бараат училиштето да се претвори во меморијален центар. Но, има и друга група родители, кои се против ова, и предлагаат спомен-делот на училиштето да биде влезот во училницата и самата училница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Тројца загинати и седум лица во тешка состојба по превртување на автобус кај Сремска Митровица

Состојбата на повредените во тешката сообраќајна несреќа што се случи кај Сремска Митровица, во која животот го загубија три лица, и понатаму е сериозна, изјави денеска директорот на Општата болница во Сремска Митровица, д-р Војислав Мирниќ.
„Хоспитализирани се 39 пациенти. Од нив, седум се со потешки повреди и се наоѓаат на одделенијата за интензивна нега, додека 15 пациенти се подготвени за отпуст,“ рече Мирниќ.
Тој прецизираше дека 13 пациенти од Одделението за општа хирургија и двајца од Одделението за ортопедија се во стабилна состојба и наскоро ќе бидат пуштени дома.
„Се врши дополнителна дијагностика за сите пациенти, а во наредните 48 часа очекуваме уште дел од нив да бидат подготвени за отпуст. Посетите во болницата се дозволени од 14 до 16 часот,“ додаде Мирниќ.
Во несреќата, која се случила на патот меѓу Сремска Митровица и селото Јарак, загинале три лица – две на самото место и едно во болница, од последици на тешките повреди.
Вкупно 61 патник бил прегледан во митровачката болница, а 39 лица биле задржани на лекување. Осуммина се на интензивна нега, дваесетмина на општа хирургија, а единаесетмина на ортопедија.
Еден пациент е префрлен во Ургентниот центар во Нови Сад, а друг во Белград на понатамошно лекување.
Автобусот на превозникот „Сирмиум бус“, кој превезувал работници, под засега непознати околности излетал од патот и се превртел. Возачот на автобусот, Д. К. (1955), е уапсен поради сомнение дека ја предизвикал несреќата во која загинаа три лица. Нему му е одредено задржување до 48 часа, по што ќе биде изведен пред надлежното обвинителство со кривична пријава.
Регион
Трета жртва од тешката сообраќајка во Сремска Митровица – почина за време на операцијата

Уште едно лице загинало по сообраќајната несреќа што се случи денес во Сремска Митровица, кога автобус се преврте и излета од патот. Ова е третата жртва на ужасната сообраќајна несреќа.
Како што објави „Н1“, лицето загинало за време на операцијата.
Како што претходно беше објавено, возачот на автобусот е приведен и во притвор до 48 часа.
Повредени се околу 80 лица. Причините за несреќата засега не се познати.
Регион
Вучиќ: Србија ќе се приклучи на развојот на руската вакцина против рак

Претседателот на Србија, Александар Вучиќ, изјави дека разговарал со Александар Кецман, директор на Институтот „Гамалеја“ во Москва, кој го информирал дека во Русија се развива вакцина против рак.
„Ми објаснија одредени работи. Имаме голем процент на заболени од рак. Оваа вакцина е поинаква, бидејќи им помага на веќе болните луѓе — не е превентивна. Може да биде успешна до 85 проценти,“ рече Вучиќ.
Тој додаде дека Србија ќе се вклучи во проектот веднаш штом Русија го дозволи тоа:
„Ќе подготвиме целосна инфраструктура за да бидеме спремни за два до три месеци. Не можеме уште да ја произведуваме, но ќе направиме сè за да бидеме подготвени.“
Вучиќ нагласи дека во Србија има повеќе случаи на малигни заболувања отколку во другите земји, што, според него, е поврзано со последиците од бомбардирањето во 1999 година.