Беспилотните летала од турско производство „бајрактар“, што му беа испорачани деновиве на Косово, се извесна помош во градењето на капацитетите на идната косовска армија и ќе може сериозно да извидуваат длабоко на територијата на Србија, особено во областа околу административната линија.

Освен тоа, тие може и да дејствуваат во внатрешноста на Србија во случај на вооружен конфликт, предупредува пензионираниот генерал Митар Ковач во интервју за „РТ Балкан“.

„Тоа се многу моќни летала и во однос на отпорот на извидување во воздушниот простор и во однос на нивната способност да дејствуваат против оклопни сили, артилериско оружје, колони за снабдување. Сето тоа можевме да го видиме на почетокот на ерменско-азербејџанската војна и подоцна во доменот на украинската криза“, вели Ковач.

Турската приватна компанија, која ги произведува дроновите „бајрактар“, во изминатите неколку дена им испорача пет вакви беспилотни летала на Косовските безбедносни сили, седум месеци по потпишувањето на договорот. Тие пристигнаа во Косово само неколку дена пред почетокот на големата меѓународна вежба NATO Defender Europe 2023, дел од која ќе се одвива на Косово.

Според пензионираниот потполковник на КОС, Љубан Каран, испораката на овие дронови на Косово не е воопшто наивна во однос на безбедноста. Каран предупредува дека Косово не само што планира да се вооружи туку и земјите од НАТО и квинтата му овозможуваат да учествува во вежбите на НАТО и го третираат како рамноправна членка на воената алијанса.

„Ова е сигнал дека индиректно ќе им овозможат поголеми атрибути на државност. Србија не може многу да направи за ова и да ја спречи косовската парадржава да влезе во европските и НАТО-институциите“, вели потполковник Каран.

Според генерал Ковач, испораката на турски дронови на Косово е продолжување на стратегијата и програмата на НАТО во однос на опремувањето на идната косовска армија според процените и одлуката на НАТО, што би било формализирано кога ќе се создадат меѓународни и внатрешни услови.

„Америка, пред сè, смета дека врз основа на бриселскиот договор и анексот од Охрид постои доволна основа Косово да поднесе барање за членство во НАТО по истекот на 150 дена и дека тоа ќе биде прифатено по скратена постапка. Ова е дел од патот што земјите на НАТО го спроведуваат долго време во однос на опремувањето на КБС“, предупредува Ковач.

Ковач исто така верува дека припадниците на КБС веќе поминале обука во Турција за користење на „бајрактарите“ и дека оваа обука ќе продолжи на терен во однос на изградба на инфраструктура, базирање на тие дронови, обука на КБС за тактиката на нивната примена, како и изведување проби на терен.

Во однос на отвореното прашање сега за потенцијалот на КБС и колку овие сили како дел од НАТО-трупите може да ја загрозат Србија, Ковач оценува дека „кога се развиваат сили во опкружувањето, а особено на територијата на сопствената земја, кои имаат амбиција да станат војска со поддршка на НАТО, тоа во значителна мера ја загрозува безбедноста“.

„Со тоа се кршат и меѓународното право и постигнатите договори, вклучително и самата Резолуција 1244 усвоена од Советот за безбедност. Србија треба постојано да го делегира ова прашање до СБ на ОН“, истакнува тој.