Регион
„Слушнав вресок, па звуци на удирање“: хаос на лет од Љубљана, патничка нападна постара жена, авионот евакуиран
Летот на релација Љубљана – Лондон на компанијата „Изиџет“ е откажан кога една од патничките нападнала друга патничка, која седела до неа, како и персоналот на летот.
Потоа авионот се вратил на терминалот, каде што полицијата ја привела патничката, сите други биле извадени од леталото за да бидат прегледани од медицински персонал, а авионот полетал кон Лондон празен, пренесува 24UR.
Полициската управа во Крањ потврди дека аеродромските полицајци биле известени за нарушување на јавниот ред и мир во еден од авионите во средата околу 11.40 часот.
Еден од патниците во авионот изјавил дека до инцидентот дошло кога патничка се наведнала над друга постара патничка и ја замолила да ги извади слушалките од ушите и да го нагоди телефонот за лет.
„Првин слушнав крик, а по неколку моменти и звуци на удари. Во расправијата потоа се вмешала стјуардесата, која се обидувала да ја смири патничката велејќи ѝ дека не трпи насилство. Насилната жена наводно ја зграпчила со ноктите и неа и ја гризнала. Друга стјуардеса потоа ги прашала патниците дали некој може да помогне да се смири насилничката жена“, изјавила патничката и додала дека на персоналот му помогнале пет мажи.
По тоа, пилотот наводно ги известил дека авионот нема да полета и дека работата ќе ја реши полицијата.
Очевидецот рекол и дека помладата Словенка била раздразлива и вербално навредувала уште пред да влезе во авионот.
На патниците во авионот им е обезбедено хотелско сместување и втор лет в четврток попладне.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Поставен рекорд во центарот на Белград: 1.000 гитаристи свиреа истовремено
Концертот на „Guitar Art“ денеска собра 1.000 гитаристи на плоштад во Белград, кои поставија национален рекорд во присуство на инструменталисти кои свират на гитара и слични инструменти, пренесе српска „Политика“.
Концертот „1.000 гитари“ ги привлече пред се во центарот на Белград најмладите гитаристи и нивните учители, но заедно свиреа цели семејства, составени од три генерации: дедо, татко и син…
Имаше мајки и ќерки кои „замавнаа“ со белградскиот блуз квартет и специјалните гости на концертот, меѓу кои Дејан Цукиќ, Ју групата, Кики Лесендриќ и Пилотите, Срѓан Гојковиќ Гиле, Бојана Стаменов, Никола Чутурило – Чутура. „Ова е конечно моментот кога барем на еден час ги заменуваме силиконите за витамини на ’Трг Републике’. Ова е сеќавање на мојата младост и почетоци во рокенролот. Среќен сум“, изјави Никола Чутурило Чутура за Танјуг.
За неколку минути неколку илјади љубопитни луѓе се собраа на плоштадот да уживаат во првокласен музички настан.
Регион
Загинаа две лица, а пет се водат како исчезнати по судар на чамец и крузер во Дунав кај Будимпешта
Две лица го загубија животот доцна синоќа, а пет се водат за исчезнати во судар на мал моторен чамец и крузер на реката Дунав северно од Будимпешта, соопшти денеска унгарската полиција.
Телата на возрасен маж и жена се пронајдени северно од главниот град, а властите се уште трагаат по пет исчезнати лица.
Сома Чечи, портпарол на полицијата во Будимпешта, на прес-конференција рече дека, според досегашните сознанија, во чамецот имало вкупно осум возрасни лица и потврди дека две лица загинале, а пет се водат како исчезнати. Тројца мажи и две жени моментално се бараат со глисери и дронови, јавуваат унгарските медиуми.
Полицијата соопшти и дека во градот Комаром бил запрен поголем брод, а од увидот било откриено дека му е оштетен страничниот дел. Се врши увид и во тек е истрага за опасноста по водениот пат и смртта на неколку лица.
Регион
По обидот за атентат словачкиот премиер Фицо е надвор од животна опасност
Словачкиот премиер Роберт Фицо е надвор од животна опасност по обидот за атентат, изјави денеска министерот за одбрана и вицепремиер Роберт Калинак за словачката новинска агенција ТАСР.
Состојбата на Фицо се подобрува, а лекарската комисија утре треба да одлучи дали тој ќе биде префрлен. Фицо моментално се опоравува во универзитетската болница во Банска Бистрица.
Фицо беше тешко повреден на 15 мај, по седницата на Владата во градот Хандлова, кога 71-годишниот писател Јурај Цинтула, од непосредна близина неколку пати пукаше со пиштол во него. Специјалниот кривичен суд во словачкиот град Пезинок, со силно полициско обезбедување вчера му одреди притвор на Цинтула.