Регион
Сопружници од Австрија: Купивме куќа на Јадранот, ни ја запалија колата и ни ја отруја мачката
По купувањето, Анита и Готфрид за првпат ја виделе куќата летото во 2020 година поради пандемијата на коронавирусот, а потоа останале во неверување.
Брачен пар од австриската провинција Штаерска, Анита (61) и Готфрид Финк (71), сакале да го поминат животот во пензија во Хрватска на Јадранот, пишува „Клајн Цајтунг“. Заштедиле за имотот, а потоа во летото 2019 година нашле куќа со голема тераса која им одговарала. Нивиот нов дом бил лоциран во Угљан во општината Кали.
Тие ја виделе куќата за првпат по купувањето во летото 2020 година поради пандемијата на коронавирусот, а потоа следел хаосот.
„Не можевме да одиме во Хрватска поради короната. Кога стигнавме на одмор, наеднаш ‘никнала’ црна зграда буквално пред нашата врата, изјави Готфрид за „Клајн Цајтунг“. Нивниот сосед, градежен работник, им изнајмувал дивоградби на туристите, тврди брачната двојка.
„Сите го користеа нашиот имот за да стигнат до плажата“ тврдат тие.
И самата општина била свесна за ситуацијата, но немоќна, потврди за „Клајн Цајтунг“ градоначалникот Бруно Мишлов.
Парот тврди дека се обиделе да разговараат со соседот и мирно да ја решат ситуацијата, но немало напредок. Велат и дека имало тепачки. Во пролетта 2022 година, како што раскажаа, некој им го запалил автомобилот, а потоа во зимата 2023 година мачката им била отруена.
Австријците сега се обидуваат да покренат правна постапка против нивните соседи. „Клајн Цајтунг“ пишува дека мажот очигледно се обидел да ги легализира дивоизградените објекти со барање до надлежната канцеларија во Задар за пренамена во градежно земјиште. По интервенција на општината барањето било повлечено.
„Не знаеме што ќе биде понатаму“, се жалат Австријците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Курти: Единствено решение се нови избори
Косовскиот премиер Албин Курти, изјави дека нема друга опција освен одржување нови парламентарни избори, откако неговиот предлог за нова влада не го доби потребното мнозинство во парламентот.
Неговиот предлог бил поддржан од 56 пратеници, а биле потребни најмалку 61.
„Пред секој договор што ја искривува волјата на граѓаните, ние избираме избори. Земјата нема друг пат ниту начин освен нови избори“, изјави Курти.
Тој рече дека Демократскиот сојуз на Косово (ДСK) и Социјалдемократската иницијатива (НИСМА) одбиле да бидат дел од владата што тој ја предлага, и додаде дека тоа ја оневозможило и изборната соработка за изборот на нов претседател на Косово во март идната година.
Регион
Рама: Министерката создадена со вештачка интелигенција „ќе роди“ 83 дигитални помошници за парламентот
Албанскиот премиер Еди Рама соопшти дека нивната министерка создадена со помош на вештачка интелигенција, Диела, ќе „роди“ 83 дигитални помошници кои ќе работат како виртуелни асистенти на пратениците од Социјалистичката партија.
Според Рама, тие асистенти ќе ја подобрат ефикасноста и транспарентноста на парламентот, водејќи евиденција за седниците, подготвувајќи анализи и предлагајќи политики засновани на податоци.
Диела, која беше именувана во мај 2025 година, е првата виртуелна министерка во светот создадена со помош на вештачка интелигенција. Нејзината задача е да ја следи законитоста и транспарентноста на државните тендери и да спречи корупција, со користење алгоритми што одлучуваат без човечко влијание.
Рама ја опиша иницијативата како чекор кон „целосно транспарентна и безкорупциска“ администрација, а метафората за „трудна министерка“ симболично го претставува ширењето на вештачката интелигенција во повеќе сектори на управувањето во Тирана.
Регион
Двајца Хрвати и еден Србин со „бмв“ бегаа од полицијата во Германија и загинаа во несреќа
По тешката сообраќајна несреќа со три смртни случаи во близина на Брауншвајг, идентификувана е третата жртва.
Полицијата претпоставува дека станува збор за возачот на автомобилот кој во саботата, бегајќи од полицијата, паднал од мостот во каналот Мителанд. Сите тројца мртви од автомобилот сега се идентификувани, пишува РТЛ.де, пренесе Индекс.
Сè започна во сабота напладне кога возачот на БМВ со регистарски таблички од Минхен на автопатот А2 го игнорираше полицискиот знак за стоп и избега со голема брзина. Полициските патроли набрзо го изгубија возилото од вид, но десет минути подоцна добија неколку итни повици за сериозна несреќа.
Според првата реконструкција на настанот, истражителите веруваат дека бегалецот возел пребрзо по тесниот федерален пат Б4, престигнувајќи неколку автомобили од десната страна. Потоа возилото удрило во заштитна ограда, отскокнало во спротивна насока и се судрило челно со автомобил што доаѓал од спротивната страна. Поради силата на ударот, БМВ-то во бегство ја пробило оградата на мостот и паднало во Средногерманскиот канал.
Полицијата денес го потврди идентитетот на третата жртва.
„Се работи за 34-годишен државјанин на Србија“, изјави портпаролот на полицијата. Се верува дека тој го управувал возилото. Неговите сопатници, чиј идентитет беше утврден претходно, биле 25-годишен и 31-годишен од Хрватска.
Во второто возило биле 47-годишна жена и 53-годишен маж од Хамбург. Жената е тешко повредена, но нејзиниот живот е надвор од опасност, додека мажот е префрлен со хеликоптер во болница и неговата состојба е сè уште критична.
Автомобилот што ја предизвика несреќата беше извлечен од каналот во текот на викендот и запленет за судско вештачење. Понатамошниот тек на истрагата ќе зависи од наодите на вештакот, а случајот веројатно ќе биде предаден на канцеларијата на државниот обвинител, кој ќе одлучи за обдукција. Точниот тек на несреќата, како и причината зошто возачот бегал од полицијата, засега не се познати.

