Српскиот претседател, Александар Вучиќ, неодамна навести дека една моќна европска држава барала од Приштина да воведе такси на производите од централна Србија, но иако не сакаше да открие на која земја мисли, српски „Курир“ објави, повикувајќи се на дипломатски извори, дека станува збор за Германија.

„Паралелно со тоа, Франција на чело со Емануел Макрон испраќа охрабрувачки пораки до Србија и до Вучиќ, а од Албин Курти, новоизбраниот косовски премиер, побара итно да ги укине таксите. На овој начин, преку Србија и со спротивставени ставови, Макрон и германската канцеларка, Ангела Меркел, се борат за тоа кој ќе ги има главниот збор и позицијата лидер во ЕУ“, оценуваат дипломатските соговорници на „Курир“.

Вучиќ вели дека барањето за воведување такси имало цел да ја наведе Србија да излезе од дијалогот со Приштина, кој одел кон компромисно решение.

„Тоа е направено за да се поттикне Србија да излезе од дијалогот за да пропадне каков било план да добие нешто. Јас не го знаев тоа веднаш, но сега го знам. Станува збор за една значајна и моќна сила“, изјави Вучиќ.

Дипломатот Зоран Миливоевиќ вели дека тоа се вклопува со германскиот став во врска со прашањето на Косово, а дека Макрон се обидува да ја наметне Франција како лидер во однос на Германија.

„Германците не прифаќаат компромис за Косово и тој став е проблематичен за нас. Вучиќ вели дека е многу потешко да се разговара со Германија отколку со САД зашто Американците сега се многу покооперативни и пофлексибилни и сметат дека и српските интереси мора да се уважат“, вели тој.