Регион
Србија не ѝ испраќа оружје на Украина, тврди министерот Вучевиќ
Извештајот дека Србија испраќа оружје во Украина е лага, истакна денеска српскиот министер за одбрана Милош Вучевиќ, пренесува „Танјуг“.
Вучевиќ во целост ги демантира наводите на „Ројтерс“, кој цитира доверлив документ од Пентагон, во кој се тврди дека Белград има намера да ѝ обезбеди воена помош на Украина или веќе го сторил тоа.
Документот во форма на графикон „Одговор на тековниот конфликт меѓу Русија и Украина“ ги наведува проценетите позиции на 38 европски влади како одговор на барањата на Украина за воена помош.
Според графиконот, Србија одбила да обезбеди обука за украинските сили, но ветила дека ќе испрати воена помош или веќе ја доставила. Во документот било наведено и дека Србија има политичка волја и воена способност и во иднина да ја снабдува Украина со оружје.
Според „Ројтерс“, досието се наоѓало меѓу низата американски документи, вклучително и разузнавачки извештаи, кои се појавија на интернет на почетокот на годинава и неодамна беа откриени од медиумите.
„Веќе десетпати ги демантиравме овие лаги и пак ќе повториме. Србија не им продала, а нема ќе им продава оружје ниту на украинската, ниту на руската страна, ниту на земјите што го опкружуваат овој конфликт“, нагласи Вучевиќ.
„Секогаш постои можност некое оружје магично да се најде во зоната на конфликт, но тоа нема никаква врска со Србија“, додаде министерот. „Тоа е прашање за земјите што не ги почитуваат меѓународните норми, договорните обврски и деловните практики“.
Според Вучевиќ, очигледно е дека нечија цел е да ја дестабилизира Србија и да ја вовлече во конфликт во кој таа не учествува нагласувајќи ја воспоставената политика на Белград на неинволвирање.
Србија, која традиционално одржува добри односи со Москва и во голема мера се потпира на руската енергија, одби да воведе какви било санкции за Русија. Белград исто така ги влоши односите со многу западни држави одбивајќи да му обезбеди воена помош на Киев.
Претходно, во март српските власти ги негираа медиумските извештаи дека Белград ѝ доставил на Украина ракети за повеќекратните ракетни фрлачи „М-21 град“ од советско производство преку Турција и Словачка.
„Додадовме клаузула дека Турција не смее да ја извезе муницијата што ѝ ја дадовме без наша согласност“, истакна во таа пригода српскиот претседател, Александар Вучиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вучиќ за гласањето на Резолуцијата за Сребреница: Ќе има разочарувачки вести за ставовите на некои земји за кои не очекувавме „да ни забијат нож во грб“
Претседателот на Србија, Александар Вучиќ денеска најави дека при гласањето на Резолуцијата за геноцидот во Сребреница ќе има „разочарувачки вести“ во однос на позициите на некои земји.
„Ги добивме податоците, секако дека ќе има разочарувачки вести во однос на ставовите на некои земји за кои не очекувавме „да ни забијат нож во грб“, но очекувавме голем притисок и знаевме дека ќе има промени во ставовите. Цело време молчеа, но застанаа на страната на оние кои се големи и силни“, изјави Вучиќ на новинарите во обраќањето од Њујорк.
Тој изјави и дека верува оти „многумина кои ќе гласаат за Резолуцијата за геноцидот во Сребреница утре ќе кажат дека таа е за доброто на Србија“.
„Ќе ја повторат празната приказна дека не е колективна вина на српскиот народ“, рече претседателот на Србија.
Вучиќ рече дека ќе има „и такви кои ќе го издржат притисокот“.
„Парадоксално е што седницата на Генералното собрание на Обединетите нации ќе ја отворат Германците, повторно ќе ни судат, ќе одговорам и ќе возвратам на секој удар, а ќе имаме доволно пријатели кои ќе се појават во четврток навечер“, изјави Вучиќ.
