Регион
Србија испраќа 29 ловци „миг“ во Украина според договорот со Франција, тврди руска политичарка

Договорот меѓу Франција и Србија за купување 12 нови повеќенаменски борбени авиони за 2,7 милијарди евра содржи клаузула за трансфер на српските ловци „миг 29“ во Франција по што ќе бидат испратени во Украина, тврди поранешна потпретседателка на Думата, долниот дом на рускиот парламент.
„Ловците ќе им бидат предадени на Французите во декември. Очигледно е дека тие авиони потоа ќе одат во Украина. Наводно, Москва веќе е информирана за оваа точка од договорот“, напиша Елена Владимировна Панина на „Телеграм“.
Според јавно достапните податоци, Србија има во активна служба 14 ловци „миг 29“, а Панина тврди дека се подготвува трансфер на 36 авиони. Не е познато колку неактивни авиони „миг 29“ има Србија во складиште.
Малку е веројатно дека Белград има дозвола од руските власти за оваа акција, изјави Панина.
„Ова не е првпат српско оружје да биде доставено во Киев. Украина преку посредник добила муниција од Србија во вредност од 800 милиони евра. Се поставува прашањето на кој од ‘браќата’ Русија може да го продаде своето оружје, без ризик дека подоцна ќе пукаат во нас“, рече рускиот политичар.
Информациите за можното префрлање на српските авиони во Украина доаѓаат во време на 19. Бледски стратешки форум во Словенија, на кој учествува и српскиот премиер Милош Вучевиќ.
Украинците се словенски браќа на Србите, а Белград гласаше за сите резолуции во Обединетите нации на тема украински територијален интегритет и суверенитет, изјави денеска премиерот на Србија.
На панелот на Бледскиот стратешки форум, тој ја бранеше одлуката на Белград да не воведе санкции кон Русија, иако интеграцијата во Европската Унија подразбира усогласување со надворешната и безбедносната политика на таа алијанса. Србија е единствената земја кандидат која сè уште не го сторила тоа.
Вучевиќ рече дека Србија ги почитува територијалниот интегритет и суверенитет на Украина и додаде дека Белград не крие ништо поврзано со односите со Кина и Русија и дека има право на најдобар начин да ги штити националните интереси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Албанска министерка го разреши својот заменик поради непочитување на забраната за пушење

Министерката за внатрешни работи на Албанија, Албана Кочиу, го разреши својот заменик поради непочитување на забраната за пушење во ресторан во САД, објавува „Спутник“.
Таа потврди на социјалните мрежи дека го сторила тоа врз основа на пријавата на албански државјанин кој живее во Њујорк, каде што бил во посета нејзиниот заменик Анди Махила. Како што изјави, тој пушел цигара во ресторанот „што предизвикало немир кај присутните“.
Албана Кочиу е првата жена на чело на полицијата во историјата на Албанија, а во претходната влада беше министерка за здравство.
Фото: принтскрин
Регион
Улиците во Белград оштетени за време на воената парада

Јавното комунално претпријатие Белград (ЈКП) доби наредба денес да излезе на терен и да започне со поправка на патиштата оштетени за време на воената парада „Силата на единството“ во саботата во српскиот главен град.
Членови на кабинетот на српскиот министер за одбрана и Секторот за инфраструктура и стандардни услуги вчера ја посетија рутата на парадата со претставници на Град Белград, Јавното комунално претпријатие Путеви Београда и ЈКП Белград за да ја утврдат штетата предизвикана за време на подготовките и одржувањето на парадата.
На жителите на Белград претходно им беше ветено дека сè ќе биде вратено во првобитната состојба, објавува Нова.рс.
Во саботата во Белград се одржа воена парада насловена како „Силата на единството“, на која учествуваа околу 10.000 војници. На парадата присуствуваа претставници на српскиот државен врв, предводени од претседателот Александар Вучиќ.
фото: принтскрин
Регион
Милановиќ: Луѓето на водечките позиции, особено во Европа, работат многу лошо

„Времињата во кои живееме денес се депресивни и не се добри. Луѓето што се на лидерски позиции, особено во Европа, работат многу лошо и воопшто не се на ниво на задачата. Некои работи се нерешливи, а начинот на кој се решаваат води кон понатамошен антагонизам и евентуално војна“, рече хрватскиот претседател Зоран Милановиќ во неделата вечерта во Њујорк.
Споредувајќи го времето на Студената војна со денешната ситуација, Милановиќ потсети дека тогаш било исклучително тешко и дека се потребни голема концентрација за разни луѓе да седнат и да разговараат за важни прашања.
„Во последните дваесет години сè е нарушено, безбедносната архитектура на светот, особено на западниот свет и на северната хемисфера, повеќе не постои“, рече тој и додаде дека денес живееме во тешки времиња и затоа мора да се погледнеме себеси, нашата работа и нашите интереси и да видиме дека не се истакнуваме премногу во сојузите во кои сме – НАТО и Европската Унија“.
Зборувајќи за ситуацијата во ЕУ и улогата на Хрватска, Милановиќ нагласи: „За жал, работите не функционираат онака како што требаше. Не мислам на привремени и повремени пласмани на пари што доаѓаат во Хрватска за претежно непродуктивни проекти и работи што нема да ја направат Хрватска технолошка сила и нема да ја направат побогата земја. Но, подобро е да го имаме тоа бидејќи кога ќе престане, ќе имаме нови сериозни предизвици. Денес, Хрватска мора да биде лојална на сојузите во кои е членка и мора да ги почитува обврските што ги презела, но исто така никогаш не смееме да дозволиме да бидеме вовлечени во комбинации и авантури што не сме ги кроеле бидејќи тоа не е солидарност. Никој не може да го бара тоа од нас и нема да го добие, според мене“.
Осврнувајќи се на војната во Газа, Милановиќ изјави: „Можеме да се залагаме за признавање на Палестина. Велат дека нема многу да се промени. Па, нема, но некои работи треба да се решат за да се продолжи понатаму. Светот нема да биде подобар и поубав, секогаш ќе биде исполнет со кризи, дефекти и недостатоци и ние мора да се приспособиме на тоа“.
Фото: принтскрин