Регион
Србија целосно ги затвора границите

Претседателот на Србија, Александар Вучиќ, најави дека од утре во осум часот ќе бидат затворени сите гранични премини.
„Во Србија има 103 случаи на коронавирус. Ја надминавме бројката од 100. Од тие 55 се во болница, а шест се во тешка состојба и се приклучени на распиратор. Очекуваме во деновите што доаѓаат, а тоа го гледаме и по реакциите на лекарите, понатамошно зголемување на бројот на заразените. Инфективната клиника во Белград е речиси полна, преминуваме на болницата ‘д-р Драгиша Мишовиќ’“, изјави претседателот на Србија, Александар Вучиќ.
Двајца пациенти денеска биле отпуштени од болница.
„Периодот на лекување не е краток“, рече тој.
Вучиќ најави уште поостри мерки.
„Од утре во 8 часот се затвораат сите граници за патен, железнички и речен сообраќај. Освен товарни камиони никој не може да влезе во Србија“, рече Вучиќ.
Тој кажал дека 81.180 српски државјани, главно од Германија, Австрија, Италија и Франција во изминативе недели дошле во Србија.
Вучиќ најави дека цела Србија ќе има заштитни маски следната недела.
„Секој што нема денес маска, ќе има следната недела. Во понеделник вечер и вторник наутро ќе имаме 10 милиони маски, кои најпрво ќе ги дистрибуираме до институциите, па до народот“, рече Вучиќ.
Тој ги повика граѓаните да не создаваат залихи со основните прехранбени производи, оценувајќи дека Србија е земја во Европа која моментно ги има најполните продавници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Осум од повредените во Кочани се во „Пирогов“ во Софија, три се деца, сите се во тешка состојба

Осум од повредените во пожарот во дискотеката „Пулс“ во Кочани се во тешка состојба во Софија во болницата „Пирогов“. Од нив три се деца на возраст од 15-16 години – две девојчиња и едно момче, објави БГНЕС.
Ова утрово го соопшти д-р Валентин Димитров, директор на „Пирогов“ – една од болниците каде што беа пренесени дел од повредените во трагичниот инцидент во Македонија, пренесе БГНЕС.
Уште петмина од примените во „Пирогов“ – четири мажи и една жена се во тешка општа состојба. Едно од децата е на интензивна нега. Тројца се интубирани. Изгореници има на горните екстремитети и лицето, објасни д-р Димитров.
Останатите повредени во Кочани, транспортирани во Бугарија, се сместени во Варна и Пловдив.
Д-р Валентин Димитров најави дека во моментов нема итна потреба од дарување крв за настраданите, но секогаш има потреба од крводарители. Тој апелираше да не престанува крводарителството. За повредените од Кочани, центрите за крв во Пловдив, Стара Загора и Софија се подготвени да одговорат на она што е потребно.
Регион
(Видео) Тројца пациенти од Кочани се примени во болница во Варна

Тројца повредени во пожарот во Кочани вчера се примени на Клиниката за изгореници при ВМА-Варна, јави Бгнес.
Тие беа пренесени во Варна со воениот авион Спартан, кој првично слета во Софија, каде што пет пациенти беа сместени во болницата Пирогов.
Бугарија се обврза на лекување на 14 повредени во пожарот во Кочани.
Во пожарот што избувна во дискотека во Кочани животот го загубија 59 лица.
Регион
Авион на српската армија со 12 повредени во пожарот во Кочани пристигна во Белград

Дванаесет пациенти повредени во пожарот во дискотека во Кочани вчера вечер се пренесени од Македонија во Белград со авион CASA C-295 на српската армија, кои ќе бидат згрижени во Воената медицинска академија и во Клиничкиот центар на Србија, јави Танјуг.
Претходно, авион со четворица лекари и четворица медицински техничари полета за Македонија за медицинска евакуација на повредените во несреќата. Двајца пациенти кои претходно биле пренесени од Македонија со воени амбулантни возила се на лекување во Воената болница Ниш и Клиничкиот центар Ниш. За да им се пружи помош на повредените, планирано е двајца лекари од ВМА (пластичен хирург и анестезиолог) и еден медицински техничар – инструмент-оператор да останат во Македонија, пренесе српски Телеграф.
Најмалку 59 лица загинаа во пожарот што избувна ноќта меѓу саботата и неделата во дискотеката „Пулс“ во Кочани.