Регион
(Видео) Силно невреме ја зафати Србија: жена загина во Сомбор
Силно невреме го погоди Сомбор околу 17 часот, а на социјалните мрежи кружат фотографии од соборени дрвја во овој град.
Исто така, како што соопшти српското МВР, една жена настрадала кога дрво паднало врз автомобилот во кој се наоѓала.
Поројни дождови и град ги погодија и Нови Пазар, Ивањица, Чачак.
Силно невреме денеска околу 15 часот го зафати Нови Пазар и околината, предизвикувајќи прекин на електричната енергија во неколку населени места, јавува Танјуг.
Fallen branches and trees at northwestern Serbia due to convective wind gusts on this evening, in Kucura near town Vrbas (first photo), and in town Sombor (2nd and 3rd photo).
Source – Facebook page: https://t.co/wDYT1MhWyc pic.twitter.com/7CB9lfJcJL
— Milos Milic (@skomimaster) May 21, 2024
Силен дожд и град со големина на ореви паѓаа со часови без престан, пренесуваат српските медиуми.
Поради обилните врнежи, на улиците се појавија големи количества вода, што го отежна движењето на автомобилите.
Регион
Врани напаѓаат луѓе во Србија
Најмалку две врани нападнале девојче во Ниш. Бегајќи од птиците паднала во грмушките покрај пешачката патека. Таа врескала и се обидела да се одбрани мавтајќи со хартијата во раката.
Тамошните медиуми пишуваат дека ова не е прв напад на врана во Србија оваа година. Тие пишуваат дека врани нападнале и постар човек додека преминувал на пешачки премин.
Нападите во овој период од годината не се невообичаени бидејќи враните напаѓаат во близина на гнезда, а како што се наведува во видеото кое се шири на социјалните мрежи, една врана испаднала од гнездото и затоа се свртеле кон луѓето.
Според експертите, птиците од семејството на врани (Corvidae) се меѓу најинтелигентните суштества на Земјата. Иако имаат многу помал мозок од мајмуните и делфините, тие поседуваат исклучително високи когнитивни способности. Тестовите покажале дека знаат да решат сложени проблеми во седум или повеќе чекори. Покрај тоа, една студија објавена во 2016 година во списанието „Nature“ покажа дека тие имаат способност наречена теорија на умот. Тоа е способноста да се разбере дека другите суштества имаат ум, кој до неодамна се сметаше за исклучиво човечки потенцијал. Дури и децата под три години немаат целосно развиена теорија на умот.
Ако сакате да избегнете напади на врани во сезоната кога тие се особено возбудени, експертите препорачуваат неколку правила.
„Иако може да изгледа дека врани напаѓаат без причина, тоа не е точно. Напаѓаат само кога имаат добри причини за тоа, а најважни се младенчињата или агресивното однесување кон нив. Треба да знаете дека враните многу добро ги паметат лицата дури и неколку години. Затоа, најдобро е да не ги вознемируваме и да не се однесуваме агресивно, бидејќи агресијата може да се врати со задоцнување.
Враните и нивните потомци од претходните години будно внимаваат на младите кои сè уште не созреале. Затоа, во сезоната од мај до почетокот на јули, најдобро е да се избегнуваат нивните места за гнездење, особено младите.
Враните се исклучително интелигентни и добро ги паметат лицата – со години. Мажот што го доживуваат како агресор ќе биде препознаен по долго време, дури и ако се облекува сосема поинаку. Згора на тоа, бидејќи тие имаат способност да комуницираат и да поучуваат, тие ќе шират информации до другите членови на јатото, врз основа на кои агресорот ќе стане непожелна личност за секого.
Сезоната на зголемена агресивност на врани завршува на почетокот на јули. Враните исто така можат да ги перцепираат децата како натрапници, па родителите треба да бидат особено внимателни. Имено, децата можат да предизвикаат напад на врани со нивното возбудено однесување, трчање и мавтање со рацете“, предупредуваат експертите.